ސިފައިންނާއި އެ މީހުންގެ އާއިލާތަކުން ދިރިއުޅޭ ބަނޑޭރި ކޮށިގައި ހިންގަން ހަމަޖެހިފައިވާ ހައުސިން މަޝްރޫއު ކުރިއަށް އޮތް 8 މަސްތެރޭ ފެށޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ދިވެހި ސިފައިންގެ 134 ވަނަ އަހަރީ ދުވަހުގެ މުނާސަބަތުގައި، ކަޅުތުއްކަލާކޮށީގައި މިރޭ ބޭއްވި ރަސްމީ ޖަލްސާގައި ވާހަކަފުޅުދައްކަވަމުންނެވެ.
މިރޭގެ ޖަލްސާގައި ރައީސް ވިދާޅުވީ ބޯހިޔާވަހިކަމަކީ ދިވެހި ކޮންމެ ރައްޔިތެއްގެވެސް އަސާސީ އެއް ހައްގަކަށް ވާހިނދު، ދިވެހި ސިފައިންނަށްވެސް މި ހައްގު ފުރިހަމަވާންޖެހޭ ކަމަށެވެ. އެގޮތުން ސިފައިންނާއި އެ މީހުންގެ އާއިލާތަކުން ދިރިއުޅޭ ބަނޑޭރި ކޮށިގައި ހިންގަން ހަމަޖެހިފައިވާ ހައުސިން މަޝްރޫއު ފެށުމަށް ތައްޔާރުވަމުންދާ ކަމަށް ރައީސް ވިދާޅުވި އެވެ.
މިއީ ރައީސް މުޢިއްޒުގެ ރިޔާސީ ވައުދުފުޅެކެވެ. ރައީސް މިރޭ ވިދާޅުވީ އަމާޒަކީ ކުރިއަށް އޮތް 8 މަސްތެރޭ އެ މަޝްރޫއު ފެށުން ކަމަށެވެ.
ބަނޑޭރި ކޮށްޓަކަކީ ވަރަށް ބޮޑު ސަރަހައްދެކެވެ. އެ ސަރަހައްދުގައި ހަދާފައިވާ ގެތަކުގައި ސިފައިންގެ އާއިލާތަކުން ދިރިއުޅޭތާ އެތައް އަހަރެއް ވެއްޖެ އެވެ. މިއީ ކުރީގެ ރައީސް މައުމޫންގެ ދުވަސްވަރު އިމާރާތް ކޮށްފައިވާ ގެތަކެކެވެ.
މީގެ އިތުރުން ރައީސް ވިދާޅުވީ ސަރުކާރުގެ ހައުސިންގް ސްކީމްތަކުގެ ތެރެއިން، އަސާސީ ބޯހިޔާވަހިކަން ލިބޭ ސިފައިންގެ ޢަދަދު ވެސް އިތުރުކޮށް ދެއްވާނެކަމަށެވެ.
Advertisement
This content is created and paid for by advertisers and does not involve Voice Journalists
