އެންގޯލާގެ ލިސީމާ ޕްލެޓޯއަށް ސައިންސްވެރިން ކުރި ދިރާސާ ދަތުރެއްގައި، މީގެ ކުރިން ފެނިފައިނުވާ ތަފާތު ބާވަތްތަކުގެ ދިރުންތަކެއް ހޯދައިފިއެވެ.

ކޮންޒަވޭޝަން ގްރޫޕަކުން ބުދަ ދުވަހު ހާމަކުރި ގޮތުގައި "ވައިލްޑަރނަސް ޕްރޮޖެކްޓް" ގެ ފަރާތުން މިދިޔަ ފެބްރުއަރީ މަހު ކުރި މި ދަތުރުގައި، ފާހަގަކޮށްލެވޭ އާ ދިރުންތަކެއް ވަނީ ފެނިފައެވެ. އޭގެ ތެރޭގައި ދޮންދޫނި (ޑްރެގޮންފްލައި) ގެ އާ އަށް ބާވަތަކާއި، ގޮއްފުޅަނގީގެ (ގްރާސްހޮޕާގެ) ތިން ބާވަތެއްގެ އިތުރުން، އެކި ކުލަކުލައިގެ ކޮކާ އާއި މޮތްގެ 60 އެއްހާ އާ ބާވަތް ހިމެނެއެވެ.

ސައިންސްވެރިން ހޯދި ދިރުންތައް: ފޮޓޯ/ ރޮއިޓާސް 

މި ދިރާސާ ކުރިއަށް ގެންގޮސްފައިވަނީ އެފްރިކާގެ ބޮޑު ހަތަރު ކޯރެއް ކަމަށްވާ ކޮންގޯ، އޮކަވަންގޯ، ޒެމްބޭޒީ އަދި ކުއަންޒާ ކޯރަށް ފެން ފޯރުކޮށްދޭ ލިސީމާ ޕްލެޓޯ ސަރަހައްދުގައެވެ.

މި ހޯދުންތަކުގެ ތެރެއިން އެންމެ ފާހަގަކޮށްލެވޭ އެއް ދިރުމަކީ އަލްޓްރާވައިލެޓް އަލީގައި ވިދާ "ކްރައުންޑް ކްރެބް ސްޕައިޑަރ" އެވެ. މީގެ އިތުރުން، ދޫނި ފަދަ ޝިކާރަވެރިންގެ ކިބައިން ސަލާމަތްވުމަށްޓަކައި "ލޭޑީބާޑް" ނުވަތަ ނަލަމަޑިގެ ސިފަ ޖައްސައިގެން އުޅޭ "އޯބް-ވެބް" މަކުނުގެ އާ ބާވަތެއްވެސް ވަނީ ފެނިފައެވެ. ގަދަ ރަތް ކުލައިގެ ބަދަލުގައި މި މަކުނު ހުންނަނީ އޮރެންޖް ކުލައެއްގައެވެ.

ސައިންސްވެރިން ހޯދި ދިރުންތައް: ފޮޓޯ/ ރޮއިޓާސް 

މި އެކްސްޕެޑިޝަންގެ ލީޑަރު ރޮބް ޓޭލާ ރޮއިޓާސްއަށް މައުލޫމާތު ދެމުން ބުނެފައިވަނީ، އެ ސަރަހައްދުން ފެނުނު "އާމަޑް ކްރިކެޓް" އަކީ ވަރަށް ތަފާތު ސިފައެއް ހުންނަ ސޫތްޕެއް ކަމަށެވެ. އަދި އެ ސޫތްޕަށް ނުރައްކަލެއް ކުރިމަތިވުމުން، ދިފާއީ އުކުޅެއްގެ ގޮތުގައި ހަމަލާދޭ އެތީގެ ގަޔަށް ދިޔައެއް ޖަހާ ކަމަށްވެސް އޭނާ ބުންޏެވެ.

ސައިންސްވެރިން ހޯދި ދިރުންތައް: ފޮޓޯ/ ރޮއިޓާސް 

ދުނިޔޭގެ އެކި ކަންކޮޅުތަކުގެ ސައިންސްވެރިން އަންނަނީ އާ ދިރުންތައް ހޯދައި ރެކޯޑު ކުރުމަށް ބުރަ މަސައްކަތްތަކެއް ކުރަމުންނެވެ. ތަފާތު ތަފާސްހިސާބުތަކުން ދައްކާ ގޮތުގައި ދުނިޔޭގައި 8.7 މިލިއަން ބާވަތުގެ ދިރުން އުޅޭއިރު، ސައިންސްވެރިންނަށް މިހާތަނަށް ދެނެގަނެވިފައިވަނީ އެންމެ 1.5 މިލިއަން ބާވަތެވެ. އަދި އޭގެ ތެރެއިން ގާތްގަނޑަކަށް އެއް މިލިއަން ބާވަތް މިހާރު ވަނީ ނެތިގެން ދިއުމުގެ ބިރުގެ ތެރޭގައެވެ.

ލިސީމާ ޕްލެޓޯގެ ދިރުންތަކަށް އޮތް އެންމެ ބޮޑު ނުރައްކަލަކީ ގަސް ކެނޑުމާއި، ޖަންގަލިތައް ހަލާކުކުރުމާއި، އަދި އެ ސަރަހައްދުގައި ކުރިއަށްދާ އަލިމަސް ނެގުމުގެ މަސައްކަތްތައް ކަމަށް ރޮބް ޓޭލާ ފާހަގަކުރިއެވެ.

މީގެ އިތުރުން ދަނޑުވެރިކަން ކުރުމަށްޓަކައި ޖަންގަލިތައް އަންދާލުމަކީވެސް މި ފަދަ ދިރުންތައް ދުނިޔެއިން ފޮހެވިގެން ދިއުމަށް މެދުވެރިވާ ސަބަބެއް ކަމަށް އޭނާ ބުންޏެވެ.