ރައްޔިތުންގެ މަޖިލީހުގެ ނައިބު ރައީސްގެ މަގާމުން ދިއްގަރު ދާއިރާގެ މެންބަރު އަހުމަދު ނާޒިމް ވަކިކުރަން ވެރިކަންކުރާ ޕީއެންސީން ސޮއި ހަމަކުރުމަށް ފަހު މިއަދު ހުށަހަޅައިފިއެވެ.
މަޖިލީހުގެ އިދާރާއިން މިއަދު ބުނީ، މަޖިލީހުގެ ނައިބު ރައީސް ނާޒިމް މަޤާމުން ވަކިކުރުމުގެ ގަރާރެއް ލިބިފައިވާ ކަމަށާ، އެ މައްސަލަ ގާނޫނުއަސާސީއާއި ރައްޔިތުންގެ މަޖިލީހުގެ ގަވާއިދުގައިވާ ގޮތުގެ މަތިން ކުރިއަށްގެންދާނެ ކަމަށެވެ.
ގާނޫނުއަސާސީގައި ވާގޮތުން މަޖިލީހުގެ ނައިބު ރައީސް މަގާމުން ވަކިކުރަން ގަރާރެއް ހުށަހަޅާއިރު، 14 ދުވަހުގެ ނޯޓިސްއެއް ދޭން ޖެހެއެވެ. އަދި، ދިފާއުގައި ވާހަކަދެއްކުމުގެ ފުރުސަތު ވެސް ނައިބު ރައީސަށް ދޭންޖެހޭނެއެވެ. ނަމަވެސް، އެ ވޯޓުގައި ބައިވެރިއެއް ނުވެވޭނެއެވެ.
ނާޒިމް މަގާމުން ވަކިކުރުމުގެ މައްސަލަ މަޖިލިހަށް ވެއްދުމަށް ޕީއެންސީގެ ޕާލަމެންޓްރީ ގްރޫޕުން މިއަދު ވަނީ ފާސްކޮށްފައެވެ. އެއާއެކު މައްސަލަ ހުށަހެޅުމަށް މެންބަރުންގެ ސޮއި ހަމަކުރުމުގެ މަސައްކަތް ވަނީ ފަށާފައެވެ.
ނާޒިމް މަގާމުން ވަކިކުރުމުގެ މަސައްކަތް ޕީއެންސީން ފަށާފައިވާއިރު، މަޖިލީހުގެ މާލިއްޔަތު ކޮމިޓީ އާއި 241 ކޮމިޓީ ނުވަތަ ސަލާމަތީ ހިދުމަތްތަކާ ބެހޭ ކޮމިޓީންވެސް މިދިޔަ މަހު 21 ވަނަ ދުވަހު އޭނާ ވަނީ ވަކިކޮށްފައެވެ.
އަދި ޕީއެންސީގެ ރައްޔިތުންގެ މަޖިލީހުގެ މެންބަރުން ތިއްބަވާ ވަޓްސްއެޕް ގްރޫޕުންވެސް އޭނާ ވަނީ އިއްޔެ ނެރެލާފައެވެ.
އެ ގުރޫޕަކީ ރައީސް ޑރ މުޙައްމަދު މުޢިއްޒު ހިމެނިވަޑައިގަންނަވާހެން ޕީއެންސީގެ މަޖިލީސް މެންބަރުން ތިއްބަވާ ވަޓްސްއެޕް ގްރޫޕެވެ.
މީގެ އިތުރުން، މަޖިލީހުގެ މި ދައުރު މާދަން ނިމޭއިރު، މިއަދުގެ ޖަލްސާގައި ވަނީ މިމަހު 31 އަށް ދައުރު ދަންމާލާފައެވެ.
Advertisement
This content is created and paid for by advertisers and does not involve Voice Journalists
