ހުޅުމާލެ ފޭސް ދޭއްގައި ހުންނަ ހިޔާ ޓަވަރުތަކުގެ ތެރެއިން ދެ ޓަވަރެއްގެ ކޮމާޝަލް ޔުނިޓު ކުއްޔަށް ދޫކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހުޅުވާލައިފިއެވެ.

އެޗްޑީސީން ބުނީ މި ފުރުސަތަކީ އޯޕަން މާކެޓް ޑިމާންޑަށް ހުޅުވާލައިގެން، ވިޔަފާރިތަކަށް ފުރުސަތު ދިނުމުގެ ގޮތުން ހުޅުވާލި ފުރުސަތެއް ކަމަށެވެ. މި މަޝްރޫޢުގެ ދަށުން ކުއްޔަށް ދޫކުރުމަށް ހަމަޖެހިފައިވަނީ ދެ ޔުނިޓެކެވެ. އެއީ 546.27 އަކަފޫޓުގެ ޔުނިޓަކާއި، 554.66 އަކަފޫޓުގެ ޔުނިޓެވެ.

މިކަމާ ގުޅޭގޮތުން މަޢުލޫމާތު ދިނުމަށް ބާއްވާ ޕްރީ-ޕްރޮޕޯޒަލް މީޓިންގ އޮންނާނީ 14 ޖޫން 2026 ވާ އާދިއްތަ ދުވަހުގެ ހެނދުނު 10:00 ގައި ޒޫމް މެދުވެރިކޮށެވެ. އަދި އެއްވެސް ސުވާލެއް އޮތްނަމަ 17 ޖޫން 2026 ގެ މެންދުރު 14:00 ގެ ކުރިން [email protected] އަށް އީމެއިލް މެދުވެރިކޮށް ހުށަހެޅުމަށް އެޗްޑީސީން ވަނީ އެދިފައެވެ.

ސުވާލުތަކަށް ޖަވާބު ދިނުމަށް ހަމަޖެހިފައިވަނީ 21 ޖޫން 2026 ގައެވެ.

ޕްރޮޕޯޒަލް ހުށަހެޅުމަށް ހަމަޖެހިފައިވަނީ 1 ޖުލައި 2026 ވާ ބުދަ ދުވަހުގެ މެންދުރު 13:00 އާއި 14:00 އާ ދެމެދު އެޗްޑީސީ ބިލްޑިންގުގެ ގްރައުންޑް ފްލޯގައި ހުންނަ އެގްޒިބިޝަން ސެންޓަރަށެވެ. ޕްރޮޕޯޒަލް ކަނޑާނީ ހަމަ އެ ދުވަހުގެ 14:00 ގައެވެ. އެޗްޑީސީން ބުނީ ޕްރޮޕޯޒަލް ހުށަހަޅާއިރު ބިޑް ސެކިއުރިޓީ ހުށަހަޅަންވާނެ ކަމަށެވެ.

މިކަމާ ގުޅޭ ރިކުއެސްޓް ފޯ ޕްރޮޕޯޒަލް ޑޮކިއުމަންޓް އެޗްޑީސީގެ ކޯޕަރޭޓް ވެބްސައިޓް www.hdc.mv އަދި މައިހުޅުމާލެ ޕްރޮޕަޓީސް ވެބްސައިޓުން properties.hdc.mv ޑައުންލޯޑް ކުރެވޭނެއެވެ. އިތުރު މަޢުލޫމާތު ހޯއްދެވުމަށް އެޗްޑީސީގެ ސޭލްސް ސެކްޝަނުގެ ނަންބަރު 3353535 އަށް ގުޅުއްވުމަށް އެ ކޯޕަރޭޝަނުން އިލްތިމާސްކުރެއެވެ.