ބެންގަލޫރުގެ ޝިވާޖީނަގަރުގައި ހުންނަ ބޯރިންގް އެންޑް ލޭޑީ ކަރްޒަން ހޮސްޕިޓަލުގެ ވަށާފާރުން ބައެއް ވެއްޓި، 7 މީހުން މަރުވެއްޖެއެވެ.

ބުދަ ދުވަހުގެ އިރުއޮއްސުނު ވަގުތު ހިނގި މި ހާދިސާގައި މިހާތަނަށް ހަތް މީހަކު މަރުވެފައިވާކަން ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ. މަރުވި މީހުންގެ ތެރޭގައި ދެ ކުޑަކުދިންވެސް ހިމެނޭ ކަމަށް ރިޕޯޓުތައް ބުނެއެވެ.

މި ހާދިސާ ހިނގާފައިވަނީ އެ ސަރަހައްދަށް ބޯކޮށް ވާރޭވެހި، ގުގުރައި ކޮޅިގަނޑެއް އައި ވަގުތެއްގައެވެ. މޫސުމާ ބެހޭ އިދާރާތަކުން ހާމަކޮށްފައިވާ ގޮތުގައި، އިރުއޮއްސި 5:30 އާ ހަމައަށް އެ ސިޓީއަށް 78.0 މިލިމީޓަރުގެ ވާރޭ ވެހިފައިވެއެވެ. ފާރު ވެއްޓުނު ވަގުތު، ވާރޭއިން ސަލާމަތްވުމަށްޓަކައި މަގުމަތީގައި އުޅުނު ގާޑިޔާ ވިޔަފާރިވެރިންނާއި ހިނގާފައި ދިޔަ ގިނަ ބަޔަކު އެ ފާރު ކައިރީގައި މަޑުކޮށްގެން ތިއްބެވެ.

ޝިވާޖީނަގަރުގެ އެމް.އެލް.އޭ ރިޒްވާން އަރުޝަދު ވިދާޅުވި ގޮތުގައި، މި ހާދިސާގައި ހަތް މީހަކު މަރުވުމުގެ އިތުރުން އިތުރު ހަތް މީހަކަށް އެކިވަރުގެ އަނިޔާ ލިބިގެން ދަނީ ފަރުވާ ދެމުންނެވެ. ނަމަވެސް އަނިޔާވި މީހުންގެ ހާލު ސީރިއަސް ނޫން ކަމަށް އޭނާ ފާހަގަކުރެއްވިއެވެ. ކަރްނާޓަކާގެ ޗީފް މިނިސްޓަރުގެ އޮފީހުން ނެރުނު ބަޔާނެއްގައި ވަނީ މި ހާދިސާގައި މަރުވި މީހުންގެ އާއިލާތަކަށް 5 ލައްކަ ރުޕީސްގެ މާލީ އެހީއެއް ދިނުމަށް ނިންމާފައިވާކަން އިއުލާންކޮށްފައެވެ.

ހާދިސާ ހިނގި ސަރަހައްދަށް ޗީފް މިނިސްޓަރު ސިއްދަރަމައްޔާ ޒިޔާރަތްކުރައްވައި، ހާލަތު ބައްލަވައިލައްވާފައިވެއެވެ. އޭނާ ވިދާޅުވީ މި ހާދިސާ ހިނގަން މެދުވެރިވި ސަބަބު ތަހުގީގު ކުރާނެ ކަމަށާއި، އިހުމާލުވި ފަރާތްތަކާ މެދު ފިޔަވަޅު އަޅާނެ ކަމަށެވެ. މީގެ އިތުރުން ޑެޕިއުޓީ ޗީފް މިނިސްޓަރު ޑީ.ކޭ. ޝިވަކުމާރުވެސް ވަނީ ހާދިސާ ހިނގި ތަނަށް ވަޑައިގެން، ލިބިފައިވާ ގެއްލުންތައް ބައްލަވައިލައްވާފައެވެ.

މި ހާދިސާއާ ގުޅިގެން އިދިކޮޅު ލީޑަރު އާރް. އަޝޯކާ ސަރުކާރަށް ފާޑުވިދާޅުވެފައިވެއެވެ. އޭނާ ތުހުމަތު ކުރެއްވި ގޮތުގައި މިއީ އިދާރީ އިހުމާލުން ހިނގާފައިވާ ކަމެއް ކަމަށާއި، މިއީ ހުއްޓުވިދާނެ ހާދިސާއެއް ކަމަށެވެ. ކަމާބެހޭ އިދާރާތަކުން މިހާރު ދަނީ ފާރުގެ ހާލަތު ހުރި ގޮތާއި، އެ ފާރު ވެއްޓެން މެދުވެރިވި ސީދާ ސަބަބު ހޯދުމަށް ފުޅާ ދާއިރާއެއްގައި ތަހުގީގެއް ކުރިއަށް ގެންދަމުންނެވެ.

ބެންގަލޫރަށް ކުރަމުންދާ ވިއްސާރާގައި އެ ރަށުގެ އެކި ސަރަހައްދުތައް ދަނީ ފެންބޮޑުވަމުންނެވެ. ބެންގަލޫރަކީ ގިނަ ދިވެހިންވެސް ބޭސްފަރުވާށާއި އެހެނިހެން ކަންތައްތަކަށް ޒިޔާރަތްކުރާ ތަނެކެވެ.