މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ހަކަތައިގެ އަގު އުފުލެމުންދާތީ، ރައްޔިތުން އިގުތިސާދު ކުރުމުގެ ވަރުގަދަ ފިޔަވަޅުތަކެއް އެޅުމަށް އިންޑިއާގެ ބޮޑުވަޒީރު ނަރެންދުރަ މޯދީ ގޮވާލައިފިއެވެ.

އާދިއްތަ ދުވަހު އިންޑިއާގެ ދެކުނުގެ ސިޓީއެއް ކަމަށްވާ ހައިދަރުއާބާދުގައި ބޭއްވި  ރަސްމިއްޔާތެއްގައި ވާހަކަދައްކަމުން މޯދީ ވަނީ، ކޮވިޑް-19 ގެ ދުވަސްވަރު އަމަލުކުރި ފަދައިން ގޭގައި ތިބެގެން މަސައްކަތް ކުރަން އަލުން ފެށުމަށާއި، ރަން ގަތުން މަދުކުރުމުގެ އިތުރުން ބޭރު ގައުމުތަކަށް ކުރާ ދަތުރުތައް މަދުކުރުމަށް ރައްޔިތުންގެ ކިބައިން އެދިފައެވެ.

އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން، ދުނިޔޭގެ ތެލުގެ ވިޔަފާރީގެ މައި މަރުކަޒެއް ކަމަށްވާ ހޯރްމޫޒް ކަނޑުއޮޅި ބަންދުވެފައި އޮންނާތާ މިހާރު ދެ މަސް ދުވަހަށް ވުރެ ގިނަ ދުވަސް ވެފައިވާއިރު، އިންޑިއާއަކީ އެގައުމަށް ބޭނުންވާ ތެލުގެ 90 އިންސައްތަ އިމްޕޯޓްކުރާ ގައުމެކެވެ.

"ގައުމުދެކެ ލޯބިވުމަކީ ހަމައެކަނި ބޯޑަރުގައި ފުރާނަ ގުރުބާންކުރުމެއް ނޫން. މިފަދަ ދަނޑިވަޅެއްގައި ޒިންމާދާރުކަމާއެކު ދިރިއުޅުމާއި، ދުވަހުން ދުވަހަށް ގައުމަށްޓަކައި އަދާކުރަންޖެހޭ ވާޖިބުތައް ފުރިހަމަކުރުމަކީ ވެސް ގައުމީ ލޯބި،" މޯދީ ބުންޏެވެ.

މީގެ އިތުރުން، ތެޔޮ ސަލާމަތްކުރުމަށްޓަކައި މެޓްރޯ ފަދަ އާންމު ދަތުރުފަތުރުގެ ނިޒާމު ބޭނުންކުރުމަށާއި، އަމިއްލަ ވެހިކަލްތަކުގައި ދަތުރުކުރާއިރު ގިނަ މީހުން އެކުގައި ދަތުރުކުރުމަށްވެސް އެދުނެވެ. އަދި ދަނޑުވެރިން ބޭނުންކުރާ ކެމިކަލް ގަސްކާނާގެ މިންވަރު ދެބައިކުޅަ އެއްބަޔަށް މަދުކުރުމަށްވެސް އިލްތިމާސްކުރިއެވެ.

ބޮޑުވަޒީރުގެ މި ވާހަކައާ ގުޅިގެން އިންޑިއާގެ ހިއްސާގެ ބާޒާރަށް ވަނީ ބޮޑު ލޮޅުމެއް އަރާފައެވެ. ހޯމަ ދުވަހުގެ ހެނދުނު ބާޒާރު ހުޅުވުނުއިރު 'ސެންސެކްސް' އިންޑެކްސް ވަނީ 1،000 ޕޮއިންޓަށް ވުރެ ބޮޑަށް ދަށަށް ގޮސްފައެވެ. އަދި އިންޑިއާގެ ފައިސާ (ރުޕީ) ގެ އަގުވެސް ވަނީ ރެކޯޑް މިންވަރަކަށް ދަށްވެފައެވެ.

އިގުތިސާދީ މާހިރުން ބުނާ ގޮތުގައި، މޯދީގެ މި އިއުލާނަކީ ކުރިއަށް އޮތް ތަނުގައި ތެލުގެ އަގު ބޮޑުވުމަށް ނުވަތަ ހަކަތަ ބޭނުންކުރުން ކޮންޓްރޯލް ކުރުމަށް ސަރުކާރުން ނެރޭނެ ހަރުކަށި އަމުރުތަކެއްގެ އިޝާރާތެކެވެ. މިހާރުވެސް މި ހާލަތުގެ ސަބަބުން އިންޑިއާގެ ބައެއް ސިނާއަތްތަކުން އެތައް ލައްކަ ވަޒީފާއެއް ގެއްލުމުގެ ބިރު ވަނީ އުފެދިފައެވެ.