އީރާނާ އެމެރިކާ އާ ދެމެދު ވަރަށްބޮޑަށް ސިޔާސީގޮތުން ހޫނުވެފައިވަނިކޮށް ވަރލްޑް ކަޕްގައި ވާދަކުރާ އީރާނުގެ ފުޓްބޯޅަޓީމުގެ ކުޅުންތެރިންނަށް ވިސާ ދީފައިވާކަމަށް އެމެރިކާއިން ބުނެފިއެވެ.
ބައިނަލްއަގްވާމީ މީޑިއާތަކުން މިއަދު ރިޕޯޓްކުރިގޮތުގައި އީރާންގެ ޓީމަށް ވިސާ ދީފައިވާކަން ވައިޓްހައުސްގެ އޮފިޝަލަކު ވަނީ ޔަގީންކޮށްދީފައެވެ. އެމެރިކާއިން އެންމެފަހުން އީރާންގެ ޓީމަށް ވިސާ ދީފައިމިވަނީ އެޓީމް އެމެރިކާގެ ލޮސްއެންޖެލެސްގައި ކުޅުމަށް ހަމަޖެހިފައިވާ މެޗަށް 10 ދުވަހަށް ވެފައިވަނިކޮށެވެ.
މެކްސިކޯގައި ހުންނަވާ އީރާނުގެ ސަފީރު މިދިޔަ ބްރާސްފަތި ދުވަހު ވިދާޅުވެފައިވަނީ ޓީމަށް އަދިވެސް ވިސާ ލިބިފައިނުވާކަމަށެވެ.
އީރާން ޓީމްގެ ކުޅުންތެރިންނަށް ވިސާ ލިބުނު ނަމަވެސް ޓީމުގެ ބައެއް ޓެކްނިކަލް އަދި އިދާރީ މުވައްޒަފުންނަށް އަދިވެސް ވިސާ ދޫކޮށްފައި ނުވާކަމަށް އީރާނުގެ މީޑިއާތަކުން ވަނީ ބުނެފައެވެ. ނަމަވެސް މިކަމާ ގުޅޭގޮތުން އީރާނުގެ ފުޓްބޯޅަ ފެޑެރޭޝަނުން އަދި ރަސްމީ ބަހެއް ބުނެފައެއް ނުވެއެވެ.
އީރާނާ ދެކޮޅަށް އެމެރިކާއާއި އިސްރާއީލުން ކުރަމުންދާ ހަނގުރާމައިގެ ސަބަބުން، ވޯލްޑް ކަޕަށް ސިޔާސީ ނުފޫޒު ވަދެފައިވާކަމަށް ބައެއް ފަރާތްތަކުން ދަނީ ބުނަމުންނެވެ.
ވިސާގެ ދަތިތަކާ ހުރެ އަދި އެމެރިކާގައި ގިނަ ދުވަހު މަޑުކުރަން ބޭނުންނުވާތީ، އީރާނުން ވަނީ ޓީމުގެ ފަރިތަކުރުންތައް އެމެރިކާގެ އެރިޒޯނާގެ ބަދަލުގައި މެކްސިކޯގެ ޓިޖުއާނާއަށް ބަދަލުކޮށްފައެވެ. އެ ޓީމު އާދީއްތަ ދުވަހު މެކްސިކޯއަށް ދިއުމަށް ވަނީ ހަމަޖެހިފައެވެ.
ވަރލްޑްކަޕް ގްރޫޕް 'ޖީ' ގައި ހިމެނޭ އީރާނުގެ ފުރަތަމަ ނިކުންނާނީ ޖޫން 15 ގައި ނިއުޒީލެންޑާ ދެކޮޅަށެވެ.
Advertisement
This content is created and paid for by advertisers and does not involve Voice Journalists
