އިނގިރޭސި ޕްރިމިއާ ލީގްގައި ރޭ ފްލަމް ބަލިކޮށް ތާވަލްގެ އެއްވަނާގައި އާސެނަލް އަނެއްކާވެސް ހަމަޖެހިލައިފިއެވެ.

ލީގްގައި ފްލަމް އާ ދެކޮޅަށް ކުޅުނު މިމެޗް އާސެނަލުން ކާމިޔާބުކުރީ 3-0 ގެ ނަތީޖާއަކުންނެވެ. އާސެނަލްގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި އެޓީމަށް ފޯލް ހުޅުވާލަދިނީ، ނުވަވަނަ މިނެޓް ތެރޭގައި ސަކާ ތަނަވަސްކޮށްދިން ފުރުސަތެއްގައި ވިކްޓަ ޔޯކެރޭޝް އެވެ. މެޗްގެ 29 ވަނަ މިނެތް ތެރޭގައި އާސެނަލްގެ ރިކާޑޯ ކަލަފިއޯރީ ލަނޑެއް ޖެހިނަމަވެސް، ވީއާރު ބެލުމަށްފަހު ރެފްރީ ނިންމީ އެއީ އޯފްސައިޑް ގޯލެއްގެ ގޮތުގައެވެ.

ފުރަތަމަ ހާފް ނިމުމުގެ ކުރިން 40 ވަނަ މިނެޓް ތެރޭގައި ޔޯކެރޭޝް ތަނަވަސްކޮށްދިން ފުރުސަތެއްގައި ކެޕްޓަން ސަކާ ވަނީ ލަނޑެއް ޖަހައި މެޗްގެ ނަތީޖާ 2-0 ކަށް ބަދަލުކޮށްފައެވެ. އަދި މި ހާފުގެ އިތުރު ވަގުތުގެ ކުޅުމުގެ ތެރޭގައި ޔޯކެރޭޝް ވަނީ އިތުރު ލަނޑެއް ޖަހައި ލީޑް ފުޅާކޮށްދީފައެވެ.

މެޗަށްފަހު އާސެނަލްގެ ކުޅުންތެރިން ސަޕޯޓަރުންނާ ސަލާންކުރަނީ.. ފޮޓޯ: އާސެނަލް

ރޭގެ މެޗަށްފަހު އާސެނަލްގެ ކޯޗް މިކޭލް އަޓޭޓާ ބުނީ އާސެނަލްއަކީ ކިހާ ފެންވަރެއްގެ ޓީމެއްކަން ސާބިތުކޮށްދީފައިވާ ކަމަށެވެ. މިފަހަރުގެ ލީގު ޗެމްޕިއަންކަން ކަނޑައެޅިގެންދާއިރު، ލަނޑުގެ ތަފާތަށް ނުވަތަ ޖަހާފައިވާ ލަނޑުގެ އަދަދަށް ބަލަންޖެހުމަކީ އެކަށީގެންވާ ކަމެއްކަން ފާހަގަކުރަމުން އަޓޭޓާ ބުނީ، ތިން ލަނޑުގެ ތަފާތަކުން މޮޅުވުމަކީ މިވަގުތަށް ލިބުނު ބޮޑު ހިތްހަމަ ޖެހުމެއްކަމަަށެވެ.

އާސެނަލްގެ ކޯޗް  މިކެލް އަޓޭޓާ.. ފޮޓޯ: އާސެނަލް

އާސެނަލުން ފްލަމް ބަލިކޮށް ތާވަލްގެ އެއްވަނާގައި ތިން ޕޮއިންޓްގެ ލީޑެއް ނެގިއިރު، އެޓީމް ތާވަލްގެ އެއްވަނާގައި އޮތީ މެންޗެސްޓަރ ސިޓީއަށްވުރެ ދެމެޗް އިތުރަށް ކުޅެގެންނެވެ. ލީގުގައި އާސެނަލް އަށް ބާކީ ތިން މެޗު އޮތް އިރު، ދެ މެޗު މަދުން ކުޅެފައިވާ ސިޓީ އަށް ބާކީ ފަސް މެޗު އެބައޮތެވެ. 

ޕޮއިންޓް ތާވަލް

މީގެ ދެ ހަފުތާ ކުރިން ބޯންމައުތާއި ސިޓީ އަތުން ބަލިވެ، 209 ދުވަހަށް ފަހު ފުރަތަމަ ފަހަރަށް އާސެނަލް އެއްވަނައިން ވެއްޓުނެވެ. ނަމަވެސް އޭގެ ފަހުން ނިއުކާސަލް އާއި ފުލަމް ބަލިކޮށް، ޗެމްޕިއަންސް ލީގު ސެމީ ފައިނަލުގެ ފުރަތަމަ ލެގުގައި އެޓްލެޓިކޯ މެޑްރިޑާ އެއްވަރުކޮށް، އާސެނަލް ވަނީ ވަރުގަދަ ނަތީޖާތަކެއް ހޯދައިފައެވެ.