ދިވެހި ޤައުމީ އެއާލައިން މޯލްޑިވިއަނުން އެންމެފަހުން އޮސްޓްރޭލިއާ އާއި ރާއްޖެއާ ދެމެދު އުދުހުންތައް ފަށައިފިއެވެ. 

މޯލްޑިވިއަންގެ ދަތުރުތައް ފެށުމަށް އެ އެއާލައިން އޮސްޓްރޭލިއާއަށް ގޮސްފައިވަނީ، މިމަހުގެ 17 ވަނަ ދުވަހުއެވެ. އަދި އަނބުރާ ރާއްޖެ އައިސްފައިވަނީ މިއަދެވެ. ރާއްޖެއާ އޮސްޓްރޭލިއާ އާ ދެމެދު ދަތުރުތައް ފެށުމާ ގުޅިގެން މިއަދު ފްލައިޓުން އައި ފަސެންޖަރުންނަށް ވަނީ ހޫނު މަރުހަބާއެއް ކިޔާފައެވެ. 

ވެލާނާ އިންޓަރނެޝަނަލް އެއާޕޯޓްގައި ބޭއްވި ހާއްސަ ހަފްލާއެއްގައި ހާރިޖީ ވަޒީރު އިރުތިޝާމް އާދަމް އާއި ތޜިޒަމް މިނިސްޓްރީގެ އިތުރުން އެމްއޭސީއެލްގެ އިސް ފަރާތްތަކުން ވަނީ ބައިވެރިވެފައެވެ. 

އައިލެންޑް އޭވިއޭޝަނުން ބުނީ މޯލްޑިވިއަނުން އޮސްޓްރޭލިއާއަށް ކުރާ މި ދަތުރުތައް ހަފްތާއަކު އެއް ދުވަހު ބޭއްވުމަށް ނިންމާފައިވާކަމަށެވެ. 

މޯލްޑިވިއަނުން އޮސްޓްރޭލިއާއަށް ދަތުރުތައް ފެށުމަކީ އެކަމުގެ ސަބަބުން އޮސްޓްރޭލިއާ އަދި އެނޫންވެސް މަންޒިލްތަކުން ދަތުރުކުރާ ފަތުރުވެރިންގެ އަދަދު އިތުރުވެގެންދާނޭ ކަމެއްކަމަށް އެފަރާތްތަކުން ބުނެއެވެ. އޮސްޓްރޭލިއާއަކީ ރާއްޖޭގެ ފަތުރުވެރިކަމުގެ ސިނާއަތުގައި ވަރަށް ގިނަދުވަސްވީ މާކެޓެކެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ދެމަހުގެ ތެރޭގައި އޮސްޓްރޭލިއާއިން ރާއްޖެއަށް 6,526 ފަތުރުވެރިން ވަނީ ޒިޔާރަތްކޮށްފައެވެ.

މޯލްޑިވިއަނުން ދަނީ އެ އެއަރލައިނުން ދަތުރުކުރާ ބައިނަލްއަގުވާމީ މަންޒިލްތައް އިތުރު ކުރުމަށްޓަކައި ހުޅަނގުގެ ގައުމުތަކަށް ދަތުރުތައް ފެށުމަށްޓަކައި ތައްޔާރުވަމުންނެވެ. މޯލްޑިވިއަނުން މިހާރު ދަތުރުކުރާ މަންޒިލްތަކުގައި، ޗައިނާ، ބަންގްލަދޭޝް އަދި އިންޑިއާ ހިމެނެއެވެ.