މިއަދު އޮތް އިންތިހާބުން ކުރީގެ ރައީސް ނަޝީދު ހޯއްދެވި ކާމިޔާބީއަށް އެމަނިކުފާނާއި ވާދަކުރެއްވި މީކާއީލް އަހްމަދު ނަސީމް މަރުހަބާ ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި މިކާއީލް ވަނީ އިންތިހާބުގެ ނަތީޖާ ގަބޫލުކުރައްވާ ރައީސް ނަޝީދަށް މަރުހަބާ ވިދާޅުވެފަ އެވެ.
"އިރުކޮޅެއް ކުރިން ރައީސް ނަޝީދަށް ފޯނުކޮށް، އެމަނިކުފާނަު ހޯއްދެވި ފުރިހަމަ ކާމިޔާބަށް މަރުހަބާ ދެންނެވިން," މީކާއީލް ކުރެއްވި ޕޯސްޓްގައި ވިދާޅުވި އެވެ.
އަދި ވިދާޅުވީ އެމްޑީޕީ އެކަތިގަނޑެއްގެ ގޮތުގާ ބާއްވާ 2028 އެ ޕާޓީއަށް ކާމިޔާބުކޮށްދިނުމަށް އާ އަޒުމެއްގައި މަސައްކަތް ކުރައްވާނެ ކަމަށެވެ.
އޭނާ ވަނީ ޕާޓީގެ އާންމު މެންބަރުންނާއި އެކު ދެމިހުންނަވާނެ ކަމުގެ ޔަގީންކަން ދެއްވާފަ އެވެ.
މިއަދު އޮތް އެމްޑީޕީގެ ޗެއާޕާސަން އިންތިހާބުގައި ކުރީގެ ރައީސް މުހައްމަދު ނަޝީދު ކުރި ހޯއްދެވީ ބޮޑުތަފާތަކުންނެވެ.
މިހާތަނަށް ނަތީޖާ ލިބުނު ގިނަ ފޮށިތަކުން ނަޝީދު ވަނީ ބޮޑު ތަފާތަކުން ކުރި ހޯއްދަވާފަ އެެވެ. މަދު ބައެއް ވޯޓްފޮށި ތަކުން މީކާއީލް ވެސް ކުރި ހޯއްދަވާފައިވެ އެވެ. މީކާއީލް ނިސްބަތްވާ ދާއިރާއިން ވެސް ކުރި ހޯއްދެވީ ވެސް ނަޝީދެވެ.
ސިޓީތަކާއި ބޮޑެތި ރަށްތަކުން ވެސް ކުރި ހޯއްދެވީ ވެސް ރައީސް ނަޝީދެވެ.
މި އިންތިހާބު ބޮޑު ތަފާތަކުން ކާމިޔާބު ކުރައްވާނެ ކަމަށް ނަޝީދު ގެންދެވީ ތަކުރާރުކޮށް ވިދާޅުވަމުންނެވެ. މީކާއީލް ވެސް ވަނީ އިންތިހާބު ކާމިޔާބު ކުރައްވާނެ ކަމަށް ވިދާޅުވެފަ އެވެ.
ނަޝީދުގެ ސަޕޯޓަރުން މިހާރު ވަނީ އުފާފާޅުކުރުމަށް އާޓިފިޝަލް ބީޗަށް ޖަމާވެފަ އެވެ. ނަޝީދުވެސް ވަނީ އެ ސަރަހައްދަށް ވަޑައިގެންފަ އެވެ. އަދި މެންބަރުންނާއި ސަލާމް ކުރައްވާ އުފާފާޅުކުރުމުގައި ދަނީ ބައިވެރިވަމުންނެވެ.
Advertisement
This content is created and paid for by advertisers and does not involve Voice Journalists
