އިންޑިއާގެ ލަކްނައު ޔުނިވަރސިޓީގައި އިމްތިހާނު ކަރުދާސްތަކެއް ދޭނެ ކަމަށް ބުނެ އަންހެން ދަރިވަރަކަށް ޖިންސީ ފުރައްސާރަ ކުރި މައްސަލައެއް ފެންމަތިވެ، އެ ޔުނިވާސިޓީގެ އެސިސްޓަންޓް ޕްރޮފެސަރަކު ފުލުހުންގެ ބެލުމުގެ ދަށަށް ގެންގޮސްފިއެވެ.

މި މައްސަލާގައި ޕްރޮފެސަރު ދަރިވަރަށް ގުޅައި ދެއްކި ވާހަކަތަކުގެ އޯޑިއޯ ރެކޯޑިންތަކެއް ވަނީ އާންމުވެފައެވެ. މީގެ އިތުރުން މި މައްސަލަ ފެންމަތިވެފައިވަނީ، އިންޑިއާގެ ނީޓް އިމްތިހާނުގެ ކަރުދާސް ލީކުވެފައިވާ ދަނޑިވަޅެއްގައެވެ.

އާންމުވެފައިވާ އޯޑިއޯގައި، ޕްރޮފެސަރު ޕަރަމްޖީތު ސިންގް އެ ދަރިވަރަށް "ޑާރލިން" ގެ ނަމުން މުހާތަބުކޮށް، ދެ ކަރުދާހެއް ހޯދާފައިވާ ކަމަށް ބުނެ އޭނާއާ ބައްދަލުކުރުމަށް މަޖުބޫރު ކުރާ އަޑު އިވެއެވެ. އެ ދަރިވަރު ފިލާވަޅުތައް ދަސްކޮށް ނިމިފައިވާ ކަމަށް ބުނި ނަމަވެސް، އިމްތިހާނުގެ ހަތް ދުވަސް ކުރިން އޭނާއާ ބައްދަލުކުރަން ޖެހޭނެ ކަމަށް ބުނެ ޕްރޮފެސަރު ވަނީ އެ ދަރިވަރަށް ބާރު އަޅާފައެވެ.

މި މައްސަލައިގައި ދެ ކަމެއް ތަހުގީގު ކުރެވެމުންދާ ކަމަށް ރިޕޯޓުތައް ބުނެއެވެ. އެއީ އަންހެން ދަރިވަރަށް ކުރި ބޭއަދަބީ ފުރައްސާރައިގެ މައްސަލައާއި، އިމްތިހާނު ކަރުދާސް ލީކުވި ކަމަށް ބުނާ މައްސަލައެވެ. އިންޑިއާގައި މި ދުވަސްވަރަކީ ނީޓް އިމްތިހާނުގެ ކަރުދާސް ލީކުވި މައްސަލަ ސީ.ބީ.އައި އިން ތަހުގީގު ކުރަމުންދާ ދުވަސްވަރަކަށް ވާތީ، ކަރުދާސް ލީކުވުމުގެ މައްސަލައަށް ވަނީ ބޮޑު ސަމާލުކަމެއް ލިބިފައެވެ.

ލަކްނައު ޔުނިވަރސިޓީގެ ވައިސް ޗާންސެލަރު ޖޭ.ޕީ ސައިނީ ވަނީ 24 ގަޑިއިރުގެ ތެރޭގައި ތަހުގީގު ރިޕޯޓު ހުށަހެޅުމަށް އިންޓާރނަލް ކޮމްޕްލެއިންސް ކޮމިޓީއަށް އަންގަވާފައެވެ. މި މައްސަލައިގައި ތުހުމަތު ކުރެވޭ ޕްރޮފެސަރު ހުރިހާ ތުހުމަތުތަކަކަށް އިންކާރު ކުރަމުން ބުނެފައިވަނީ، މިއީ ޔުނިވަރސިޓީގެ އެތެރޭގެ ސިޔާސީ ކުޅިވަރެއްގެ ތެރެއިން އޭނާ ފްރޭމް ކުރުމަށް ހިންގާ އަމަލެއް ކަމަށެވެ.

މި ހާދިސާއާއި ގުޅިގެން ދަރިވަރުންގެ ޖަމިއްޔާއެއް ކަމަށްވާ އޭ.ބީ.ވީ.ޕީ އިން ވަނީ ޔުނިވާސިޓީ ކެމްޕަސްގައި މުޒާހަރާކޮށް، އެ ޕްރޮފެސަރާ މެދު ހަރުކަށި ފިޔަވަޅު އެޅުމަށް ގޮވާލާފައެވެ. ލަކްނައު ޔުނިވަރސިޓީން ބުނެފައިވަނީ މުއައްސަސާގެ އަބުރަށް ހުތުރުވާ ފަދަ އެއްވެސް އަމަލެއް ބަލައިނުގަންނާނެ ކަމަށާއި، ކުށްވެރިވާ ފަރާތްތަކަށް ހައްގު އަދަބު ދެވޭނެ ކަމަށެވެ.