ގަލޮޅު ދަނޑުން މިހާރު ހަގީގީ ދިވެހި ސަޕޯޓަރުން ނުފެންނަކަމަށް ގައުމީ ޓީމުގެ ކޯޗު އިސްޓަވާން އުރުބާނީ ބުނެފިއެވެ.

ރޭ ބަންގްލަދޭޝްއާ ދެކޮޅުނު މެޗަށްފަހު މީޑިއާ އާ ވާހަކަދައްކަވަމުން ކޯޗް އުރުބާނީ ބުނީ، ދަނޑަށް ސަޕޯޓަރުްނ ނުވަންނަ މައްސަލަ ވަރަށްބޮޑަށް ފާހަގަކޮށް އެ ވާހަކަ ދައްކާފައެވެ. ކޯޗް ބުނީ، ޤައުމީ ޓީމްގެ ފަރާތުން ސަޕޯޓަރުން ބޭނުންވާ ނަތީޖާ ނުނެރެވޭކަމަށް ބުނެ ވާހަކަ ދައްކަމުންދާއިރު، މެޗް ކުޅޭއިރު ދަނޑުން ހަގީގީ ސަޕޯޓަރުން ނުފެންނަކަމަށެވެ. ބަދަލުގައި ފެންނަމުންދަނީ ކުޅުންތެރިންގެ އާއިލާ މީހުންނާއި ރައްޓެހިންކަން އުރުބާނީ ފާހަގަކުރިއެވެ.

ކޯޗް ބުނީ ރާއްޖޭގެ ޤައުމީޓީމާ ހަވާލުވުމަށްފަހު މިވީ ހަތަރު ވަރަކަށް މަސްދުވަހުގެ ތެރޭގައި ދަނޑާއި ދަނޑުން ބޭރުގައި ހިނގާދިޔަ ކަންކަން ވަރަށް ރަނގަޅަށް އޮބްޒޯވް ކުރެވުނު ކަމަށެވެ. ފާހަގަވި އެއްކަމަކީ ދިވެހިން ދަނޑަށް ވަންނަ މިންވަރު މަދުވުންކަމަށާއި، ޤައުމީ ޓީމް ކުޅޭ ދުަވަސްދުވަހު ހަގީގީ ސަޕޯޓަރުން ނުފެންނަތަނުގައި ލީގް މެޗެއް އޮންނަ ދުވަހުވެސް ސަޕޯޓަރުން ނުފެންނަ ކަމަށެވެ.

ކޯޗް ބުނީ މިއީ ވަރަށް ހިތާމަކުރާ ކަމެއް ކަމަށާއި، ފުޓްބޯޅައަށް އިހު އޮތް ފޯރި ވަރަށްބޮޑަށް ދަށްވެފައިވާކަމަށެވެ. 

ސަޕޯޓަރުން ދަނޑަށް ނުވަންނަ މައްސަލާގައި ޤައުމީޓީމްގެ ކޯޗް ކަންބޮޑުވުން ފާޅުކުރިއިރު، ރޭ ބަންގްލަދޭޝްގެ މެޗްގައި ހިނގާދިޔަ ކަންތައްތަކާ ގުޅިގެން ދިވެހހި ސަޕޯޓަރުންނާއި ފުޓްބޯޅަ އާއިލާގެ ބައެއް މީހުންވެސް ވަނީ ރައްޖޭގެ ބައެއް ކުޅުންތެރިންގެ އަމަލުތަކާ މެދު ނުރުހުން ފާޅުކޮށް ސޯޝަލް މީޑިއާގައި އެމީހުންގެ ޝުއޫރުތައް ފާޅުކޮށްފައެވެ.

ބައެއް މީހުން ބުނީ މިއީ ޤައުމީޓީމްގެ ކުޅުންތެރިން ސަޕޯޓަރުންގެ އިތުބާރު އެންމެބޮޑަށް ހޯދަންޖެހޭ ވަގުތުކަމަށާއި، ރޭގެ މެޗްގެ ފަހުވަގުތުގައި ބައެއް ކުޅުންތެރިންގެ ފަރާތުން ފެނިގެންދިޔަ ކަންތައްތައް ބަލައި ނުގަނެވޭނެކަމަށެވެ. އެގޮތުން މުބާރާތުގެ އެންމެ ފުލުގައި އޮވެ، ކުޅުނު އެންމެ ފަހުމެޗްގައި ކުޅުންތެރިން ޕްރެޝަރުގައި އިދިކޮޅު ކުޅުންތެރިންނާ ކުރިމަތިލުމުގެ މާނައެއް ނެތްކަމަށް ބައެއް މީހުން ވަނީ ފާހަގަކޮށްފައވެެ.