ކޯޓުން ކަންކަން ނިންމުމަކީ އެމްޑީޕީގެ ސިފައެއް ނޫން ކަމަށް ވިދާޅުވެ އެމްޑީޕީގެ ޗެއާސަޕާން އިންތިހާބަށް އެ ޕާޓީން ނެރުނު ޓައިމްލައިން ބާތިލު ކުރަން ހުށައެޅި މައްސަލައާ ދެކޮޅުކަން ޗެއާޕާސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވިދާޅުވެއްޖެ އެވެ.
އެމްޑީޕީގެ ޗެއާސަޕާން އިންތިހާބަށް އެ ޕާޓީން ނެރުނު ޓައިމްލައިން ބާތިލު ކުރަން ސިވިލް ކޯޓަށް މައްސަލަ ހުށައެޅީ ގާނޫނީ ވަކީލު އަބްދުﷲ ޝާއިރެވެ. އޭނާ އެ މައްސަލަ ހުށައެޅީ ޕާޓީގެ އަސާސީ ގަވާއިދާ ހިލާފު ކަމަށް ވިދާޅުވެ އެވެ.
މިއަދު އޮތް ނޫސްވެރީންގެ ބައްދަލްވުމުގައި މީކާއީލް ވިދާޅުވީ އެމްޑީޕީއަކީ ވޯޓުން ކަންކަން ނިންމާ ޕާޓީއެއް ކަމަށެވެ. މެންބަރުންގެ އާންމު ވިސްނުމަކީ އެއީ ކަމަށްވެސް ވިދާޅުވި އެވެ. އަދި ވިދާޅުވީ ކޯޓުން ކަންކަން ނިންމުމަކީ އެމްޑީޕީގެ ސިފައެއް ނޫން ކަމަށެވެ.
މީކާއީލް ވިދާޅުވީ ކޯޓަށް ގޮސް ގައިޑްލައިން ބަދަލުކުރަން އުޅުމަކީ ގަބޫލުކުރެވޭނެ ކަމެއް ނޫން ކަމަށެވެ.
"މެޗު ކުޅެން ފަށާފަ ގޯލް ޕޯސްޓް ބަދަލުކުރުމަކީ އަޅުގަނޑު ގަބޫލުކުރާ އުސޫލެއް ނޫން," މީކާއީލް ވިދާޅުވި އެވެ.
މީގެ އިތުރުން މީކާއީލް ވަނީ ކޯޓުން ގައިޑްލައިން ބަދަލުކުރަން މަސައްކަތް ކުރުމަކީ ބޭނުމަކީ އިންތިހާބުފަސްކުރުން ކަމުގައި ވިދާޅުވެފަ އެވެ. އެކަމުގެ ފަހަތުގައި އޮތީ ވާދަަވެރީން ކަމުގައިވެސް ތުހުމަތު ކުރެއްވި އެވެ.
އެމްޑީޕީ މެންބަރުން ތިބީ އެ ފުރުސަތު ދޭ ގޮތަށް ނޫން ކަމުގައި މީކާއީލް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
