ރ.އިންނަމާދޫ ވޮލީދަނޑު މައްސަލާގައި އެދަނޑަށް ކުޅެންދާ އެރަށުގެ އަންހެނުންނާއި ފިރިހެނުންނާ ދެމެދު އަރާރުމެއް އުފެދިއްޖެއެވެ.

ވޮއިސްއަށް މައުލޫމާތު ލިބިފައިވާ ގޮތުގައި މި މައްސަލަ ގޯސްވީ އެރަށު ސްޕޯޓްސް އެރީނާގައި ހިމެނޭ ވޮލީ ކޯޓަށް އަންހެނުން ކުޅެންދާއިރު ދަނޑުގައި ހުންނަ ވަސީލަތްތަކަށް ގެއްލުންދީފައި ހުންނަ މައްސަލާގައެވެ. މި މައްސަލަ މިހާރު ވަނީ އެރަށު ކައުންސިލްގެ ސަމާލުކަމަށްވެސް އައިސްފައެވެ.

މިކަމާ ގުޅިގެން އިންނަމާދޫ ކައުންސިލުން ނެރުނު ބަޔާނެއްގައި ބުނެފައިވަނީ، ސްޕޯޓްސް އެރީނާގައި ހިމެނޭ ކުޅިވަރުދަނޑުތަކާއި އެނޫންވެސް އެފަދަ ބިންތަކަކީ ކައުންސިލްގެ ބެލުމުގެ ދަށުގައިވާ ތަންތަން ކަމަށެވެ. ކައުންސިލުން ބުނީ އެތަންތަނަކީ ކުޅިވަރަށް ލޯބިކުރާ ހަމަ ކޮންމެ ފަރާތަކަށްވެސް ހަމަހަމަ ގޮތެއްގައި ބޭނުންކުރެވޭނެ ތަންތަން ކަމަށެވެ. 

ކައުންސިލުން ބުނީ ވޮލީދަނޑުގައި އަންހެނުން އަދި ފިރިހެނުން ކުޅެމުންދާއިރު ދެފަރާތުގެ ދެމެދުގައި ހަމަނުޖެހުން އުފެދި އަދި ވޮލީދަނޑުގައި ހުރި ވަސީލަތްތަކަށް ބަޔަކު ގެއްލުންދިން މައްސަލަ ހަރުކަށި އިބާރާތުން ކުށްވެރިކުރާ ކަމަށެވެ. 

ކައުންސިލުން ބުނީ ވަކި ގޮތަކަށް ދަނޑުގައި ކުޅުމުގެ އިންތިޒާމްތައް ހަމަޖައްސަންދެން މިއަދުން ފެށިގެން ވޮލީދަނޑު ވަގުތީގޮތުން ބަންދުކޮށްފައިވާކަމަށެވެ. އަދި ދަނޑު ބަންދުކޮށްފައިވަނިކޮށް އެއްވެސް ފަރާތަކުން އެތަނުގައި ކުޅޭނަމަ އެކަން ހުއްޓުވުމަށް ޤާނޫނީގޮތުން އަލަންޖެހޭ ފިޔަވަޅުތައް އަޅާނޭކަމަށް ކައުންސިލުން ވަނީ ބުނެފައެވެ.

މި މައްސަލާގައި އެރަށަށް ނިސްބަތްވާ ބައެއް އަންހެނުން ސޯޝަލް މީޑިއާގައި ބުނެފައިވަނީ، އަންހެނުން ދަނޑަށް ކުޅެންދާއިރު، ފިރިހެނުން ދަނޑުގައި ހުންނަ ބައެއް އެއްޗެހި ނަގައި ނުކުޅެވޭގޮތް ހަދާފައި ހުންނަ ކަމަށެވެ.