2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް ސީގައި ބްރެޒިލާއި މޮރޮކޯ ރޭ ބައްދަލުކުރި މެޗު 1-1 އިން އެއްވަރުވީ، ބްރެޒިލްގެ ކުޅުންތެރިން ހިތްއަވަސްވެ ބިރުގެންފައި ތިބީމަ ކަމަށް ކޯޗު ކާލޯ އަންޗެލޮޓީ ބުނެފިއެވެ. 

އެމެރިކާގެ ނިއު ޖާޒީގެ އީސްޓް ރަދަފޯޑްގައި ހުންނަ ސްޓޭޑިއަމްގައި ކުޅުނު މި މެޗަށްފަހު ވާހަކަދައްކަމުން އަންޗެލޮޓީ ބުނީ، މެޗުގެ ފުރަތަމަ ހާފުގައި ބްރެޒިލްގެ ކުޅުންތެރިން ފެނުނީ ވަރަށް "ނާވަސް" ކޮށް ކަމަށާއި، ޓީމުގެ ބެލެންސް ގެއްލިފައިވާ ކަމަށެވެ.

ވޯލްޑް ކަޕްގެ ގަދަ ބާރެއްގެ ގޮތުގައި ބެލެވޭ ބްރެޒިލްގެ މައްޗަށް މޮރޮކޯއިން ކުރިހޯދީ މެޗުގެ 21 ވަނަ މިނެޓުގައެވެ. ބްރެޒިލްގެ މިޑްފީލްޑަރު ލޫކަސް ޕަކޭޓާ އަތުން ބޯޅަ ގެއްލުމުގެ ފައިދާ ނަގައި، އިސްމާއީލް ސައިބާރީ ވަނީ ބްރެޒިލްގެ ގޯލްކީޕަރު އެލިސަންގެ ބޯމަތިން ބޯޅަ ފޮނުވާލައި މޮރޮކޯއަށް ކުރިހޯދައިދީފައެވެ. ނަމަވެސް، މެޗުގެ 32 ވަނަ މިނެޓުގައި ބްރެޒިލްގެ ތަރި ވިނީޝިއަސް ޖޫނިއާ ވަނީ ހިތްގައިމު ލަނޑެއް ޖަހައި ނަތީޖާ އެއްވަރުކޮށްދީފައެވެ.

"އަހަރެމެން މެޗު ފެށީ ރަނގަޅަކަށް ނޫން. ޓީމު އޮތީ ތަންކޮޅެއް ނާރވަސްވެފައި. މާ ގިނައިން ބޯޅަ ގެއްލި، ޗެލެންޖުތަކެއް ކުރިމަތިވެ ނާކާމިޔާބުވި،" އަންޗެލޮޓީ ބުންޏެވެ.

އޭނާ އިތުރަށް ފާހަގަކުރި ގޮތުގައި ދެވަނަ ހާފުގައި ކުޅުން ރަނގަޅުވި ނަމަވެސް، މޮރޮކޯ ފަދަ ވަރުގަދަ ޓީމަކާ ދެކޮޅަށް ކުޅުމަކީ އަބަދުވެސް އުނދަގޫ ކަމެކެވެ.

2022 ވަނަ އަހަރުގެ ވޯލްޑް ކަޕްގެ ސެމީ ފައިނަލާ ހަމައަށް ދަތުރުކުރި މޮރޮކޯއިން މި މެޗުގައިވެސް ވަނީ މޮޅު ކުޅުމެއް ދައްކާފައެވެ. މޮރޮކޯގެ ކޯޗު މުހައްމަދު އުއާބީ ބުނީ އޭނާގެ އަމާޒަކީ މިފަހަރު ސެމީ ފައިނަލަށްވުރެ ދުރަށް ދިއުން ކަމަށެވެ.

"މިއީ އެއް ޕޮއިންޓް. އަހަރެމެން އުއްމީދުކުރީ މިއަށްވުރެ ރަނގަޅު ނަތީޖާއަކަށް. އެކަމަކު އެއް ޕޮއިންޓަކީވެސް ގޯސް ނަތީޖާއެއް ނޫން،" އުއާބީ ބުންޏެވެ.

މި ނަތީޖާއާއެކު ގްރޫޕް ސީގެ ފޯރި މިވަނީ ގަދަވެފައެވެ. މި ގްރޫޕްގައި ދެން ހިމެނެނީ ސްކޮޓްލޭންޑާއި ހެއިޓީއެވެ. ކުރިއަށް އޮތް މެޗުގައި ބްރެޒިލް ނުކުންނާނީ ހެއިޓީއާ ދެކޮޅަށެވެ. އަދި މޮރޮކޯ ބައްދަލުކުރާނީ ސްކޮޓްލޭންޑާއެވެ.