ބޭންކް އޮފް މޯލްޑިވްސް (ބީއެމްއެލް) އިން ދާދި ފަހުން އިޢުލާނުކުރި ފޮރިން ކަރެންސީއާ ގުޅޭ ފިޔަވަޅުތަކަކީ ޒާތީ ބޭނުންތަކަށާއި ޢާންމު ޟަރޫރީ ބޭނުންތަކަށް ބޭރު ފައިސާ ހަމަހަމަ ގޮތެއްގައި ފޯރުކޮށްދިނުމަށް އެޅި ފިޔަވަޅުތަކެއް ކަމަށް އެ ބޭންކުން ބުނެފިއެވެ.

ބީއެމްއެލްގެ ސްޕޯކްސްޕާސަން މުޙައްމަދު ސަޢީދު އެކްސްގައި ކުރެއްވި ޕޯސްޓެއްގައި ވިދާޅުވީ، ކާޑުތަކުގެ ބޭރު ފައިސާ ޚަރަދުކުރެވޭ ލިމިޓް ނަހަމަ ގޮތުގައި ބޭނުންކުރުން ހުއްޓުވުމަށް، އިންޓަނޭޝަނަލް ކާޑް ޓްރާންސެކްޝަންތައް ހެދޭނީ ކާޑް ހޯލްޑަރު ރާއްޖެއިން ބޭރުގައި ހުންނައިރު އެކަނި ކަމަށް ކަނޑައަޅާފައިވާ ކަމަށެވެ.

އަދި ބައެއް އޮންލައިން ޝޮޕިން ޕްލެޓްފޯމްތައް ވިޔަފާރި ބޭނުންތަކަށް ބޭނުންކޮށް، މަދު ބަޔަކަށް ގިނަ ޢަދަދެއްގެ ޑޮލަރު ވިއްކެމުންދިޔަ މައްސަލައަށް ޙައްލެއްގެ ގޮތުން، ޑެއިލީ އެލޮކޭޝަން ބަޖެޓެއް ތަޢާރަފްކޮށް ގިނަ ބަޔަކަށް ޙައްޤު ޒާތީ ބޭނުންތަކަށް ފައިސާ ލިބޭނެ ގޮތް ހަމަޖައްސާފައިވާ ކަމަށް ވެސް އެ ބޭންކުން ބުންޏެވެ.

މީގެ އިތުރުން ކުދި އަދި މެދު ފަންތީގެ ވިޔަފާރިތަކާއި އެހެނިހެން ވިޔަފާރިތަކުން ބޭރަށް ފައިސާ ފޮނުވުމަށް ޔޫއެސް ޑޮލަރު ގަތުމުގެ ޕްރޮސެސް ހަރުދަނާކޮށް، ފުޅާ ދާއިރާއެއްގެ ވިޔަފާރިތަކަށް ފައިސާ ލިބޭނެ ގޮތް ހަމަޖައްސާފައިވާ ކަމަށް ބީއެމްއެލުން ބުންޏެވެ.

އަދި ޓެލެގްރެފިކް ޓްރާންސްފާ (ޓީޓީ) ޓްރާންސެކްޝަންތައް ބައިބައިކޮށްގެން ގިނަ ޢަދަދެއްގެ ޑޮލަރު ހޯދަން ކުރާ މަސައްކަތް ދެނެގަނެވޭނެ ކަމަށާއި، ހުރިހާ ވިއްކުމެއް ވެސް ހުންނާނީ ކަނޑައެޅިފައިވާ ލިމިޓްގެ ތެރޭގައި ކަމަށް ވެސް އެ ބޭންކުން ހާމަކުރިއެވެ.

ދަރިވަރުންނަށް މަހަކު 1،200 ޑޮލަރުގެ މަތީ ލިމިޓެއް ލިބެމުންދާނެ ކަމަށާއި، މިހާރު މައިންބަފައިންގެ ކާޑު ބޭނުންކުރާ ދަރިވަރުންނަށް ތިން މަސް ދުވަހުގެ މުއްދަތެއް ދެވޭނެ ކަމަށާއި، އެ މުއްދަތުގައި ދަރިވަރުންނަށް ޚާއްޞަ މަތީ ލިމިޓް ހިމެނޭ ކާޑު ދޫކުރެވޭނެ ކަމަށް ބީއެމްއެލުން ބުންޏެވެ.

މީގެ އިތުރުން ޔޫއެސް ޑޮލަރު ޑެބިޓް އަދި ކްރެޑިޓް ކާޑުތައް ޒާތީ އަދި ވިޔަފާރި ބޭނުންތަކަށް ބޭނުންކުރުމުގައި އެއްވެސް ހިފެހެއްޓުމެއް ނެތް ކަމަށާއި، ޑެބިޓް ކާޑުގެ ޕީއޯއެސް ފޮރިން ސްޕެންޑް ލިމިޓް މަހަކު 1،000 ޑޮލަރަށް ބަދަލެއް ނައިސް ދެމި އޮންނާނެ ކަމަށާއި، ދަތުރުފަތުރާއި ބޭސްފަރުވާއަށް މަހަކު 3،000 ޑޮލަރާ ހަމައަށް ބޭނުންކުރެވޭނެ ކަމަށް ވެސް އެ ބޭންކުން ބުންޏެވެ.