މިފަހަރުގެ ވަރލްޑްކަޕް ހުޅުވުމުގެ ގޮތުން ކުޅުނު ފުރަތަމަ މެޗް ދެކުނު އެފްރިކާ ބަލިކޮށް މެކްސިކޯއިން ކާމިޔާބުކޮށްފިއެވެ.

މެކްސިކޯ ސިޓީގައި ކުޅުނު މިމެޗް ދެކުނު އެފްރިކާގެ މައްޗަށް އެޓީމް ކުރިހޯދާފައިވަނީ 2-0 ގެ ނަތީޖާއިންނެވެ. މެޗް ފެށިގެން ނިމުމާ ހަމަޔަށްވެސް މޮޅަށްކުޅެ ގިނަ ހަމަލާތައް އުފައްދާފައިވަނީ މެކްސިކޯ އިންނެވެ.

މެޗްގައި މެކްސިކޯއަށް ގޯލް ހުޅުވާލަދިނީ، ދެކުނު އެފްރިކާގެ ޑިފެންޑަރުންނަށް ހެދުނު ގޯހެއްގެ ފައިދާނަގައި ނުވަވަނަ މިނެޓް ތެރޭގައި ކުއިނޮނެސްއެވެ. މި ލަނޑަށްފަހު މެކްސިކޯއިން ވަނީ ކައުންޓަރ އެޓޭކްގައި ދެކުނު އެފްރިކާގެ ޑިފެންސްލައިނަށް ބާރުބޮޑުކޮށް ގޯލަށް ނުރައްކާކޮށްފައެވެ.

މެޗްގައި މެކްސިކޯގެ ދެވަނަ ލަނޑު ފެނިގެން ގޮސްފައިވަނީ، 67 ވަނަ މިނެޓްގައެވެ. މި ލަނޑު ޖަހައިދިނީ މެޗްގައި މޮޅު ކުޅުމެއް ދެއްކި ރައުލް ޖެމިނޭޒްއެވެ.

މި މެޗްގައި ގިނަ އަދަދެއްގެ ކާޑުތައް ފެނިގެން ގޮސްފައިވާއިރު، ދެކުނު އެފްރިކާގެ ދެ ކުޅުންތެރިއަކަށް އަދި މެކްސިކޯގެ ކުޅުންތެރިއަކަށްވެސް ވަނީ ރަތްކާޑު ދައްކާފައެވެ. ދެކުނު އެފްރިކާއިން ރަތްކާޑު ދައްކާފައިވަނީ، ތެމްބަޒްވަން އަދި ސިތޯލޭ އަށެވެ. މެކްސިކޯއިން ރަތްކާޑު ދެއްކީ، މޮންޓެސް އަށެވެ. މިމެޗްގައި މެކްސިކޯގެ ޒުވާން ކުޅުންތެރިޔާ ޖިލްބާޓޯ މޯރާ ވަނީ ދެވަނަ ހާފްގައި ކުޅެން ނިކުމެފައެވެ. މި މެޗަށް ނިކުތްއިރު އޭނާގެ އުމުރަކީ، 17 އަހަރެވެ.