މިއަހަރު ޙައްޖުގެ މަތިވެރި އަޅުކަން އަދާކުރުމަށް މައްކާއަށްދާ ޙައްޖުވެރިންނަށް މަރުޙަބާ ކިޔުމަށް ވާންޖެހޭ ތައްޔާރީތަކުގެ ގިނަ މަސައްކަތްތައް ނިންމާލައިފިއެވެ. 

ޙައްޖު ކޯޕަރޭޝަނުން ބުނީ، ޙައްޖާޖީންނަށް މަރުޙަބާ ކިޔުމުގެ ގޮތުން، ދިވެހިން ތިބޭ ހޮޓަލުގެ ބޭރުގައި ބެނާތައް ދަމައި، ޙައްޖުވެރިންނަށް އިރުޝާދުތައް ދިނުމަށް ތަތްކުރަންޖެހޭ އެކިއެކި ޕޯސްޓަރުތައް ތައްކުރުމުގެ މަސައްކަތް ކުރެވިފައިވާ ކަމަށެވެ. 

އެގޮތުން، ހޮޓެލުގެ ލިފްޓުން ފައިބާއިރު، ޙައްޖުވެރިންނަށް ކޮންމެހެން ބޭނުންވާ މައުލޫމާތުތައް ހިމެނޭ ޕޯސްޓާރެއް ހަރުކޮށްފައިވާއިރު، އެ ޕޯސްޓަރުގައި، މުހިންމު އެކިއެކި ނަންބަރުތަކާއި، ތަންތަން ހުންނަ ތަނާއި، އެތަނުން ޚިދުމަތް ލިބޭ ވަގުތު ތަކާއި، ނަމާދު ވަގުތުތައްވެސް އެނގެން ހުރެއެވެ. 

އަދި ޙައްޖާޖީން ތިބޭ ކޮޓަރީގެ ބޭރުގައި އެ ކޮޓަރިއެއްގައި ތިބޭ ޙައްޖާޖީންގެ ނަންވެސް ތަތްކޮށްފައިވާއިރު، ކޮޓަރިތަކާއި ފާޚާނާގެވެސް އާބާތުރަ ވަނީ ފިލުވައި ނިންމާފައެވެ. އެ ކޮޓަރިތަކުގައި ތަންމަތި އަޅައި، ފެން ފަދަ ތަކެތިވެސް މިހާރު ވަނީ ބަހައްޓައި ތައްޔާރީތައް ގާތްގަނޑަކަށް ނިންމާލާފައެވެ. 

ޙައްޖު ކޯޕަރޭޝަނުން މީގެ ކުރިން ބުނެފައިވާގޮތުން، މައްކާ ހޮޓެލުގެ ހުރިހާ ކޮޓަރިތަކެއްގެ ކާޕެޓު ބަދަލުކޮށް، މޭޒާއި އެނދު ބަދަލުކޮށް، ފާޚާނާތަކުގެ ޓައިލްސް ބަދަލުކުރުންފަދަ ކަންކަން ވަނީ ކޮށްފައެވެ. އެގޮތުން ޖުމްލަ 355 ކޮޓަރީގެ ހޮޓަލުގެ ހުރިހާ ކޮޓަރިއަކަށް ވެސް ވަނީ ބަދަލުތަކެއް ގެނެސްފަ އެވެ.

މީގެ އިތުރުން ހޮޓަލުގެ ލޮބީ އޭރިއާއަށްވެސް ބަދަލުތަކެއް ގެނެސްފައިވެެެ އެވެ. އެގޮތުން ޙާޖީން މަޑުކޮށްލައިގެން ތިބުމަށް ސޯފާތައް ވަނީ އައުކޮށްފަ އެވެ. އަދި ޙާޖީންނަށް ދީނީ އަދި އެނޫންވެސް އިރުޝާދުތައް ދިނުމަށް ކޮންފަރެންސް ހޯލެއްވެސް މިހާރުވަނީ ހޮޓަލުގައި ޤާއިމްކޮށްފަ އެވެ.

ފުރަތަމަ ގުރޫޕް: ފުރުން 15 މެއި - އެނބުރި ރާއްޖެ އައުން ޖޫން 5 ގައި / ދަތުރުކުރާނީ ސައުދީ އެއާގައި

ދެވަނަ ގުރޫޕް: ފުރުން 17 މެއި - އެނބުރި ރާއްޖެ އައުން ޖޫން 7 ގައި / ދަތުރުކުރާނީ މޯލްޑިވިއަންގައި

ތިންވަނަ ގުރޫޕް: ފުރުން 18 މެއި - އެނބުރި ރާއްޖެ އައުން ޖޫން 8 ގައި / ދަތުރުކުރާނީ ސައުދީ އެއާގައި

ހަތަރު ވަނަ ގުރޫޕް: ފުރުން 19 މެއި - އެނބުރި ރާއްޖެ އައުން ޖޫން 9 ގައި / ދަތުރުކުރާނީ މޯލްޑިވިއަންގައި 

ދިވެހި ހައްޖުވެރިން މައްކާގައި ހޭދަކުރުމަށް ހަމަޖެހިފައިވަނީ 21 ދުވަހެވެ. 

ކަލަންޑަރުގައި ވާ ގޮތުން މިއަހަރުގެ ހައްޖު ދުވަހަކީ މިމަހުގެ 26 ވަނަ ދުވަހުއެވެ.