ފ.ފީއަލީގައި ފަޅު ތެރޭގައި އޮތް ތެޔޮ ބޯޓެއްގައި ރޯވެ މިދިޔަ މަހުގެ 9 ވަނަ ދުވަހު ހިނގި ނުރައްކާތެރި އަލިފާނުގެ ހާދިސާގައި ފިހި، ބޮޑެތި އަނިޔާތަކެއް ލިބިގެން، އައިޖީއެމްއެޗްގައި ފަރުވާ ދެމުންދިޔަ ބިދޭސީ މީހާ ނިޔާވެއްޖެއެވެ.

މި ހާދިސާގައި އެ ތެޔޮ ބޯޓުގައި މަސައްކަތް ކުރަމުންދިޔަ ބަންގްލަދޭޝްގެ ރައްޔިތެއް ކަމަށްވާ އުމުރުން 40 އަހަރުގެ ޑެލޯވާ އެވެ. އޭނާ ނިޔާވީ އައިޖީއެމްއެޗްގެ އައިސީޔޫގައި ވެންޓިލޭޓަރުގެ އެހީގައި ފަރުވާ ދެމުން ދަނިކޮށް މި މަހުގެ 4 ވަނަ ދުވަހުއެވެ.

ނިލަންދޫ ހޮސްޕިޓަލުން މައުލޫމާތު ދީފައިވާ ގޮތުގައި، އެ މީހާ މާލެ ފޮނުވާލިއިރު ހަށިގަނޑުގެ 60 އިންސައްތަ އޮތީ އަލިފާނުގެ ސަބަބުން ފިހިފައެވެ. 

އޭނާގެ ހަށިގަނޑު އިއްޔެ ވަނީ ބަންގްލަދޭޝްއަށް ފޮނުވާފައެވެ. 

ފ.ފީއަލީ ބަނދަރުގައި އޮތް ތެޔޮ ބޯޓެއްގައި ރޯވެ ހިނގި އަލިފާނުގެ ހާދިސާގައި ބޯޓުގައި ރޯވެގެން ފުލުހުންނަށް ރިޕޯޓް ކުރީ މިމަހު 9 ވަނަ ދުވަހު ހެނދުނު 9:15 ގައެވެ. 

ފީއަލީގައި ހުރި މީހަކު ”ވޮއިސް“ އަށް މައުލޫމާތު ދީފައިވާގޮތުން، މި ހާދިސާ ހިނގި އިރު ބޯޓުގައި ދެމީހުން ތިއްބެވެ. އެތަނުން އެކަކު ފިހިފައިވާއިރު، ބޯޓުގައި އަލިފާން ރޯވުމާއެކު ދެމީހުންވެސް މޫދަށް ފުންމާލީއެވެ. 

މި އަލިފާންގަނޑު ކޮންޓްރޯލްކޮށް ނިއްވާލެވުނީ ރޯވިތާ ތިން ގަޑިއިރަށްވުރެ ގިނައިރު ވީފަހުންނެވެ. މި ހާދިސާގައި ތެޔޮ އުފުލާ ދޯނީގެ އިތުރުން ފާނަ މަސްވެރިކަން ކުރާ ދެ ދޯންޏަކާއި ރަށުގެ އައިސްޕްލާންޓް ވަނީ ބޭނުންނުކުރެވޭ ވަރަށް އަނދާފައެވެ.