ދިވެހިރާއްޖޭގެ އިގްތިސާދީ ސިނާއަތުގައި ސްރީލަންކާގެ ދައުރު ވަރަށް ބޮޑުކަމަށް އިގްތިސާދީ ވަޒީރު މުހައްމަދު ސައީދު ވިދާޅުވެއްޖެއެވެ.

ސްރީލަންކާގައި މިއަދު ފެށި މޯލްޑިވްސް ބިޒްނަސް ފޯރަމް ހުޅުވުމުގެ ރަސްމިއްޔާތުގައި ވާހަކަދައްކަވަމުން އިގްތިސާދީ ވަޒީރު ސައީދު ވިދާޅުވީ، ރާއްޖެއާ އަވައްޓެރި ލަންކާ އާ ދެމެދު އޮތް ގުޅުމުގެ ވާހަކަ ދައްކާއިރު، ރާއްޖޭގެ އިގްތިސާދުގައި އެޤައުމުގެ ބައިވެރިވުން ނުހަނު ބޮޑުކަމަށެވެ. އެގޮތުން ރާއްޖޭގެ މާލީ ދާއިރާއާއި، ފަތުރުވެރިކަމާއި، ދަތުރުފަތުރާއި، އުފެއްދުންތެރިކަމުގެ ދާއިރާގައި ލަންކާގެ ކުންފުނިތަކުގެ ދައުރު ވަރަށް ބޮޑުކަން ވަޒީރުގެ ވާހަކަފުޅުގައި ވިދާޅުވިއެވެ.

ވަޒީރު ވިދާޅުވީ، ރާއްޖެއާ ސްރީލަންކާ އާ ދެމެދު ގާއިމްވެފައި އޮތީ ހަމައެކަނި ވިޔަފާރީގެ ގުޅުމުގެ މައްޗަށް ބިނާވެފައިވާ ގުޅުމެއް އެކަނި ނޫންކަމަށެވެ. މިއީ ދެ ޤައުމުގެ ދެމެދުގައި އޮތް އިތުބާރާއި ގާތްކަމުގެ ނިޝާނެއްކަން ފާހަގަކުރައްވަމުން ސައީދު ވިދާޅުވީ، މުސްތަޤްބަލުގައި މި ގުޅުން މިއަށްވުރެ ބޮޑަށް ފުޅާކުރުމުގެ ފުރުޞަތު އެބައޮތްކަމަށެވެ.

ސްރީލަންކާގެ ވިޔަފާރިވެރިންނާ މުހާތަބުކުރައްވައި އިގްތިސާދީ ވަޒީރު ސައީދު ވިދާޅުވީ، ރާއްޖެއާއި ލަންކާ އާ ދެމެދު އިގްތިސާދީގޮތުން އެކި ދާއިރާތަކުން ކުރިއަށް ދިއުމުގެ ފުރުސަތު އެބައޮތްކަމަށެވެ. އެގޮތުން ރާއްޖެއާއި ލަންކާއާ ގުޅިގެން މަސްވެރިކަމާއި ލޮޖިސްޓިކްސް ފަދަ ދާއިރާތަކުން ބައިނަލްއަޤްވާމީ ބާޒާރުގައި ކުރިއެރުން ހޯދިދާނެކަމަށް ވަޒީރުގެ ވާހަކާގައި ފާހަގަކުރެއްވިއެވެ. 

މީގެ އިތުރުން ޒަމާނީ ޓެކްނޮލޮޖީ އާއި ތިމާވެށީގެ ރޮނގުންވެސް ދެ ޤައުމު ގުޅިގެން ކުރިއަށްދެވިދާނެކަން ވަޒީރު ވިދާޅުވިއެވެ.

ވަޒީރު ވިދާޅުވީ މި ފޯރަމަކީ ހަމައެކަނި ވާހަކަދައްކާލުމަށް ލިބޭ ފުރުސަތެއް ނޫންކަމަށާއި މިއީ ޢަމަލީ މަސައްކަތްތަކެއް ފެށުމަށް ލިބޭ ފުރުޞަތެއްކަމަށެވެ. އަދުގެ ސަރުކާރުގެ އަމާޒަކީ އިންވެސްޓަރުންނަށް ފަހި މާޙައުލެއް ޤާއިމުކޮށްދީ، ރާއްޖެއަކީ ވިޔަފާރިއަށް ހުޅުވާލެވިފައިވާ ޤައުމެއްކަން ހާމަކޮށްދިނުންކަމަށްވެސް ވަޒީރުގެ ވާހަކަފުޅުގައި ވިދާޅުވިއެވެ.