މިއަދު އޮތް އެމްޑީޕީގެ ޗެއާޕާސަން އިންތިހާބުގައި ކުރީގެ ރައީސް މުހައްމަދު ނަޝީދު ބޮޑު ތަފާތަކުން ކުރި ހޯދާނެ ކަމަށް ބެލެވެން ފަށައިފި އެވެ.

މިހާތަނަށް ނަތީޖާ ލިބުނު ގިނަ ފޮށިތަކުން ނަޝީދު ވަނީ ބޮޑު ތަފާތަކުން ކުރި ހޯއްދަވާފަ އެެވެ. މަދު ބައެއް ވޯޓްފޮށި ތަކުން މީކާއީލް ވެސް ކުރި ހޯއްދަވާފައިވެ އެވެ.

ނަޝީދުގެ ޓީމުގެ އެންމެ އިސް މެންބަރު, ކުރީގެ ޗެއާޕާސަން ފައްޔާޒް އިސްމާއީލް މިހާރު ވަނީ ކާމިޔާބު ވެސް އިއުލާނުކުރައްވާފަ އެވެ.

"މަރުހަބާ ރައީސް ނަޝީދު. މަރުހަބާ އެމްޑީޕީ މެންބަރުން. މާތް اللهގެ ވާގިފުޅާއެކު އަޅުގަނޑުމެންނަށް ކާމިޔާބަށް ވާސިލުވެވިއްޖެ. މި ލިބުނު ކުޑަ ދުވަސްކޮޅު ތެރޭ މުޅި ރާއްޖޭގައި ރީނދޫ ލަޝްކަރު ރުކުރުވާލެވިފައި އޮތް މަންޒަރު ފެނުމަކީ ބޮޑު އުފަލެއް. މި ކެމްޕޭނުގައި ވަރަށް ބުރަކޮށް މަސައްކަތް ކުރެއްވި ކެމްޕޭން ޓީމަށް ވަރަށް ބޮޑަށް ޝުކުރިއްޔާ," ފައްޔަ ކުރެއްވި ޕޯސްޓެއްގައި ވެ އެވެ.

‏ފައްޔަ ވަނީ އިންތިހާބުގައި ބައިވެރިވެ ވޯޓު ދެއްވި ހުރިހާ އާންމު މެންބަރުންނަށް ހާއްސަ ޝުކުރެއް ދަންނަވާފަ އެވެ. އަދި ވިދާޅުވީ މިއަދު ސާބިތުކޮށްދެއްވީ އެ ޕާޓީގެ މިސްރާބު ކަނޑައަޅައިދޭ، ޕާޓީގެ ވިންދަކީ އާންމު މެންބަރުން ކަމެވެ.

"ހިތަށް ވީ ތަދުގެ ބަދަލު ހޯދުމަށް ވުރެ މި ރާއްޖެ އިސްކޮށް ތިޔަ ދެއްވީ މުހިންމު ވޯޓެއް," ފައްޔަ ވިދާޅުވި އެވެ.

‏ފައްޔަ ވަނީ ގަލޮޅު ދެކުނު ދާއިރާގެ މެންބަރު މީކާއިލް ނަސީމާއި ކެމްޕޭން ޓީމުން ދެއްކި ހިތްވަރަށް ވެސް ސާބަސް ދަންނަވާފަ އެވެ. އަދި ވިދާޅުވީ ދެން އޮތީ އެންމެން އެކުގައި ގޮސް މި ސަރުކާރު ބަލިކުރުން ކަމަށެވެ. ބަދަހި ސަފުތަކަކާއެކު ނުކުމެ އެ މަސައްކަތް ކާމިޔާބުކުރާނެ ކަމަށްވެސް ވިދާޅުވި އެވެ.

‏"އެމްޑީޕީ މެންބަރުން ބޮޑު ބަދަލަކަށް ތައްޔާރުކަން ސާބިތުކޮށްދެއްވައިފި. ރައީސް ނަޝީދަށް ތި ދެއްވި ވޯޓާއެކު 'ބޮޑު ބަދަލު' މި ރާއްޖެއަށް ގެނައުމުގެ މަސައްކަތް މިއަދު މިދިޔައީ ފެށިގެން. އެމްޑީޕީ ކުރިއަށް," ފައްޔަ ވިދާޅުވި އެވެ.