އެމްޑީޕީގެ ޗެއާޕާސަން އިންތިޚާބުގެ ވޯޓުލުން ކުރިއަށް ދަނިކޮށް ފ. ފީއަލީ ވޯޓުލާ މަރުކަޒުގައި ބަހައްޓާފައި ހުރި ވޯޓު ބަޔަކު ނަގައިގެން ގެންގޮސްފިއެވެ.

މައުލޫމާތު ލިބިފައިވާ ގޮތުގައި ވޯޓު ފޮށި ނެގީ ކުރީގެ ރައީސް މުހައްމަދު ނަޝީދުގެ ސަޕޯޓަރުންނެވެ.

އެގޮތުން ސަޕޯޓަރުންތައް ވަނީ ވޯޓުލާ މަރުކަޒުގައި ހުރި އޮފިޝަލެއްގެ އަތުން ފޮށި ގަދަ ކަމުން އަތުލައި މަރުކަޒުން ބޭރަށް ގެންގޮސްފައެވެ. 

ފީއަލީގައި މިފަދަ ކަމެއް ފެންމަތިވެފައިވާއިރު، ފީއަލީގެ ވޯޓުލާ މަރުކަޒާ ގުޅިގެން ޗެއާޕާސަން ކަމަށް ވާދަކުރައްވާ މީކާއިލް އަހުމަދު ނަސީމް ވަނީ ކަންބޮޑުވުންފާޅުކުރައްވާފައެވެ. އެގޮތުން، ސުކޫލްތަކުގައި ފޮށި ބަހައްޓަން ނިންމާފައިވަނިކޮށް ފީއަލީ ހަރުގޭގައި ފޮށި ބަހައްޓާތީ އޭނާ އެކަން ވަނީ ފާހަގަކުރައްވާފައެވެ. އަދި ފ. ފީއަލީގެ ކެމްޕެއިނުގައި ކުރެއްވި ދަތުރުގައި ނަޝީދުގެ ސަޕޯޓަރުން ފާޅުގައި ވޯޓު ފޮށްޓަށް ގަނޑުކޮށް ވޯޓު އަޅާނެ ކަމަށް ބުނެފައިވާ ކަންވެސް އޭނާ ފާހަގަކުރެއްވިއެވެ.

އެއާއެކު ފީއަލީ ވޯޓު ފޮށި އެރަށު ސުކޫލުގައި ބަހައްޓާ ގޮތަށް ވަނީ ނިންމާފައެވެ. 

ފީއަލީގެ އިތުރުން ފިޔޮރީގައި ވެސް ވޯޓުލާ މަރުކަޒުގައި ހަމަނުޖެހުން ތަކެއް ހިނގައި، މަރުކަޒުގައި ބަހައްޓާފައި ހުރި ވޯޓު ފޮށި ވަނީ ފަޅާލާފައެވެ.