މިފަހަރު ހައްޖަށްދާ ދިވެހި ހައްޖުވެރިންގެ ފަހު ފްލައިޓް މިއަދު ހެނދުނު ސައުދިއަށް ފުރައިފިއެވެ.

ހައްޖުވެރިްނގެ ފަހު ފްލައިޓް ފުރާފައިވަނީ މިއަދު ހެނދުނު 09:35 ގައެވެ. މޯލްޑިވްސް ހައްޖު ކޯޕަރޭޝަނުން ބުނީ މިއަދުގެ ފްލައިޓުން 253 ހައްޖުވެރިން ހައްޖުގެ މަތިވެރި އަޅުކަން އަދާކުރުމަށް ފުރިކަމަށެވެ. ދިވެހި ހައްޖުވެރިން މިއަދު ސައުދީއަށް ފުރާފައިވަނީ މޯލްޑިވިއަންގެ ފްލައިޓެއްގައެވެ. 

މިފަހަރު ރާއްޖެއިން ހައްޖަށްދިޔަ ފުރަތަމަ ގްރޫޕް ފުރާފައިވަނީ މިމަހުގެ 15 ވަނަ ދުވަހުއެވެ. އެ ފްލައިޓްގައި 238 މީހުން ވަނީ ހައްޖުގެ އަޅުކަމަށް ފުރިއެވެ.

ހައްޖުވެރިން ހަތަރު ފްލައިޓެއްގައި ހައްޖަށް ފުރިއިރު، މިހާތަނަށް މައްކާއަށް ދިޔަ ހައްޖުވެރިން ވަނީ އުމްރާގެ އަޅުކަން އަދާކޮށްފައެވެ. މިއަދު ސައުދީއަށް ފުރި ހައްޖުވެރިންވެސް މިއަދުގެ ވަގުތެއްގައި އުމްރާގެ އަޅުކަން އަދާކޮށް ނިންމާނޭކަމަށް ހައްޖު ކޯޕަރޭޝަނުން ވަނީ ބުނެފައެވެ. 

ކުރީ އަހަރެކޭ އެއްގޮތަށް މިފަހަރުވެސް ހައްޖުވެރިންނަށް ލުއިފަސޭހަ ކޮށްދިނުމުގެ ގޮތުން ހައްޖު ކޯޕަރޭޝަނުން ވަނީ ހާއްސަ އިންތިޒާމްތަކެއް ހަމަޖައްސައިދީފައެވެ. މިފަހަރުވެސް ޙައްޖުވެރިންނަށް މައްކާ ރޫޓުގެ ޚިދުމަތް ލިބޭއިރު، ޙައްޖުވެރިން ޖިއްދާ އެއާޕޯޓުގައި ހޭދަކުރަންޖެހޭނީ ވަރަށް ކުޑަ ވަގުތުކޮޅެކެވެ.

ހައްޖާޖީން ސައުދީއަށް ފުރާފައިވާއިރު، ޙައްޖާޖީންނަށް މަރުޙަބާ ކިޔުމުގެ ގޮތުން، ދިވެހިން ތިބޭ ހޮޓަލުގެ ބޭރުގައި ބެނާތައް ދަމައި، ވަރަށް ފުރިހަމަޔަށް ވަނީ ތައްޔާރުވެފައވެެ.