މެލޭޝިއާގައި ދިރިއުޅޭ ދިވެހި އާއިލާތަކާއި ކިޔަވާ ކުދިންގެ މެދުގައި އެކުވެރިކަން އާލާކުރުމުގެ މަގުސަދުގައި “ދިވެހިންގެ ހޭންޑްބޯޅަ ކަޕް” ގެ ނަމުގައި ބޭއްވި ހާއްސަ މުބާރާތް ކާމިޔާބުކަމާއެކު ނިންމާލައިފި އެވެ.
ޖޫން މަހުގެ 6 ވަނަ ދުވަހު މެލޭޝިއާގައި ބޭއްވި މި މުބާރާތުގައި ޖުމްލަ 9 ޓީމަކުން ވާދަކޮށްފައިވެއެވެ. އޭގެ ތެރޭގައި ހިމެނެނީ އަންހެން 4 ޓީމާއި ފިރިހެން 5 ޓީމެވެ.
މުބާރާތުގެ ފިރިހެން ޑިވިޜަންގެ ޗެމްޕިއަންކަން ހޯދާފައިވަނީ އާރްޑީއެލް އެސްސީ
ފޯރިގަދަ ކުޅުމަކަށްފަހު މުބާރާތުގެ ފިރިހެން ޑިވިޜަންގެ ޗެމްޕިއަންކަން ހޯދާފައިވަނީ އާރްޑީއެލް އެސްސީ އެވެ. އަދި އަންހެން ޑިވިޜަންގެ ޗެމްޕިއަންކަން ހޯދީ އާޖީލަކަށް ޓީމެވެ.
މި މުބާރާތުގެ ވަނަވަނައަށް ދިޔަ ޓީމުތަކަށް ވަނީ ފައިސާގެ އިނާމު ހުށަހަޅާފައެވެ. އެގޮތުން ކޮންމެ ޑިވިޜަނަކުން އެއްވަނައަށް ދިޔަ ޓީމަށް 750 މެލޭޝިއަން ރިންގިޓް ދީފައިވާއިރު، ރަނަރަޕް ޓީމުތަކަށް ދީފައިވަނީ 300 ރިންގިޓެވެ.
އަންހެން ޑިވިޜަންގެ ޗެމްޕިއަންކަން ހޯދީ އާޖީލަކަށް
މުބާރާތުގެ ފިރިހެން ޑިވިޜަންގެ ރަނަރަޕްކަން އާޖީލް ހޯދިއިރު، އަންހެން ޑިވިޜަންގެ ރަނަރަޕްކަން ހޯދާފައިވަނީ ހަވަރު ސްޕޯޓްސް އެވެ.
މެލޭޝިއާގައި ދިރިއުޅޭ ދިވެހިންގެ މެދުގައި ކުޅިވަރުގެ ރޫހު އާލާކޮށް، އެކަކު އަނެކަކާ ބައްދަލުވެ ގުޅުން ބަދަހިކުރުމުގެ ފުރުސަތު ހޯދައިދިނުމަށް ބޭއްވި މި މުބާރާތަށް ވަރަށް ތަރުހީބެއް ލިބުނެވެ.
Advertisement
This content is created and paid for by advertisers and does not involve Voice Journalists
