މިއަދު އޮތް އެމްޑީޕީގެ ޗެއާޕާސަން އިންތިހާބުގައި މީކާއީލް އަހްމަދު ނަސީމަށް މެޖޯރިޓީ ލިބުނީ ޅ އަތޮޅުން އެކަނި ކަމަށް ވަގުތީ ނަތީޖާތަކުން ދައްކައިފި އެވެ.

މިއަދު މުޅި ރާއްޖޭގައި އޮތް އެމްޑީޕީގެ ޗެއާޕާސަން އިންތިހާބުގައި 50,000 ވުރެ ގިނަ މެންބަރުންނަށް ވޯޓްލުމުގެ ހައްގު ލިބިފައި އޮތެވެ. ވޯޓްލީ 30,626 މެންބަރުންނެވެ. ސައްހަ ވޯޓްގެ އަދަދަކީ 30,363 ވޯޓެވެ.

މި އިންތިހާބު ކާމިޔާބު ކުރެއްވި ކުރީގެ ރައީސް މުހައްމަދު ނަޝީދު ވަނީ 20,943 ވޯޓް ހޯއްދަވާފަ އެވެ. އެއީ ވޯޓްލީ މީހުންގެ 69 އިންސައްތަ ވޯޓެވެ.

މީކައީލަށް ލިބިވަޑައިގަތީ 9,251 ވޯޓެވެ. އެއީ ވޯޓްލީ މީހުންގެ 30 އިންސައްތަ އެވެ. އިބްރާހިމް މުހައްމަދަށް 169 ވޯޓް ލިބިފައިވެ އެވެ.

މިއަދު އޮތް އިންތިހާބުގައި އެންމެ އަތޮޅެއް ފިޔަވާ ހުރިހާ އަތޮޅަކުން މެޖޯރިޓީ ހޯދީ ނަޝީދެވެ.

މީކާއީލަށް މެޖޯރިޓީ ލިބުނީ ޅ އަތޮޅުން އެކަންޏެވެ. އެއީ ރައީސް ސޯލިހް ނިސްބަތްވެވަޑައިގަންނަވާ ހިންނަވަރުން ހޯއްދެވި ބޮޑު ކާމިޔާބީގެ ސަބަބުންނެވެ.

އެ އަތޮޅުން މީކާއީލް ވަނީ 547 ވޯޓް ހޯއްދަވާފަ އެވެ. ނަޝީދަށް ލިބިވަޑައިގަތީ 423 ވޯޓެވެ.

މިއަދު އޮތް އިންތިހާބުގައި ހުރިހާ ސިޓީތަކުން ނަޝީދު ވަނީ ބޮޑު އަޣްލަބިއްޔަތެއް ހޯއްދަވާފަ އެެވެ. އެގޮތުން މާލެ ސިޓީން ނަޝީދު ވަނީ 3,601 ވޯޓް ހޯއްދަވާފަ އެވެ. މީކާއީލަށް ލިބިވަޑައިގަތީ 1,502 ވޯޓެވެ.

އައްޑޫ ސިޓީން ނަޝީދަށް 2,344 ވޯޓް އަދި މީކާއީލަށް 1,083 ވޯޓް ލިބިވަޑައިގެންފައިވެ އެވެ.

ފުވައްމުލަކު ސިޓީޞް ނަޝީދަށް 890 ވޯޓް ލިބިވަޑައިގެންނެވިއިރު މިކާއިލަށް ލިބިވަޑައިގަތީ 237 ވޯޓެވެ. ތިނަދޫ ސިޓީން ނަޝީދަށް 563 ވޯޓް އަދި މީކާއީލަށް 252 ވޯޓް ލިބިވަޑައިގެންފައިވެ އެވެ.

އުތުރުގެ ކުޅުދުއްފުށި ސިޓީން ނަޝީދު ވަނީ 288 ވޯޓް ހޯއްދަވާފަ އެވެ. މީކާއިލަށް ލިބިވަޑައިގަތީ 146 ވޯޓެވެ