މި އަހަރުގެ ހައްޖުގެ އަޅުކަން މިއަދު ފެށިގެންދާއިރު، ހައްޖުވެރިން މިނާއަށް ގެންދިއުމަށް ވާންޖެހޭ ހުރިހާ އިދާރީ އަދި ފަންނީ ތައްޔާރީތަކެއް ފުރިހަމަކޮށް ނިމިފައިވާ ކަމަށް ސައުދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާއިން އިއްޔެ އިއުލާންކޮށްފިއެވެ.

ހައްޖުގެ މަނާސިކުތައް މިއަދު ފެށިގެންދާއިރު، ދުނިޔޭގެ އެކި ކަންކޮޅުތަކުން މައްކާއަށް އައިސްފައިވާ 1.5 މިލިއަނަށްވުރެ ގިނަ ހައްޖުވެރިންނާއި، ސައުދީގެ އެތައް ލައްކަ ރައްޔިތުންނެއް މިހާރު ދަނީ މައްކާގައި ތިބި ތަންތަނުން މިނާއަށް ދިއުމަށް ދަތުރު ފަށަމުންނެވެ.

ކީރިތި ރަސޫލާ ﷺ ގެ ސުންނަތާ އެއްގޮތްވާ ގޮތުގެ މަތިން، ތަލްބިޔާ ކިޔަމުންނާއި މާތްالله އަށް ޒިކުރު ކުރަމުން ހައްޖުވެރިން ދަނީ ފޭލިގެތަކުގެ ރަށް ކަމަށްވާ މިނާއަށް ޖަމާވަމުންނެވެ.

ހައްޖު މިނިސްޓްރީން ބުނި ގޮތުގައި، ހައްޖުވެރިންގެ ދަތުރުފަތުރާއި، ފޭލިގެތަކަށް ވަނުމާއި، އަދި ދެވޭ ހިދުމަތްތަކުގެ ފެންވަރު ބެލުމަށްޓަކައި ހާއްސަ އިންތިޒާމުތަކެއް ވަނީ ހަމަޖައްސާފައެވެ. މީގެ ތެރޭގައި ހައްޖުވެރިން ތިބޭ ތަންތަނުން މިނާއަށް ގެންދިއުމާއި، މަގު ދެއްކުމާއި، ހޭލުންތެރިކުރުމުގެ ހިދުމަތްތައް ހިމެނެއެވެ. މި ހުރިހާ ކަމެއް ކުރިއަށްދަނީ 2026 ވަނަ އަހަރުގެ ހައްޖު މޫސުމަށް އެކުލަވާލާފައިވާ އޮޕަރޭޝަނަލް ޕްލޭނާ އެއްގޮތްވާ ގޮތުގެ މަތިންނެވެ.

ސައުދީން ބުނިގޮތުގައި ކަމާގުޅޭ އެކި އިދާރާތަކާ ގުޅިގެން، މިނާގައި ހައްޖުވެރިން ތިބޭނެ ތަންތަނާއި، ކާބޯތަކެއްޗާއި، ދަތުރުފަތުރުގެ ހިދުމަތްތައް ވަނީ ފުރިހަމައަށް ތައްޔާރުކޮށްފައެވެ. އަދި ދިމާވާ އެންމެހާ މައްސަލަތައް ވަގުތުން ދެނެގަނެ ހައްލުކުރުމަށްޓަކައި ފީލްޑް މޮނިޓަރިންގް ވަރުގަދަކޮށްފައިވެއެވެ. މި މަސައްކަތްތައް ވިލަރެސްކުރަމުން ދަނީ ކްރައުޑް މެނޭޖްމަންޓް އެންޑް ޖޮއިންޓް އޮޕަރޭޝަންސް ސެންޓަރާއި، މޮނިޓަރިންގް އެންޑް ކޮންޓްރޯލް ސެންޓަރުގެ އެހީގައެވެ.

ހައްޖު މިނިސްޓްރީން އިތުރަށް ހާމަކުރި ގޮތުގައި، ޛުލްޤަޢިދާ މަހުގެ ކުރީކޮޅުން ފެށިގެން މިހާތަނަށް 83,000 އަށްވުރެ ގިނަ އިންސްޕެކްޝަން އަދި ފީލްޑް ވިޒިޓްތައް ވަނީ ކުރިއަށް ގެންގޮސްފައެވެ. މި ޒިޔާރަތްތަކުގައި ހައްޖުވެރިން ތިބޭ ހޮޓާތަކާއި، ކޭމްޕްތަކާއި، ހިދުމަތްދޭ އެހެނިހެން މަރުކަޒުތައް ބަލައި ފާސްކޮށް، ހުރިހާ ތަނެއްގައިވެސް ކަނޑައެޅިފައިވާ މިންގަނޑުތަކަށް ހިދުމަތް ދެވޭކަން ވަނީ ކަށަވަރުކޮށްފައެވެ.