ތިމާވެށި ހިމާޔަތްކުރުމާއި، ފަތުރުވެރިކަމުގެ ދާއިރާއިން ރާއްޖެއާއި ލަންކާއާ ދެމެދު އޮންނަ ގުޅުން އިތުރަށް ބަދަހިކުރުމަށް މަޝްވަރާކުރައްވައިފިއެވެ.
މިދިވެހިރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިހާރު ސްރީލަންކާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، އެ ޤައުމުގެ މިނިސްޓަރ އޮފް ފޮރިން އެފެއާޒް، ފޮރިން އެމްޕްލޯއިމަންޓް އެންޑް ޓޫރިޒަމް، ވިޖިތަ ހެރަތު، ރައީސުލްޖުމްހޫރިއްޔާގެ އަރިހަށް އިޙުތިރާމްގެ ޒިޔާރަތެއް ކުރައްވައިފިއެވެ.
މި ބައްދަލުކުރެއްވުން އޮތީ މިއަދު ސްރީލަންކާގައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ އާއި ސްރީލަންކާގެ މިނިސްޓަރ ވަނީ ދިވެހިރާއްޖެ އާއި ސްރީލަންކާ އާއި ދެމެދު އޮތް ޒަމާންވީ ސިޔާސީ ގުޅުމުގެ މައްޗަށް އަލިއަޅުއްވާލައްވާފައެވެ. މި ގުޅުމަކީ ދެ ޤައުމުގެ ރައްޔިތުންގެ މެދުގައި އޮތް އެކުވެރިކަމާއި، އެއްބަޔަކު އަނެއްބަޔަކަށް ކުރާ އިޙުތިރާމާއި، ހިއްސާކުރާ އެއްގޮތް އުސޫލުތަކުގެ މައްޗަށް ބިނާވެފައިވާ ގުޅުމެއްކަން ރައީސް މުއިއްޒު އަދި މިނިސްޓަރ ފާހަގަކުރެއްވިއެވެ.
އަދި ދެ ޤައުމަށް ފައިދާހުރި ދާއިރާތަކުން ގުޅުން ބަދަހިކުރުމަށްޓަކައި ކުރެވެން ހުރި މަސައްކަތްތަކުގައި ދެމިތިއްބަވާނެކަމުގެ ޔަޤީންކަން ރައީސް މުއިއްޒު އަދި މިނިސްޓަރ ވަނީ ދެއްވާފައެވެ.
މީގެ އިތުރުން، ތަރައްޤީގެ މުހިންމު ދާއިރާތަކުން ގުޅުން ވަރުގަދަކުރުމާ ގުޅޭ ގޮތުން ރައީސް މުއިއްޒު އަދި މިނިސްޓަރ މަޝްވަރާ ކުރެއްވިއެވެ. ޚާއްޞަގޮތެއްގައި ތިމާވެށި ހިމާޔަތްކުރުމާއި، ފަތުރުވެރިކަމުގެ ދާއިރާ އަދި ވިޔަފާރީގެ ދާއިރާއިން އިތުރަށް ގުޅުން ބަދަހިކޮށް، އެކުގައި މަސައްކަތްކުރުމާ ގުޅޭ ގޮތުން ރައީސް މުއިއްޒު އަދި ސްރީލަންކާގެ މިނިސްޓަރ ފުޅާ ދާއިރާއެއްގައި ވާހަކަފުޅު ދެއްކެވިއެވެ.
ރައީސުލްޖުމްހޫރިއްޔާ އާއި ފަސްޓް ލޭޑީ ސްރީލަންކާއަށް ކުރައްވާ މި ފުރަމާނަ ދަތުރުފުޅަކީ އެ ޤައުމުގެ ރައީސް އަނޫރާ ކުމާރަ ދިސާނަޔަކަގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅު ކުރިއަށްދާނީ 2026 މޭ 3 އިން 6 އަށެވެ.
Advertisement
This content is created and paid for by advertisers and does not involve Voice Journalists
