ލޯކަލް ކައުންސިލް އިންތިޚާބުގައި ތ. ތިމަރަފުށީ ދާއިރާގެ ވޯޓު ކަރުދާސްތައް އަލުން ގުނުމަށް ހައިކޯޓުން ކުރި އަމުރާ ގުޅިގެން، އެ ފޮށީގެ ސެކިއުރިޓީ އުރަތައް މިއަދު ކަނޑަން ނިންމާފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އިލެކްޝަންސް ކޮމިޝަނުން މައުލޫމާތު ދޭ ގޮތުގައި، ހައިކޯޓުގެ ހުކުމާ އެއްގޮތަށް ތިމަރަފުށީ ދާއިރާގެ NT.2/480 ވޯޓު ފޮށީގެ ސެކިއުރިޓީ އުރަތައް ކެނޑުމުގެ މަސައްކަތް ކުރިއަށްދާނީ މިއަދު ހަވީރު 16:00 ގައެވެ. މި މަސައްކަތް ކުރިއަށްދާނީ އިންތިޚާބާ ބެހޭ މަރުކަޒު (ކުރީގެ ޑްރަގް ކޯޓު، ތޮއިބާ މިސްކިތް ކައިރި) ގައެވެ.

ހައިކޯޓުން މިގޮތަށް އަމުރުކުރީ، ނިމިދިޔަ ލޯކަލް ކައުންސިލް އިންތިޚާބުގެ ނަތީޖާއާ މެދު ހިތްހަމަނުޖެހިގެން، އިންތިޚާބުން ނާކާމިޔާބުވި ޕީއެންސީގެ ކެންޑިޑޭޓް މުހައްމަދު އިމާދުގެ ފަރާތުން ހުށަހެޅި އިންތިޚާބީ ޝަކުވާގެ މައްސަލަ ބެލުމަށްފަހުގައެވެ. އިމާދުގެ ފަރާތުން އެދިފައިވަނީ އިންތިޚާބު ބާތިލުކޮށް އަލުން އިންތިޚާބު ބޭއްވުމަށް ނުވަތަ އަމީނިއްޔާ ސްކޫލުގައި ހުރި ވޯޓު ފޮށި އަލުން ގުނައިދިނުމަށެވެ.

މި މައްސަލައިގައި ހައިކޯޓުގެ ތިން ފަނޑިޔާރުން ކަމަށްވާ އިސްފަނޑިޔާރު އަބްދުالله ޖަމީލް މުހައްމަދު، ފަނޑިޔާރު ހުސެއިން މަޒީދު އަދި ފަނޑިޔާރު ޢަބްދުލްމާނިޢު ޙުސައިންގެ އިއްތިފާގުން ކުރެއްވި ހުކުމުގައި ވަނީ، އިންތިޚާބު ބާތިލުކުރަންޖެހޭ ފަދަ ސަބަބެއް ނެތް ކަމަށެވެ. ނަމަވެސް، ވޯޓުލީ މަރުކަޒުގައި ފުރަތަމަ އިއުލާންކުރި ވަގުތީ ނަތީޖާއާއި އީސީގެ ވެބްސައިޓުގައިވާ ނަތީޖާއާ ދެމެދު ފަރަގުތަކެއް ހުރުމާއި، ކެންޑިޑޭޓުންނަށް އެންގުމަކާ ނުލައި ނަތީޖާ ޝީޓަށް ބަދަލުތަކެއް ގެނެސްފައިވާތީ، ވޯޓު އަލުން ގުނުމަށް ވަނީ އަމުރުކޮށްފައެވެ.