ސައުދީ ޕްރޯ ލީގުގައި ރޭ ކުޅުނު ފޯރިގަދަ މެޗުގައި ރޮނާލްޑޯ އާއި ކޯމަންގެ ލަނޑުތަކާއެކު އަލް އަހްލީގެ މައްޗަށް 0-2 ގެ ނަތީޖާއަކުން އަލް ނަސްރުން ކުރިހޯދައިފިއެވެ.

އަލްއައްވަލް ޕާކްގައި ކުޅުނު މި މެޗުން މޮޅުވުމާއެކު، ތާވަލުގެ އެއްވަނައިގައި އަލް ނަސްރުން އޮތް ލީޑު ވަނީ އިތުރަށް ފުޅާކޮށްފައެވެ.

މެޗުގެ ފުރަތަމަ ހާފުގައި ދެ ޓީމަށްވެސް ލަނޑެއް ކާމިޔާބު ކުރެވިފައިނުވާއިރު، ދެވަނަ ހާފުގެ ކުރީކޮޅު އަލް އަހްލީގެ ރިޔާދު މަހްރޭޒް ޖެހި ލަނޑެއް އޮފްސައިޑްވުމުގެ ސަބަބުން ރެފްރީ ވަނީ އެ ލަނޑު ބާތިލުކޮށްފައެވެ.

މެޗުގެ ފުރަތަމަ ލަނޑު ފެނިގެންދިޔައީ 76 ވަނަ މިނެޓުގައެވެ. މި ލަނޑު އަލް ނަސްރަށް ކާމިޔާބުކޮށްދިނީ ޕޯޗުގަލްގެ ތަރި ކްރިސްޓިއާނޯ ރޮނާލްޑޯއެވެ. މިއީ ޖޯއާއޯ ފެލިކްސް ނަގައިދިން ކޯނަރަކުން ބޮލުން ޖަހައި އޭނާ ކާމިޔާބުކުރި ލަނޑެކެވެ. 

މެޗުގެ ފުރިހަމަ ވަގުތު ހަމަވާން ކައިރިވެފައިވަނިކޮށް، 90 ވަނަ މިނެޓުގައި ފްރާންސްގެ ކިންގްސްލީ ކޯމަން ވަނީ އަލް ނަސްރުގެ ދެވަނަ ލަނޑު ޖަހައިދީ މެޗުގެ ނަތީޖާ ކަށަވަރުކޮށްދީފައެވެ. މި ލަނޑު ޖެހުމަށް އެހީތެރިވެދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އައިމަން ޔަހްޔާއެވެ.

މި މޮޅާއެކު އަލް ނަސްރު ތާވަލުގެ އެއްވަނައިގައި އޮތީ 30 މެޗުން 79 ޕޮއިންޓާއެކުގައެވެ. ދެވަނައިގައި އޮތް އަލް ހިލާލަށް 29 މެޗުން 71 ޕޮއިންޓް ލިބިފައިވާއިރު، ރޭގެ މެޗުން ބަލިވި އަލް އަހްލީ އޮތީ 28 މެޗުން 66 ޕޮއިންޓާއެކު ތާވަލުގެ ތިންވަނައިގައެވެ.