ބަންގްލަދޭޝްގައި ކުޑަ އަންހެން ކުއްޖަކު ރޭޕްކޮށްލުމަށްފަހު ބޯ ބުރިކޮށްލި މީހުންގެ ޝަރީއަތް އަންނަ ޖޫންމަހުގެ އެއްވަނަ ދުވަހު ފެށުމަށް ތާވަލްކޮށްފިއެވެ.
ޕައްލަބީގައި ކުޑަކުއްޖަކު މަރާލި މައްސަލައިގެ ދަޢުވާލިބޭ ސުހައިލް ރާނާ އާއި އޭނާގެ އަންހެނުން ސުވަޕްނާ އަކްތަރުގެ މައްޗަށް ދަޢުވާ އިއްވުމުގެ އަޑުއެހުން ބޭއްވުމަށް ހަމަޖެހިފައިވަނީ ޚާއްޞަ ޓްރައިބިއުނަލެއްގައެވެ. ޑާކާ މެޓްރޯޕޮލިޓަން ޗިލްޑްރަން ވައިލެންސް ސަޕްރެޝަން ޓްރައިބިއުނަލްގެ ފަނޑިޔާރު މަސްރޫރު ސާލެކިން މިގޮތަށް އަމުރުކުރެއްވީ، މި މައްސަލައިގައި ފުލުހުން ހުށަހެޅި ތަޙުޤީޤީ ރިޕޯޓާއި ދަޢުވާ އާ ގުޅޭ ލިޔެކިޔުންތައް ބަލައިގަތުމަށްފަހު އިއްޔެގައެވެ.
ފުލުހުން ވަނީ މި ހާދިސާގައި ސުހައިލް ރާނާ އާއި އޭނާގެ އަންހެނުންގެ މައްޗަށް ކުރެވޭ ހެކިތަކާބެހޭ ލިޔެކިޔުންތައް ޑާކާގެ ޗީފް މެޓްރޯޕޮލިޓަން މެޖިސްޓްރޭޓް ކޯޓަށް ހުށަހަޅާފައެވެ. އަދި ފުލުހުން ވަނީ މި މައްސަލައިގެ ޑީއެންއޭ ރިޕޯޓް ތައްޔާރުކޮށް ތަހްގީގްކުރާ އޮފިސަރާ ހަވާލުކޮށްފައެވެ. މައްސަލާގައި ތުހުމަތުކުރެވޭ ދެމަފިރިން އިއްޔެ ވަނީ ވަނީ ކޯޓަށް ހާޒިރުކޮށްފައެވެ.
މި މައްސަލައާ ގުޅޭގޮތުން ބަންގްލަދޭޝްގެ ހޯމް މިނިސްޓަރު ޞަލާޙުއްދީން އަޙްމަދު ވިދާޅުވެފައިވަނީ، ލިބިފައިވާ ހެކިތަކުގެ މައްޗަށް ރިޔާއަތްކުރުމަށްފަހު މި ރޭޕް އަދި މަރުގެ މައްސަލައިގެ ޝަރީޢަތް 7 ނުވަތަ 8 ވަރަކަށް ދުވަހުގެ ތެރޭގައި ނިންމާލެވޭނެ ކަމަށް އުންމީދު ކުރައްވާ ކަމަށެވެ.
ބަންގްލަދޭޝްގެ އިތުރުން ބައިނަލްއަގްވާމީ މީޑިއާތަކުގެ ސަމާލުކަން ލިބުނު މި ހިތާމަވެރި ހާދިސާ ހިނގާފައިވަނީ މިދިޔަ އަންގާރަ ދުވަހުއެވެ. މައްސަލައިގެ ތަފްޞީލްތަކުން އެނގޭ ގޮތުގައި، އެ ކުއްޖާ ދިރިއުޅޭ ގޭގެ ކައިރި އެޕާޓްމަންޓެއްގައި ކުއްޔަށް އުޅޭ ސުހައިލް ރާނާ، އޮޅުވާލައިގެން އެ ކުއްޖާ އޭނާގެ ކޮޓަރިއަށް ގެންގޮސް ރޭޕްކުރުމަށްފަހު ވަނީ މަރާލާފައެވެ.
އަންހެން ކުއްޖާގެ ބޯބުރިކޮށްލާފައިވާއިރު ކުއްޖާގެ ހަށިގަނޑު ފަހުން ފެނިފައިވަނީ އެނދު ދަށުންނެވެ. އަދި އޭނާގެ ބޯ ފެނުނީ ފާޚާނާ ތެރޭގައި ހުރި ބާލިދީއެއްގެ ތެރޭގައި ފޮރުވާފައި އޮއްވައެވެ.
Advertisement
This content is created and paid for by advertisers and does not involve Voice Journalists
