ދ.މީދޫގައި މިއަދު ކުރިއަށްދިޔަ ކައުންސިލް ރައިސް ހޮވުމުގެ ވޯޓުލުމުގެ އިންތިޒާމުތައް ހަމަޖެހިފައިހުރީ ވަރަށް ރަނގަޅަށްކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ބުނެފިއެވެ.

އިންތިހާބުގެ ކަންކަން ކުރިއަށްދިޔަ ގޮތާ ބެހޭގޮތުން އެޗްއާރުސީއެމުން ނެރުނު ބަޔާނުގައި ބުނެފައިވަނީ، ވޯޓު ނެގުމުގެ ކަންކަން މައިގަނޑު ގޮތެއްގައި ކުރިއަށް ގޮސްފައިވަނީ، ސުލްހަވެރިކަމާއި އަމާންކަމާއި އޮމާންކަމާއެކުގައެވެ. އެޗްއާރުސީއެމުން ބުނީ، ރައްޔިތުންގެ ބައިވެރިވުން އޮންނަ މި އިންތިހާބަކި މިނިވަން، އިންސާފުވެރި، ހާމަކަން ބޮޑު އަދި އިތުބާރުކުރުވަނިވި ވޯޓެއްތޯ ކަށަވަރު ކުރުމަށް އިންތިހާބުގެ ވޯޓުލުމުގެ ކަންކަން ކުރިޔަށްދިޔަގޮތް އެ ކޮމިޝަނުން ބަލާފައިވާކަމަށެވެ.

ކޮމިޝަނުން ބުނީ ވޯޓުލުމުގެ އިންތިޒާމުތަކާއި، ވޯޓު ނެގުމުގެ ކަންކަން އިލެކްޝަންސް ކޮމިޝަނުން ކުރިއަށް ގެންގޮސްފައިވަނީ ޖުމްލަގޮތެއްގައި "ފުރިހަމަ އިންތިޒާމުތަކެއްގެ ތެރެއިންކަން ފާހަގަކުރާ ކަމަށެވެ. އެގޮތުން ވޯޓުލުމުގެ ކަންކަން ކުރިއަށްދިޔައިރު ކަމާބެހޭ ފަރާތްތަކުންވެސް ވަރަށް ގާތުން ހަރަކާތްތެރިވިކަން ވަނީ ފާހަގަކޮށްފައެވެ.

އިންތިހާބުގައި ރަނގަޅުކޮށްލަން ޖެހޭ ކަމެއްގެ ގޮތުގައި އެޗްއާރުސީއެމުން ފާހަގަކޮށްފައިވަނީ، ވޯޓުލުން ކުރިޔަށް "ދިޔަ ދ މީދޫގެ ދެ މަރުކަޒުގައި ނުކުޅެދުންތެރިކަނ ހުންނަ މީހުންނަށް ފަސޭހައިން ވަދެ ނިކުމެވޭނޭ އިންތިޒާމް، ހަމަޖެހިފައި ނެތްކަން އެކަންޏެވެ.