މިފަހަރު ރާއްޖޭގެ ހައްޖު މިޝަނުގައި ހިމެނިވަޑައިގަންނަވާ ބޭފުޅުން މައްކާއަށް ދިއުމަށް ސައުދީއަށް ފުރައިފިއެވެ.
އިސްލާމިކް މިނިސްޓްރީން ބުނީ ހައްޖު މިޝަނުގައި ހިމެނިވަޑައިގަންނަވާ ބޭފުޅުން މައްކާއަށް ދިއުމަށް ފުރާފައިވާ ކަމަށައި، ހައްޖު މިޝަނުގައި 10 ބޭފުޅުން ހިމެނިވަޑައިގަންނަވާކަމަަށެވެ. މައްކާއަށް ދިއުމަށްފަހު ހައްޖު މިޝަނުގެ ޒިންމާއަކަށްވާނީ ރާއްޖެއިން މިފަހަރު ހައްޖަށްދާ މީހުންނަށް ހަމަޖައްސަންޖެހޭ އެންމެހާ އިންތިޒާމްތައް ހައްމަޖައްސާފައިވޭތޯ ބަލައި ޔަގީންކުރުމެވެ.
އެގޮތުން ހައްޖުވެރިންގެ ދަތުރުފަތުރުގެ ކަންކަމާއި ކެއިން ބުއިމާއި، މަޝާޢިރުތަކާއި އަދި ސިއްހީކަންކަން މީގެ ތެރޭގައި ހިމެނެއެވެ.
މިފަހަރުގެ ހައްޖު މޫސުމުގައި އިސްލާމިކް މިނިސްޓްރީން މައްކާގައި ޤާއިމު ކުރާ ދިވެހި ޙައްޖުވެރިންގެ ކަންކަމާ ބެހޭ އޮފީހުގެ ވެރިޔަކީ މޯލްޑިވްސް ޒަކާތު ހައުސްގެ ޑިރެކްޓަރ ޖެނަރަލް، އައްޝައިޚް އިމްތިޠާއު ޢައްބާސް އެވެ. ހައްޖު ވެރިންގެ އިސް ޝެއިޚަކަށް ވަޑައިގަންނަވާނީ އިސްލާމީ ފަތުވާދޭ އެންމެ މަތީ މަޖިލީހުގެ މެންބަރު ޑރ. އިލްޔާސް ޙުސައިން އެވެ.
ހައްޖު މިޝަނުގައި ހިމެނިވަޑައިގަންނަވާ ބޭފުޅުން މައްކާއަށް ފުރިއިރު ހައްޖު ކޯޕަރޭޝަނުންވެސް ވަނީ އެޑްވާންސްޓީމް މައްކާއަށް ފުރުވާލާފައެވެ. މިކަމާ ގުޅޭގޮތުން ހައްޖު ކޯޕަރޭޝަނުގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވީ، އެޑްވާންސްޓީމްގެ މަސައްކަތަކަށް ވާނީ މިމަހުގެ 15 ވަނަ ދުވަހު ފުރާ ހައްޖުވެރިންގެ ފުރަތަމަ ގްރޫއްޕު ސަޢުދީ ޢަރަބިއްޔާއަށް ޒިޔާރަތްކުރާއިރު، ރާއްޖެއިން ފުރިހަމަކުރަންޖެހޭ ކަންތައްތައް ޔަގީންކުރުން ކަމަށެވެ.
ހައްޖު ކޯޕަރޭޝަނުން މިހާރު ވަނީ ހައްޖަށް ތައްޔާރުވުމަށްޓަކައި ކުރަންޖެހޭ މައިގަނޑު ހުރިހާ ކަމެއްހެންކޮށް ނިންމާފައެވެ.
Advertisement
This content is created and paid for by advertisers and does not involve Voice Journalists
