ވޯލްޑް ކަޕް ފުޓްބޯޅަ މުބާރާތުގައި އިންސާފުކުރުމަށް އެމެރިކާއަށް ދިޔުމުން، އެ ގައުމަށް އެތެރެވިޔަނުދީ އަނބުރާ ފޮނުވާލި ސޯމާލިއާގެ މަޝްހޫރު ރެފްރީ އުމަރު އަރުތާނަށް ސޯމާލިއާގެ ވެރިރަށް މޮގަދިޝޫއިން ބަތަލެއްގެ ދަރަޖައިގައި ހޫނު މަރުޙަބާއެއް ކިޔައިފިއެވެ.

އެފްރިކާގެ އެންމެ މޮޅު ރެފްރީގެ ޝަރަފު ހޯދާފައިވާ އުމަރު އަރުތާން ބުދަ ދުވަހު މޮގަދިޝޫގެ އަދަން އައްދޭ އިންޓަނޭޝަނަލް އެއާޕޯޓަށް ދިޔުމުން، ރަންވޭ މަތިން އޭނާއަށް މަރުޙަބާ ދެންނެވީ ސޯމާލިއާ ސަރުކާރުގެ އިސް އޮފިޝަލުންނެވެ. އަދި އެއާޕޯޓުން ބޭރުގައި ގިނަ އަދަދެއްގެ ސަޕޯޓަރުން ވަނީ އުފާފާޅުކުރުމާއެކު އޭނާއަށް މަރުޙަބާ ކިޔާފައެވެ.

އެއްވެފައިވާ މީހުންނާ މުޚާތަބުކުރަމުން އަރުތާން ބުނީ، ކޮންމެ ހާލަތެއްގައިވެސް ގައުމާ މެދު އުންމީދު ކަނޑާނުލުމަށް ޒުވާނުންނަށް ގޮވާލާ ކަމަށެވެ.

"ސޯމާލިއާއަކީ އަހަރެމެން އެންމެންގެ ގައުމު. ރަނގަޅު ވަގުތުތަކުގައާއި ދަތި އުނދަގޫ ވަގުތުތަކުގައިވެސް ގައުމާ މެދު އޮތް އުންމީދު ދޫކޮށްނުލުމަށް ޒުވާނުންގެ ކިބައިން އެދެން،" އޭނާ ބުންޏެވެ.

ވޯލްޑް ކަޕްގައި އިންސާފުކުރާ ފުރަތަމަ ސޯމާލިއާ ރެފްރީގެ ޝަރަފު ހޯދުމަށް ކުރި ދަތުރުގައި، އިސްތަންބޫލް މަގުން މިއާމީ އިންޓަނޭޝަނަލް އެއާޕޯޓަށް އަރުތާން ދިޔައީ ސައްހަ ވިސާއަކާއެކުގައެވެ. ނަމަވެސް، އެމެރިކާގެ ބޯޑަރު އޮފިސަރުން ވަނީ އޭނާ އެތެރެވުން ހުއްޓުވައި، "ވެޓިންގ" މައްސަލަތަކެއް ހުރި ކަމަށް ބުނެ އަނބުރާ އިސްތަންބޫލަށް ފޮނުވާލާފައެވެ.

މި މައްސަލައާ ގުޅިގެން ސޯމާލިއާގެ މިނިސްޓްރީ އޮފް ޔޫތު އެންޑް ސްޕޯޓްސްއިން ބުނީ، މިއީ ވަރަށް ހިތާމަވެރި ނިންމުމެއް ކަމަށާއި، މިކަމުގައި ޑިޕްލޮމެޓިކް ގޮތުން ގިނަ މަސައްކަތްތަކެއް ކުރެވުނު ނަމަވެސް އެމެރިކާގެ ނިންމުން ބަދަލުނުވި ކަމަށެވެ.

ފީފާއިން ބުނެފައިވަނީ މިއީ އެމެރިކާގެ އިމިގްރޭޝަން އިދާރާތަކުގެ އިޚްތިޞާޞްގެ ތެރޭގައި ހިމެނޭ ކަމެއް ކަމަށެވެ. ނަމަވެސް ސޯމާލިއާގެ އޮފިޝަލުން ތުހުމަތުކުރާ ގޮތުގައި މިކަމުގެ ޒިންމާ ފީފާއިންވެސް އުފުލަންޖެހޭނެއެވެ.

އެމެރިކާގެ ރައީސް ޑޮނަލްޑް ޓްރަމްޕް ސޯމާލިއާއަށް އަމާޒުކޮށް ހަރުކަށި ދަތުރުފަތުރުގެ ހުރަސްތަކެއް ކުރިންވެސް އަޅާފައިވާއިރު، ކުރީގެ ސޯމާލިއާގެ ސަފީރު އަބޫކަރް އަރުމާން ބުނީ މިއީ ސޯމާލިއާއާ މެދު ޓްރަމްޕް ގެންގުޅޭ ނޭދެވޭ ސިޔާސަތުގެ ނަތީޖާ ކަމަށެވެ.

އުމަރު އަރުތާނަކީ 1991 ވަނަ އަހަރު ސޯމާލިއާގެ ދާޚިލީ ހަނގުރާމައަށްފަހު، އެ ގައުމުގެ ކުޅިވަރުގެ ދާއިރާއިން ބައިނަލްއަގުވާމީ މައިދާނުގައި ފާހަގަކޮށްލެވުނު އެންމެ ބޮޑު އެއް ޝަޚްޞިއްޔަތެވެ. އޭނާ ވަނީ ބައިނަލްއަޤުވާމީ ގިނަ މުބާރާތްތަކުގައި ރެފްރީކަން ކޮށްދީފައެވެ.