ކުޅަދާނަވީ މިންވަރަކުން ހެޔޮކަންތައްތަކަށް އަމުރުކުރުމާއި ނުބައިކަންތައްތައް ނަހީކުރުމަކީ މުޖުތަމަޢުގެ ކޮންމެ ފަރުދެއްގެ އިޖުތިމާޢީ އަދި ދީނީ ޒިންމާއެއްކަން މިއަދުގެ ހުކުރު ޚުތުބާގައި ބުނެފިއެވެ.

"ހެޔޮ ކަންތަކަށް އަމުރުކޮށް މުންކަރާތްތައް ނަހީކުރުން" މި މައުޟޫޢަށް މިއަދު ރާއްޖޭގެ އެކިކަންކޮޅުތަކުގައި އިއްވި ހުކުރު ޚުތުބާގައި ބުނީ، މާތް الله އަށް އީމާންވުމާއި، ހެޔޮކަންކަމުގައި އެކަކު އަނެކަކަށް އެހީތެރިވެ، ނުބައިކަންކަމުން މުޖުތަމަޢު ރައްކާތެރިކުރުމަކީ އިސްލާމްދީނުގެ މައިގަނޑު އަސާސްތަކުގެ ތެރޭގައި ހިމެނޭ ކަންކަން ކަމަށެވެ.

ޚުތުބާގައި ބުނި ގޮތުގައި، ހެޔޮ ކަންތަކަށް އަމުރުކޮށް، މުންކަރާތްތައް ނަހީކުރުމުގެ ޒިންމާއަކީ މާތް الله ވެރިކަން ދެއްވައިފައިވާ ބައެއްގެ އެންމެ އިސް ވާޖިބެވެ. މިކަމުގެ މުހިންމުކަން ބަޔާންކުރައްވައި ކީރިތި ޤުރުއާނުގެ އާޔަތްތަކުންނާއި ރަސޫލާގެ ޙަދީޘްފުޅުތަކުން ދަލީލު ދައްކަމުން ޚުތުބާގައި ބުނީ، މުންކަރާތެއް ފެނިއްޖެ ނަމަ އަތުން ނުވަތަ ދުލުން ނުވަތަ ހިތުން އެކަމަށް އިންކާރުކުރަން ޖެހޭނެ ކަމަށެވެ.

ދިވެހި މުޖުތަމަޢުގެ ޙާލަތަށް އަލިއަޅުވާލަމުން ޚުތުބާގައި ބުނީ، ރާއްޖޭގައި އޮތް އެއްބައިވަންތަކަމާއި ރިވެތި އަޚުލާޤީ ސިފަތައް ދަމަހައްޓަން ޖެހޭ ކަމަށެވެ. ނަމަވެސް، މިއަދު ޤައުމުގެ އިޖުތިމާޢީ ފޭރާމަށް ބަލާއިރު، މީސްތަކުންގެ ލެޔާއި، މުދަލާއި، އަބުރު ރައްކާތެރިކުރުމަށްޓަކައި ގިނަ މަސައްކަތްތަކެއް ކުރަން ޖެހިފައިވާކަން ޚުތުބާގައި ފާހަގަކުރިއެވެ.

މުޖުތަމަޢުގައި ހިނގާ ނޭއްގާނީ ޢަމަލުތައް ހުއްޓުވުމުގެ މުހިންމުކަން ބަޔާންކޮށްދިނުމަށް، ނަވެއްގައި ދަތުރުކުރި ބައެއްގެ މިސާލު ޚުތުބާގައި ދިނެވެ.

