ހަކަތައިގެ ގޮތުގައި ބޭނުންކުރާ ތެއޮ އުފައްދާ ދުނިޔޭގެ އެންމެ ބޮޑު ޖަމިއްޔާ، އޯޕެކުން، ޔުނައިޓެޑް އެރެބް އެމިރޭޓްސް (ޔޫއޭއީ) ވަކިވާން ނިންމައިފިއެވެ.

ޔޫއޭއޭއީން މިގޮތަށް ނިންމާފައިވާކަން އެޤައުމުން ހާމަކޮށްފައިވަނީ މިއަދެވެ. ޔޫއޭއީ އޯޕެކްގެ މެމްބަރުކަމުން ރަސްމީކޮށް ވަކިވުމަށް ނިންމާފައިވަނީ، އަންނަ މެއިމަހުގެ އެއްވަނަ ދުވަހުން ފެށިގެންނެވެ. 

ޔޫއޭއީގެ މި ކުއްލި ނިންމުން އައިސްފައި ވަނީ އޮޕެކުގެ މެންބަރު ޤައުމެއް ކަމުގައިވާ އީރާނުން ޔޫއޭއީއަށް ހަފުތާތަކެއް ވާންދެން މިސައިލާއި ޑްރޯން ހަމަލާތައް ދެމުން ގެންދާ ދަނޑިވަޅެއްގައެވެ. ހޯމޫޒް ކަނޑުއޮޅީގައި ތެހެރާނުން ބޯޓުފަހަރަށް ދެމުން ގެންދާ ހަމަލާތަކާ ގުޅިގެން ޔޫއޭއީން ތެޔޮ ބޭރުކުރުމަށް ވެސް ވަނީ ބޮޑެތި ހުރަސްތައް ކުރިމަތިވެފައެވެ.

ޔޫއޭއީގެ ހަކަތައާ ބެހޭ ވުޒާރާއިން ނެރުނު ބަޔާނުގައި ބުނެފައި ވަނީ، އެ ޤައުމުގެ ތެޔޮ އުފެއްދުމުގެ ސިޔާސަތާއި ޤާބިލުކަން ވަށައިޖެހޭ ގޮތެއްގައި މުރާޖަޢާ ކުރުމަށް ފަހު، އޮޕެކުން ވަކިވާން ނިންމީ އެއީ މިވަގުތަށް އެޤައުމަށް އޮތް އެންމެ ރަނގަޅު ނިންމުން ކަމަށްވާތީކަމަށެވެ. އެ ވުޒާރާއިން އިތުރަށް ބުނީ، އޮޕެކުން ވަކިވިނަމަވެސް ކުރިއެކޭ އެއްގޮތަށް ވިޔަފާރީގެ މުއާމަލާތްތައް ކުރިއަށްދާނޭކަމަށެވެ.

ޔޫއޭއީގެ ހަކަތައާ ބެހޭ ވަޒީރު ސުހައިލް އަލް މަޒްރޫޢީ ސީއެންބީސީއަށް ދެއްވި ބަސްދީގަތުމެއްގައި ވިދާޅުވީ، އޮޕެކުން ވަކިވުމަށް މި ވަގުތު ނިންމެވީ ގުރޫޕުގެ އެހެން މެންބަރުންގެވެސް ފައިދާއަށް ކަމަށެވެ.

"މި ވަގުތު ވަކިވުމަކީ އެންމެ ރަނގަޅު ވަގުތު، ސަބަބަކީ ތެލުގެ އަގަށް ވެސް އަދި އޮޕެކާއި އޮޕެކް ޕްލަސްގައި ތިބި ރަޙުމަތްތެރިންނަށް ވެސް އެންމެ ކުޑަ އަސަރެއް ކުރާނީ މިގޮތަށް ނިންމުމުން" މަޒްރޫޢީ ވިދާޅުވިއެވެ.

ޔޫއޭއީގެ އަމާޒަކީ 2027 ވަނަ އަހަރުގެ ނިޔަލަށް ދުވާލެއްގެ މައްޗަށް 5 މިލިއަން ފީފާ ތެޔޮ އުފެއްދުމުގެ ޤާބިލުކަން ހާސިލުކުރުން ކަމަށާއި، އެ ލަނޑުދަނޑިއަށް ވާސިލުވުމަށް އިތުރު މިނިވަންކަން ބޭނުންވާ ކަމަށް ވެސް ވަޒީރު ވިދާޅުވިއެވެ. ސައުދީ ޢަރަބިއްޔާ އިސްވެ ކުރިއަށް ގެންދިޔަ އުފެއްދުން ކުޑަކުރުމުގެ ސިޔާސަތާ މި ނިންމުމާ ގުޅުމެއް ނެތް ކަމަށް ވެސް އޭނާ ފާހަގަކުރެއްވިއެވެ.

ޔޫއޭއީ އޯޕެކުން ވަކިވާން ނިންމިއިރު، އެޤައުމަކީ ގާތްގަނޑަކަށް ހަ ޤަރުނެއްހާ ދުވަހު އޮޕެކުގެ ނިންމުންތަކުގައި ނުފޫޒު ގަދަ ދައުރެއް އަދާކޮށްފައިވާ ޤައުމެކެވެ. ތަފާސްހިސާބުތަކަށް ބަލާއިރު، ޔޫއޭއީ ހިމެނެނީ މިހާރު ސައުދީ ޢަރަބިއްޔާ އާއި ޢިރާޤަށް ފަހު އޮޕެކުގެ މެމްބަރުންގެ ތެރެއިން ތިންވަނައަށް އެންމެ ގިނައިން ތެޔޮ އުފައްދާ ޤައުމަށެވެ. ޔޫއޭއީ އޮޕެކުގައި ބައިވެރިވެފައިވަނީ 1967 ވަނަ އަހަރުއެވެ.