އިސްރާއީލުން އެމެރިކާގެ އިސް އޮފިޝަލުންނަށް ފާރަލުމާއި ޖާސޫސްކުރުމުގެ ހަރަކާތްތައް ވަރުގަދަކުރަމުންދާ ކަމަށް ބުނެ، އެމެރިކާގެ ޕެންޓަގަނުން ނުރައްކަލުގެ ދަރަޖަ އެންމެ މަތީ ލެވެލްއަށް ބަދަލުކޮށްފި ކަމަށް އެމެރިކާގެ މީޑިއާތަކުން ރިޕޯޓްކޮށްފިއެވެ.

މީޑިއާ ރިޕޯޓްތަކުގައިވާ ގޮތުން، އިސްރާއީލުން އެމެރިކާގެ ސީނިއާ އޮފިޝަލުންނަށް އަމާޒުކޮށްގެން ސާވައިލަންސް ނުވަތަ ފާރަލުމުގެ މަސައްކަތްތައް އިތުރަށް ހަރުދަނާ ކުރަމުންދާ ކަމުގެ ކަންބޮޑުވުންތައް ޕެންޓަގަނުން ވަނީ ފާހަގަކޮށްފައެވެ. މިކަމުގެ ސަބަބުން ދެ ގައުމުގެ ދެމެދުގައި އޮންނަ ޖާސޫސީ މުއާމަލާތްތަކާ މެދު އޮތް ނުރައްކާ މިހާރު ވަނީ ވަރަށް ބޮޑަށް ބޮޑުވެފައެވެ.

އެމެރިކާގެ ޖާސޫސީ އިދާރާތަކުގެ ރިޕޯޓްތަކާ ހަވާލާދީ ބުނެފައިވަނީ، އިސްރާއީލުގެ އިންސާނީ ޖާސޫސީ ބާރުތަކާއި އަދި ޓެކްނިކަލް އިންޓެލިޖެންސް އެއްކުރުމުގެ ގާބިލުކަން މިހާރު ހުރީ "ކްރިޓިކަލް ލެވެލް" އެއްގައި ނުވަތަ ނުރައްކާތެރި ދަރަޖައެއްގައެވެ. މިއީ އެމެރިކާގެ ދިފާއީ ނިޒާމަށް ހުރި ބޮޑު ގޮންޖެހުމެއްގެ ގޮތުގައި ރިޕޯޓްތަކުގައި ބަޔާންކޮށްފައިވެއެވެ.

މައުލޫމާތު އެނގޭ މަސްދަރުތަކުން ހާމަކޮށްފައިވާ ގޮތުގައި، އިސްރާއީލުން މިފަދަ ސާވައިލަންސް ހަރަކާތްތަކެއް ހިންގުމުގެ މައިގަނޑު ބޭނުމަކީ މެދުއިރުމަތީގެ ހަމަނުޖެހުންތަކާ ގުޅޭގޮތުން ޓްރަމްޕްގެ އެޑްމިނިސްޓްރޭޝަނުން ކުރިއަށްގެންދާ އެތެރޭގެ މަޝްވަރާތަކާއި ނިންމުންތަކުގެ މައުލޫމާތު ހޯދުމެވެ. މިގޮތުން އެމެރިކާ ސަރުކާރުން ގެންގުޅޭ ސިޔާސަތުތައް ދުރާލާ ދެނެގަތުމަށް އިސްރާއީލުން މަސައްކަތް ކުރަމުންދާ ކަމަށް ބުނެވެއެވެ.

މިކަމާއި ގުޅިގެން އެމެރިކާގެ ޕެންޓަގަނުން ރަސްމީކޮށް އަދި ވަކި އެއްޗެއް ހާމަކޮށްފައެއް ނުވެއެވެ. ނަމަވެސް މިއީ ދެ ގައުމުގެ ދެމެދުގައި އޮންނަ ހާރިޖީ އަދި ދިފާއީ ގުޅުންތަކަށް ބަދަލުތަކެއް އަތުވެދާނެ ފަދަ މައްސަލައެއްގެ ގޮތުގައި މީޑިއާތަކުން ދަނީ ސިފަކުރަމުންނެވެ.