ދިރިއުޅުމުގެ ކަންކަން ބައްޓަންކުރުމުގައި އިސްރާފުކުރުމާ ދުރުހެލިވެ، އިޤުތިޞާދީ ވިސްނުމެއް އިސްކުރުމަށް މިއަދުގެ ހުކުރު ޚުތުބާގައި ގޮވާލައިފިއެވެ.

"ހޭދަކުރުމުގައި އިޤްތިޞާދުކުރުން" މި މައުޟޫޢަށް ރާއްޖޭގެ އެކިކަންކޮޅުތަކުގައި އިއްވި ޚުތުބާގައި ބުނީ، މުދަލަކީ މާތް الله އަޅުތަކުންނަށް ދެއްވާފައިވާ އަމާނާތެއްކަމަށެވެ.

ޚުތުބާގައި ފާހަގަކުރެއްވި ގޮތުގައި، ދުނިޔޭގައިވާހައި ތަކެއްޗަކީ މާތް الله އަހަރެމެންގެ ޚިދުމަތުގައި ލައްވާފައިވާ ތަކެއްޗެވެ. އަދި މުދަލުގެ ޙަޤީޤީ މިލްކުވެރި ފަރާތަކީ މާތް الله ކަމަށްވާއިރު، އެ މުދާ ހޯދުމުގައާއި ހޭދަކުރުމުގައި ޝަރުޢީ މިންގަނޑުތަކަށް ރިޢާޔަތްކުރުމަކީ ކޮންމެ މުސްލިމެއްގެ މައްޗަށް ލާޒިމުކަމެކެވެ.

ޚާއްޞަގޮތެއްގައި، މުދާ ހޯދުމުގައި ޚިޔާނާތްތެރިވުމާއި، ވައްކަންކުރުމާއި، ރިޝްވަތު ދިނުމާއި، ރިބާގެ މުޢާމަލާތްތައް ފަދަ ޙަރާމް ކަންކަމުން ދުރުހެލިވުމަށް ޚުތުބާގައި ނަޞޭޙަތްތެރިވިއެވެ. ހަމައެހެންމެ، މުދާ ލިބުމަށްފަހު ބޭކާރު ގޮތުގައި ހޭދަކުރުމާއި، ބޭނުންވާ މިންވަރަށްވުރެ އިތުރަށް މުދާ ގަނެ އުކާލަންޖެހުމަކީ ދީނީގޮތުން ހުއްދަ ކަންކަމެއް ނޫންކަން ބަޔާންކޮށްދީފައިވެއެވެ.

"އަދި ތިޔަބައިމީހުން ކައިބޮއިއުޅޭށެވެ! އަދި އިސްރާފުނުކުރާށެވެ! ހަމަކަށަވަރުން އިސްރާފުކުރާ މީހުން ދެކެ އެކަލާނގެ ލޯބިވެވޮޑިގެނެއް ނުވެތެވެ،" ކީރިތި ޤުރުއާނުގެ އާޔަތެއްގެ މާނަ ވިދާޅުވަމުން ޚުޠުބާގައި ބަޔާންކުރިއެވެ.

މިއަދުގެ ޚުތުބާގައި އިތުރަށް އަލިއަޅުވާލާފައިވަނީ މުދަލުގައި އެހެން މީހުންގެ ޙައްޤުތައް އެކުލެވިގެންވާ ކަމަށެވެ. އެގޮތުން އަނބިދަރިންނާއި، ގާތްތިމާގެ މީހުންނާއި، ފަޤީރުންނާއި މިސްކީނުންގެ ޙައްޤުތައް އަދާކުރުމަށް ވަނީ ބާރުއަޅާފައެވެ. އަދި ދުނިޔޭގައި ލިބޭ ނިޢުމަތްތަކާ މެދު ޤިޔާމަތް ދުވަހުން ސުވާލުކުރެވޭނެކަން ހަނދާންކޮށްދީ، ޙައްޤުނޫން ގޮތުގައި މުދާ ބޭނުންކުރާ މީހުންނަށް އޮތް ނުރައްކާތެރިކަމުގެ އިންޒާރުވެސް ދީފައިވެއެވެ.

ކީރިތި ރަސޫލު ﷺ ޙަދީޘްކުރައްވައިފައި ވެއެވެ. (إِنَّ رِجَالًا يَتَخَوَّضُوْنَ فِيْ مَالِ اللَّهِ بِغَيْرِ حَقٍّ، فَلَهُمُ النَّارُ يَوْمَ الْقِيَامَةِ) މާނައީ: "ހަމަކަށަވަރުން މާތް الله ދެއްވައިފައިވާ މުދާ، ޙައްޤު ނޫން ގޮތުގައި ހޭދަކުރާ ބަޔަކު ވެއެވެ. ފަހެ ޤިޔާމަތް ދުވަހުން އެބައިމީހުންނަށް ނަރަކަ ހުއްޓެވެ!"

ޚުތުބާ ނިންމާލަމުން، ދަރަނި ނަގައިގެން ޚަރަދުކުރުން ފަދަ ނުރަނގަޅު އާދަތަކާ ދުރުވުމަށާއި، ލިބޭ އެއްޗަކުން އިޤުތިޞާދުކޮށްގެން ދިރިއުޅުން ބައްޓަންކުރުމަށް ހުރިހާ މުސްލިމުންނަށް އިލްތިމާސްކުރިއެވެ. މިގޮތަށް ޢަމަލުކުރުމަކީ އިޖުތިމާޢީ ގިނަ މައްސަލަތަކުން ސަލާމަތްވެ، ޢާއިލީ އުފާވެރިކަން އިތުރުވާނެ ކަމެއް ކަމުގައިވެސް ފާހަގަކުރިއެވެ.