އުތުރާއި، މެދުރާއްޖެތެރޭގެ އަތޮޅުތަކަށް މިއަދު މޫސުން ގޯސްވާނޭކަމަށް މޫސުމާ ބެހޭ ޤައުމީ އިދާރާއިން ލަފާކޮށްފިއެވެ.
މޯލްޑިވްސް މީޓިއޮލޮޖިކަލް ސެންޓަރުން ނެރެފައިވާ މޫސުމީ އެލާޓްގައި ބުނެފައިވަނީ، އުތުރާއި މެދު ރާއްޖެތެރޭގެ އެކި ހިސާބުތަކަށް ވިއްސާރަ ކުރާނޭކަމަށެވެ. އަދި ބައެއް ރަށްތަކަށް ބޯކޮށް ވާރޭ ވެހި ގުގުރުން އެކަށީގެންވާކަމަސެވެ. މީގެ އިތުރުންދެކުނުގެ ބައެއް ރަށްތަކަށް ކެރީގެ އަސަރު ފޯރާނޭކަމަށްވެސް ވަނީ ބުނެފައެވެ.
ދެކުނުގެ އަތޮޅުތަކަށް 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭއިރު އެހެނ ްހިސާބުތަކަށް 10 މޭލާއި 20 މޭލު ބާރުމިނުގައި ވައި ޖެހޭނޭކަމަށް ވަނީ ބުނެފައެވެ. އަދި ވިލާގަނޑުގައި ގަޑިއަކު 35 މާލު ބާރުމިނުގައި ވައިގަދަވުން އެކަށީގެންވާކަމަށްވެސް މެޓުން ވަނީ ބުނެފައެވެ.
ދެކުނުގެ ސަރަހައްދުތަކަށް އާދައިގެ ވަރަކަށް ކަނޑު މަޑުވިނަމަވެސް، އެހެން ހިސާބުތަކަށް އާދައިގެ ވަރަކަށް ގަދަވެފައި ވިލާގަނޑުގައި އިތުރަށް ގަދަވާނޭކަމަށް ވަނީ ބުނެފައެވެ.
މިހާރު ހިނގަމުން މިދަނީ ހުޅަނގު މޫސުމުގެ ފަސްވަނަ ނަކަތް ކަމަށްވާ "މިއަހެލި" ނަކަތެވެ. އިހުގެ ނަކަތްތެރިން ބުނާގޮތުގައި މި މޫސުމުގައި ވައިބާރުވާނެއެވެ. ޢާންމުގޮތެއްގައި ވައިޖެހޭނީ ސީދާ ހުޅަނގުންނެވެ. ދަތުރުފަތުރުކުރަން ދަތިވާ ވަރަށް ކަނޑުތައް ގަދަވާނެއެވެ. އަދި ޢާންމުގޮތެއްގައި ވައި ޖެހޭނީ ގަޑިއަކު 20.37 ކިލޯމީޓަރ ބާރުމިނުގައެވެ. މި ނަކަތުގައި ވައި ބާރުވެ، ކަނޑުގަދަވުމުގެ ސަބަބުން މަސްވެރިކަންވެސް ދަށްވާނެއެވެ.
Advertisement
This content is created and paid for by advertisers and does not involve Voice Journalists
