އޮސްޓްރޭލިއާގެ ސައުތު އޮސްޓްރޭލިއާއަށް ނިސްބަތްވާ 45 އަހަރުގެ އަންހެނަކު، އޭނާގެ ހަ އަހަރުގެ ދަރިފުޅަށް ކެންސަރު ޖެހިފައިވާ ކަމަށް ބުނެ އޮޅުވާލައިގެން ގިނަ އަދަދެއްގެ ފައިސާ ހޯދި މައްސަލައެއްގައި ހަތަރު އަހަރަށް ވުރެ ދިގު މުއްދަތަކަށް ޖަލަށްލުމަށް ބުދަ ދުވަހު ހުކުމްކޮށްފިއެވެ.

ބީބީސީން ރިޕޯޓްކޮށްފައިވާ ގޮތުގައި، މި އަންހެންމީހާ މި އަމަލު ހިންގާފައިވަނީ މުއްސަނދި އަދި އަރާމު ދިރިއުޅުމެއް އުޅުމަށް ބޭނުންވާ ފައިސާ ހޯދުމުގެ ބޭނުމުގައެވެ.

މި އަންހެންމީހާ ވަނީ އޭނާގެ ދަރިފުޅަކީ ކެންސަރު ބަލިމީހެއްކަން ދެއްކުމަށްޓަކައި، ކުއްޖާގެ ބޯ ބާލައި، ބުމަ ކޮށައި، ބޮލާއި އަތުގައި ބެންޑޭޖް އަޅުވާފައެވެ. އަދި އާއިލާ އާއި ރައްޓެހިންގެ ފަރާތުން އެތައް ހާސް ޑޮލަރެއްގެ އެހީ ހޯދުމަށްޓަކައި ކުއްޖާއަށް ބޭޭސްވެސް ދީފައިވެއެވެ.

ގާނޫނީ ސަބަބުތަކަށްޓަކައި ނަން ހާމަނުކުރާ މި އަންހެންމީހާ ވަނީ ކުއްޖާއަށް އަނިޔާލިބޭ ފަދަ އަމަލުތައް ކުރުމުގެ އެއް ދައުވާއާއި، މަކަރާއި ހީލަތް ހެދުމުގެ 10 ދައުވާއަކަށް ކޯޓުގައި އިއުތިރާފުވެފައެވެ.

ކޯޓުގެ ފަނޑިޔާރު މި އަންހެންމީހާގެ އަމަލުތައް ސިފަކުރެއްވީ "އަނިޔާވެރި"، "ރޭވުންތެރި" އަދި "މަކަރުވެރި" އަމަލުތަކެއްގެ ގޮތުގައެވެ. މި މަކަރުވެރި ރޭވުން ފެށުނީ ކުއްޖާއަށް ދިމާވި އެކްސިޑެންޓަކާ ގުޅިގެން ލޮލުގެ ޚާއްޞަ ޑޮކްޓަރަކަށް ދެއްކި ހިސާބުންނެވެ. އެއަށްފަހު، އޭނާގެ ފިރިމީހާ އާއި އާއިލާގެ އިތުރުން ސްކޫލް މުޖުތަމައަށް ކުއްޖާއަށް ލޮލުގެ ކެންސަރު ޖެހިފައިވާ ކަމަށް ބުނެ ދޮގު މައުލޫމާތު ދިނެވެ. އަދި ކުއްޖާއަށް ރޭޑިއޭޝަން ފަރުވާ ދެމުންދާކަން ދެއްކުމަށްޓަކައި، ފުރޮޅުލީ ގޮނޑި ބޭނުންކުރުވައި، ކުއްޖާގެ ހަރަކާތްތައް ވަނީ ހަނިކޮށްފައެވެ.

ޝަރީއަތުގައި ޕްރޮސެކިއުޝަނުން ބުނީ، މި އަންހެންމީހާ އަމިއްލަ އެދުމަށްޓަކައި ދަރިފުޅު ބޭނުންކުރީ މީހުންނަށް އޮޅުވާލުމަށް ގެންގުޅޭ "ޕްރޮޕެއް"ގެ ގޮތުގައި ކަމަށެވެ. އަދި ލިބުނު ފައިސާ ބޭނުންކުރީ މުއްސަނދިން އުޅޭ ފަދަ ޝާހީ ދިރިއުޅުމެއް އުޅުމަށް ކަމަށްވެސް ފާހަގަކުރިއެވެ. އަންހެންމީހާގެ ވަކީލު ބުނީ ކޮވިޑް-19 ގެ ބަލިމަޑުކަމަށްފަހު އޭނާ ޖުވާކުޅުމަށް ދެވިހިފާފައިވާ ކަމަށާއި، މިއީ މާލީ ދަތިތަކުން ސަލާމަތްވުމަށް ކުރި ކަމެއް ކަމަށެވެ. އަދި އޭނާގެ ކިބައިގައި 'ބޯޑަލައިން ޕާސަނަލިޓީ ޑިސްއޯޑަރ' ހުރިކަންވެސް ވަކީލު ފާހަގަކުރިއެވެ.

މި މައްސަލާގައި އަންހެންމީހާގެ ފިރިމީހާ ދިން ބަޔާނުގައި ބުނީ، އޭނާގެ އަނބިމީހާ ވަނީ އޭނާ އާއި ދަރިންގެ ދިރިއުޅުން މުޅިން ހަލާކުކޮށްލާފައި ކަމަށެވެ.

ފިރިމީހާގެ މައްޗަށް ކުރިން ދައުވާ ކުރި ނަމަވެސް، ފަހުން ފުލުހުން ވަނީ އެ ދައުވާތައް އަނބުރާ ގެންގޮސްފައެވެ.

މި އަންހެންމީހާގެ މައްޗަށް އިއްވާފައިވަނީ 4 އަހަރާއި 3 މަހުގެ ޖަލު ހުކުމެކެވެ. ނަމަވެސް، އަންނަ އަހަރުގެ އޭޕްރީލް މަހު ޕެރޯލްގެ ދަށުން މިނިވަންވުމަށް އެދި ހުށަހެޅުމުގެ ފުރުސަތު އޭނާއަށް އޮންނާނެއެވެ.