ސައުދީ އަރަބިއްޔާގެ މަދީނާ ޕްރޮވިންސުން، އިސްލާމީ އުންމަތުގެ ދެވަނަ ޚަލީފާ އުމަރު ބިން އަލްޚައްޠާބުގެ ނަންފުޅު ހިމެނޭ ތާރީޚީ ލިޔުންތަކެއް ފެނިއްޖެއެވެ.

ސައުދީ ހެރިޓޭޖް ކޮމިޝަނުން މިކަން ހާމަކޮށްފައިވަނީ މިދިޔަ އަންގާރަ ދުވަހުއެވެ.

މި ލިޔުންތައް ފެނިފައިވަނީ މަދީނާ ޕްރޮވިންސްގެ އަލް މަހްދު ގަވަރުނަރޭޓުގައި ކުރިއަށްގެންދިޔަ ސާވޭގެ ފުރަތަމަ އަދި ދެވަނަ ފޭސްގެ ތެރެއިންނެވެ. މި ސާވޭގައި ޖުމްލަ 1,774 އާސާރީ ހޯދުމެއް ވަނީ ފެނިފައެވެ.

ސާވޭ ޓީމުތަކުން ވަނީ މި ސަރަހައްދުން ކުރިން ނޭނގި އޮތް 173 އާސާރީ ސަރަހައްދެއް ޑޮކިއުމަންޓް ކޮށްފައެވެ. މިއީ އެ ސަރަހައްދުގެ ތާރީޚީ އަދި ސަގާފީ މުއްސަނދިކަން ހާމަކޮށްދޭ ވަރަށް މުހިންމު ހޯދުމެއް ކަމަށް ކޮމިޝަނުން ފާހަގަކުރެއެވެ.

މި ހޯދުންތަކުގެ ތެރޭގައި އެންމެ ފާހަގަކޮށްލެވެނީ އުމަރުގެފާނުގެ ނަންފުޅު ހިމެނޭ ހިލައިގެ ކުރެހުމެވެ. އެގޮތުން އެ ހިލައިގައި އެންގްރޭވް ކޮށްފައިވާ  ޢިބާރާތުގައިވަނީ "الله އަކީ ދުނިޔެއާއި އާޚިރަތުގައި ޢުމަރު ބިން އަލްޚައްޠާބުގެ އެހީތެރިޔާއެވެ“ މިފަދައިންނެވެ. 

ހެރިޓޭޖް ކޮމިޝަން ބުނެފައިވާ ގޮތުން މި ހޯދުމަކީ އިސްލާމީ ކުރީގެ ތާރީޚާ ގުޅޭގޮތުން ފެނުނު ވަރަށް މުހިންމު ހެއްކެކެވެ.

އަދި މި ލިޔުން ލިޔެވިފައިވަނީ އިސްލާމީ ޢަރަބި ސްކްރިޕްޓްގެ ތެރެއިން އެންމެ ދުވަސްވީ އެއް ވައްތަރު ކަމަށްވާ 'ޙިޖާޒީ' ސްކްރިޕްޓް އިންނެވެ.

ސަޢުދީގެ ދިރާސާކުރާ ފަރާތްތަކުން ދެކޭގޮތުގައި، މި ހޯދުމުގެ ސަބަބުން ޢުމަރު ބިން އަލްޚައްޠާބުގެ ދީނީ އަދި ތާރީޚީ ރަމްޒީ މުހިންމުކަން އިތުރަށް ހާމަވެ، އެކަމާ ގުޅޭ ތާރީޚީ ލިޔެކިޔުންތައް ފުރިހަމަކުރުމަށް ބޮޑު ބާރަކަށް ވެގެންދާނެއެވެ.

މީގެ އިތުރުން، ހިލައިގައި ކަނޑާނަގައިގެން ލިޔެފައިވާ ގަދީމީ އަރަބި ޅެންތައް ވެސް ވަނީ ފެނިފައެވެ.

ކޮމިޝަނުން އާންމުކުރި ތަފާސްހިސާބުތަކަށް ބަލާއިރު، މި ހޯދުންތަކުގެ ތެރޭގައި ހިމެނެނީ:

1,259 ހިލައިގެ ކުރެހުން

461 އިސްލާމީ ލިޔުން

ޘަމޫދު ބަހުން ލިޔެފައިވާ 34 ލިޔުން

11 ހިލައިގެ ބިނާ

3 ”ގަޑުވަރާއި“ އާސާރީ ބިނާ

ދަތުރުވެރިން މަގު ހޯދުމަށް ބޭނުންކުރި 2 ނިޝާން

4 ވަޅު

މުސްލިމުންގެ ދެވަނަ ޚަލީފާ އުމަރު ބިން އަލްޚައްޠާބަކީ މީލާދީން 634 އިން 644 އަށް އިސްލާމީ އުންމަތުގެ ޚަލީފާކަން ކުރެއްވި، އިސްލާމީ ތާރީޚުގައި އެންމެ ނުފޫޒުގަދަ އަދި މަޝްހޫރު އެއް ޝަޚުޞިއްޔަތެވެ.