ރައްޔިތުންގެ މަޖިލީހުގެ ނައިބު ރައީސްގެ މަގާމުން ދިއްގަރު ދާއިރާގެ މެންބަރު އަހުމަދު ނާޒިމް ވަކިކުރަން ހުށައެޅީ އޭނާ މަގާމުގެ ނުފޫޒުން ނާޖާއިޒު ފައިދާނަގައި ފިތުނަ އުފައްދާ ވަކި ފަރާތަކަށް ބުރަވެ މަސްލަހަތު ގެއްލޭގޮތަށް ތަކުރާރުކޮށް މަސައްކަތް ކުރަމުންދާތީ ކަމަށް މަގާމުން ވަކިކުރުމުގެ ގަރާރުގައި ބުނެފި އެވެ.

އެ ގަރާރުގައި ބުނެފައިވަނީ އަހްމަދު ނާޒިމްގެ އިތުބާރު ނެތް ކަމަށް ހުށައަޅަނީ މަގާމުގެ ނުފޫޒުން ނާޖާއިޒު ފައިދާނަގައި ފިތުނަ އުފައްދާ ވަކި ފަރާތަކަށް ބުރަވެ މަސްލަހަތު ގެއްލޭގޮތަށް ތަކުރާރު ކުރަމުންދާތީއާ ރައްޔިތުންގެ މަޖިލީހުގެ އެންމެހައި މަސައްކަތްތަކުގައި ވަކި ސިޔާސީ ފިކުރަކަށް ބުރަވެ ތައައްސުބުވެފައި ވުމުގެ އިތުރުން މަޖިލީހުގެ މަސްލަހަތު ގެއްލުވާލުމަށް މަޖިލީހުގެ ނާއިބު ރައީސް ހިޔްވަރުދީ ޒިންމާއިން ބަރީއަވެފައިވާތީ ކަމަށެވެ.

ނާޒިމް ވަކިކުރުމުގެ މައްސަލާގައި 72 މެންބަރުން ވަނީ ސޮއިކޮށްފަ އެވެ. މިއީ އޭނާ މަގާމުން ވަކިކުރަން ބޭނުންވާ އަދަދަށް ވުރެވެސް މާ ގިނަ އަދަދެކެވެ.

އިތުބާރު ނެތް ކަމުގެ މައްސަލަ ހުށައަޅާފައިވާ މި ދަނޑިވަޅުގައި ނާޒިމް މެލޭޝިޔާއަށް ފުރާވަޑައިގެންފައިވާ ކަމަށް ރިޕޯޓްތައް ބުނެ އެވެ. ނާޒިމްގެ އާއިލާ ދިރިއުޅެނީ މެލޭޝިޔާގަ އެވެ. މީގެ ކުރީން ވެސް ނާޒިމް ވަރަށް ގިނައިން އެ ގައުމަށް ވަޑައިގަންނަވަ އެވެ.

މަޖިލީހުގެ އިދާރާއިން މިއަދު ބުނީ، މަޖިލީހުގެ ނައިބު ރައީސް ނާޒިމް މަޤާމުން ވަކިކުރުމުގެ ގަރާރެއް ލިބިފައިވާ ކަމަށާ، އެ މައްސަލަ ގާނޫނުއަސާސީއާއި ރައްޔިތުންގެ މަޖިލީހުގެ ގަވާއިދުގައިވާ ގޮތުގެ މަތިން ކުރިއަށްގެންދާނެ ކަމަށެވެ.

ގާނޫނުއަސާސީގައި ވާގޮތުން މަޖިލީހުގެ ނައިބު ރައީސް މަގާމުން ވަކިކުރަން ގަރާރެއް ހުށަހަޅާއިރު، 14 ދުވަހުގެ ނޯޓިސްއެއް ދޭން ޖެހެއެވެ. އަދި، ދިފާއުގައި ވާހަކަދެއްކުމުގެ ފުރުސަތު ވެސް ނައިބު ރައީސަށް ދޭންޖެހޭނެއެވެ. ނަމަވެސް، އެ ވޯޓުގައި ބައިވެރިއެއް ނުވެވޭނެއެވެ.

ނާޒިމް މަގާމުން ވަކިކުރުމުގެ މަސައްކަތް ޕީއެންސީން ފަށާފައިވާއިރު، މަޖިލީހުގެ މާލިއްޔަތު ކޮމިޓީ އާއި 241 ކޮމިޓީ ނުވަތަ ސަލާމަތީ ހިދުމަތްތަކާ ބެހޭ ކޮމިޓީންވެސް މިދިޔަ މަހު 21 ވަނަ ދުވަހު އޭނާ ވަނީ ވަކިކޮށްފައެވެ.

އަދި ޕީއެންސީގެ ރައްޔިތުންގެ މަޖިލީހުގެ މެންބަރުން ތިއްބަވާ ވަޓްސްއެޕް ގްރޫޕުންވެސް އޭނާ ވަނީ އިއްޔެ ނެރެލާފައެވެ.

އެ ގުރޫޕަކީ ރައީސް ޑރ މުޙައްމަދު މުޢިއްޒު ހިމެނިވަޑައިގަންނަވާހެން ޕީއެންސީގެ މަޖިލީސް މެންބަރުން ތިއްބަވާ ވަޓްސްއެޕް ގްރޫޕެވެ.

މީގެ އިތުރުން، މަޖިލީހުގެ މި ދައުރު މާދަން ނިމޭއިރު، މިއަދުގެ ޖަލްސާގައި ވަނީ މިމަހު 31 އަށް ދައުރު ދަންމާލާފައެވެ.