ކީރިތި ރަސޫލާ ﷺ ޙަދީޘްކުރެއްވި ބަސްފުޅެއްގެ މާނައިގައި ވެއެވެ. "މާތް الله ކަނޑައަޅުއްވައިފައިވާ އިމުގައި ޤާއިމުވެ ހުންނަ މީހާއާއި، އެކަލާނގެ ކަނޑައަޅުއްވައިފައިވާ އިން ފަހަނަޅައިދާ މީހާގެ މިސާލަކީ ނަވެއްގައި ދަތުރުކުރި ބައެއްގެ މިސާލެވެ. ޤުރުޢަތު ލައިގެން އެއް ބަޔަކު ތިބޭން ޖެހުނީ ނަވުގެ މަތީބައިގައެވެ. އަނެއް ބަޔަކު ނަވުގެ އަޑީބައިގައެވެ. އަޑީބައިގައި ތިބޭ މީހުން ފެން ހޯދާންޖެހެނީ މަތީބައިގައި ތިބި މީހުންގެ ތެރެއިން ގޮހެވެ. ވީމާ، އަޑީގައި ތިބި މީހުން ބުންޏެވެ! އަހަރެމެން މި ތިބޭ ހިސާބުން ނަވުގެ އަޑީން ތަނެއް ފޫވައްޓައިލަމާ ހިނގާށެވެ! އެއިރުން މަތީގައި ތިބި މީހުންނަށް އުނދަގޫ ނުކޮށް އަހަރެމެންނަށް ފެން ލިބޭނެއެވެ. ފަހެ އެ މީހުން އެ ކުރާން އުޅުނު ކަންތައް ކުރާން އެ މީހުން ދޫކޮށްލައިފި ނަމަ، ނަވުގައި ދަތުރުކުރާ އެންމެން ހަލާކުވެދާހުށްޓެވެ. އަދި އެ މީހުންގެ އަތުގައިހިފަހައްޓައި އެ ކަން ހުއްޓުވައިފި ނަމަ، އެ މީހުންނާއި، ނަވުގައި ދެންތިބި މީހުން ވެސް، ސަލާމަތްވާހުށްޓެވެ."

اَلْإِمَامُ الْغَزَالِي - رَحِمَهُ اللهُ ވިދާޅުވެފައި ވެއެވެ. "ހެޔޮ ކަންތަކަށް އަމުރުކުރުމާއި ނުބައި ކަންތައް ނަހީކުރުމަކީ އިސްލާމްދީނުގެ އެންމެ މަތިވެރި އެއް ތަނބެވެ. އެއީ އެ މަޤުޞަދަކަށް ޓަކައި، އެންމެހައި ރަސޫލުބޭކަލުންނާއި ނަބީބޭކަލުން ފޮނުއްވުނު މަޤުޞަދެވެ. އެ ކަން ހުއްޓައިލެވި، އެ ކަމާ ބެހޭ ޢިލްމު ނެތިހިނގައްޖެ ނަމަ، ނަބީބޭކަލުން ފޮނުއްވުމުގެ މަޤުޞަދު ގެއްލުނީއެވެ. އަދި ދީނުގެ އުޞޫލުތައް ފުނޑުފުނޑުވެ، ރަސޫލުބޭކަލުން ގެނެސްދެއްވި ހިދާޔަތުގެ އަސަރު ފިލައިދިޔައީއެވެ. އެއިރުން މަގުފުރެދުމާއި ޖާހިލުކަން ފެތުރި، މުޖުތަމަޢުގައި ފަސާދަ ޢާންމުވެ، ރަށްތައް ޚަރާބުވެ، އަޅުތަކުން ހަލާކާ ކުރިމަތިލާން ޖެހިދާނެއެވެ. އަދި ހިސާބު ބައްލަވާ ދުވަސް އަތުވެއްޖައުމަށް ދާންދެން އެ ބައިމީހުންނަށް އެ ކަމެއް ނުވިސްނޭހުއްޓެވެ."

މިއާއެކު ޚުތުބާގައި ވަނީ، ހަރުދަނާ އަޚުލާޤީ ޖީލެއް ބިނާކުރުމަށްޓަކައި މައިންބަފައިންނާއި، މުދައްރިސުންނާއި، ދީނީ ޢިލްމުވެރިން އަދި މަސްއޫލުވެރިން އެމީހުންގެ ފަރުދީ ޒިންމާ ފުރިހަމައަށް އަދާކުރުމަށް ގޮވާލާފައެވެ. އަދި ފިތުނަވެރިކަމުން ދުރުހެލީވެ، މުޖުތަމަޢުގެ މަޞްލަޙަތު އިސްކުރުމަށް ހުރިހާ ރައްޔިތުންނަށް އިލްތިމާސްކުރިއެވެ.