އާސެނަލުން 22 އަހަރަށްފަހު އިނގިރޭސި ޕްރިމިއާ ލީގްގެ ޗެމްޕިއަންކަން ހޯދައިފިއެވެ.

ލީގްގެ ޗެމްޕިއަންކަން އާސެނަލަށް ޔަގީންވީ ރޭ ޕްރިމިއާ ލީގްގައި މެންޗެސްޓަރ ސިޓީ އާއި ބޯންމައުތު ބައްދަލުކުރިމެޗް 1-1 ގެ ނަތީޖާއަކުން އެއްވަރުވުމުންނެވެ.

ލީގްގައި އާސެނަލް އަދި މެންޗެސްޓަރ ސިޓީއަށްވެސް ދެން ބާކީ އޮތީ އެންމެ މެޗެކެވެ. ލީގް ޕޮއިންޓް ތާވަލްގެ އެއްވަނާގައި އާސެނަލް އޮތްއިރު އެޓީމަށް ލިބިފައިވަނީ 82 ޕޮއިންޓެވެ. ދެވަނާގައި އުޅޭ ސިޓީއަށް ލިބިފައިވަނީ 78 ޕޮއިންޓެވެ. އެހެންކަމުން ދެން ކުރިއަށް އޮތް މެޗުން އާސެނަލް ބަލިވި ނަމަވެސް ސިޓީއަށް އާސެނަލާ އަރާހަމަކުރެވޭނެ ގޮތެއް ނޯންނާނެއެވެ. 

އާސެނަލަށް އެންމެފަހުން ޕްރިމިއާ ލީގް ހޯދާފައިވަނީ 2003-2004 ސީޒަނުގައެވެ. އެފަހަރު އާސެނަލުން ޕްރިމިއާ ލީގް ހޯދީ އެއްވެސް މެޗަކުން ބަލިނުވެއެވެ. 

އާސެނަލްގެ ކޯޗް މިކޭލް އަޓޭޓާގެ އިރުޝާދުގެ ދަށުން މި ސީޒަނުގައި އެޓީމް ފެނިގެންގޮސްފައިވަނީ މުޅިން ތަފާތުކޮށެވެ. ނަތީއްޖާއެއްގެ ގޮތުން އެޓީމް ވަނީ ޔުއެފާ ޗެމްޕިއަންސްލީގް ފައިނަލަށްވެސް ދަތުރުކޮށްފައެވެ. އަޓޭޓާ އަކީ މީގެ ކުރިން އާސެނަލަށް ކުޅުނު ކުޅުންތެރިއެކެވެ. އާސެނަލަށް ޕްރިމިއާ ލީގް ލިބުމާ ގުޅިގެން ޓީމާއި ދުނިޔޭގެ އެކި ކަންކޮޅުތަކުގައި ތިބި އެޓީމަށް ސަޕޯޓްކުރާ ފަރާތްތަކުން ދަނީ އުފާފާޅުކުރަމުންނެވެ.