ދުނިޔޭގެ ކަނޑުތަކުގެ ދުވަސް ފާހަގަކުރުމުގެ ގޮތުން މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އިން އިންތިޒާމުކުރާ ހާއްސަ ފަރުމަސްވެރިކަމުގެ މުބާރާތެއް ބޭއްވުމަށް ނިންމައި، އެކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.

މިނިސްޓްރީން ބުނީ، މުޅި ރާއްޖޭގެ ހުރިހާ ރަށްތަކަކަށް ހުޅުވާލައިގެން ކުރިއަށްގެންދާ މި މުބާރާތް އޮންނާނީ 19 ޖޫންވާ ހުކުރު ދުވަހު ކަމަށެވެ. މި މުބާރާތުގެ މަގްސަދަކީ ކަނޑުތަކުގެ ދުވަހުގެ މުނާސަބަތުގައި މަސްވެރިކަމުގެ ސަގާފަތް އާލާކޮށް، ކަނޑުތަކަށް އޮންނަ ލޯބި އިތުރުކުރުމެވެ.

ވަނަ ވަނައަށް އަންނަ ޓީމުތަކަށް ލިބޭ އިނާމް؛

- އެއްވަނަ ޓީމަށް 30،000 ރުފިޔާގެ ފައިސާގެ އިނާމް

- ދެވަނަ ޓީމަށް 25،000 ރުފިޔާގެ ފައިސާގެ އިނާމް

- ދެވަނަ ޓީމަށް 20،000 ރުފިޔާގެ ފައިސާގެ އިނާމް

- އެންމެ ބަރުމަސް ބާނާ މީހާއަށް 5000 ރުފިޔާގެ ފައިސާގެ އިނާމް

މިނިސްޓްރީގެ އިއުލާނުގައިވާ ގޮތުން، މާލެ ސިޓީން މި މުބާރާތުގައި ބައިވެރިވުމުގެ ފުރުސަތު ދެވޭނީ ފުރަތަމަ ފޯމު ހުށަހަޅާ ފަރާތްތަކުގެ ތެރެއިން ޝަރުތު ހަމަވާ 20 (ވިހި) ޓީމަށެވެ. އަދި ރަށްރަށުން ބައިވެރިވާނެ ޓީމު ތަކުގެ އަދަދު ކަނޑައަޅާނީ އެރަށެއްގެ ކައުންސިލުންނެވެ. ރަށްރަށުގައި މުބާރާތުގެ ކަންކަން ކުރިއަށް ގެންދިޔުމަށް ހަމަޖެހިފައިވަނީ ރަށު ކައުންސިލުންނެވެ.

މުބާރާތުގެ އާންމު ގަވާއިދު މިހާރު ވަނީ އިއުލާނާއެކު އާންމުކޮށްފައެވެ.

މުބާރާތުގައި ބައިވެރިވާން ބޭނުންވާ ފަރާތްތަކުން 17 ޖޫން 2026 ވާ ބުދަ ދުވަހުގެ މެންދުރުފަހު 14:00 ގެ ކުރިން ފޯމު ހުށަހަޅަންޖެހެއެވެ. ބައިވެރިވުމަށް އެދޭ ފޯމު (https://tinyurl.com/4xe7p9jv) މެދުވެރިކޮށް ފުރިހަމަކުރެވޭނެއެވެ.

މި މުބާރާތާ ގުޅޭ އިތުރު މައުލޫމާތު ސާފުކުރުމަށް ބޭނުންވާ ފަރާތްތަކުން މިނިސްޓްރީގެ ނަންބަރު 3339225 ނުވަތަ 3339272 އާ ގުޅުމަށް މިނިސްޓްރީން އެދެއެވެ.