ރޭގެ މެޗުން ނެރެވުނީ އުއްމީދު ކުރި ނަތީޖާއެއް ނޫން ކަމަށާ ކުރިއަށް އޮތް ތަނުގައި ހިތްވަރާއެކު ކާމިޔާބީއަށް ވާސިލް ވުމަށް އިތުރަށް މަސައްކަތް ކުރާނެ ކަމަށް ޕޯޗުގަލްގެ ކެޕްޓަން ކްރިސްޓިއާނޯ ރޮނަލްޑޯ ބުނެފިއެވެ.

ވޯލްޑް ކަޕް ގްރޫޕް ކޭގެ ފުރަތަމަ މެޗުގައި ޑިމޮކްރެޓިކް ރިޕަބްލިކް އޮފް ކޮންގޯއާ ޕޯޗުގަލް ވާދަކޮށް 1-1 އިން ވަނީ އެއްވަރުވެފައެވެ. 

އެމެރިކާގެ ހިއުސްޓަންގައި ކުޅުނު މި މެޗަށްފަހު ރޮނަލްޑޯގެ އެކްސް އެކައުންޓުގައި ކުރި ޕޯސްޓެއްގައި ބުނެފައިވަނީ، މިއީ އެ ޓީމުން އުއްމީދު ކުރި ފަދަ ފެށުމެއް ނޫން ނަމަވެސް، މުބާރާތް އަދި ނިމުމާ ގާތްވެސް ނުވާ ކަމަށެވެ. އަދި ހިތްވަރާއެކު، ދެން އޮތް މެޗަށް ފޯކަސް ކުރުމަށް އޭނާ ވަނީ އެދިފައެވެ.

މި މެޗުގައި ފެނިގެންދިޔަ ދެ ލަނޑުވެސް ފެނިގެންދިޔައީ ފުރަތަމަ ހާފުގައެވެ. މެޗުގެ ފަސްވަނަ މިނެޓުގައި ޖޮއާއޯ ނޭވްސް ބޮލުން ޖަހައި ޕޯޗުގަލްއަށް ލީޑު ނަގައިދީފައި ވަނިކޮށް، ފުރަތަމަ ހާފު ނިމެން ދަނިކޮށް ކޮންގޯގެ ޔޮއާން ވިސާ ވަނީ ބޮލުން ލަނޑެއް ޖަހައި މެޗުގެ ނަތީޖާ ހަމަހަމަކޮށްފައެވެ.

މުޅި މެޗުގައިވެސް ރޮނަލްޑޯ ކުޅެފައިވާއިރު، މިއީ އޭނާއަށް ނުހަނު އުނދަގޫ މެޗަކަށް ވެގެންދިޔައެވެ. މެޗުގެ ދެވަނަ ހާފުގައި ޕޯޗުގަލްއިން ބޯޅަ ހިފަހައްޓައިގެން ގިނަ ވަގުތު ކުޅުނު ނަމަވެސް، ކޮންގޯގެ ޑިފެންސް ފޫއަޅުވާލައި އިތުރު ލަނޑެއް ޖެހޭގޮތް ވަނީ ނުވެފައެވެ. ކޯޗު ރޮބާޓޯ މާޓިނޭޒް، ފްރެންސިސްކޯ ކޮންސެއިސާއޯ ކުޅެން އެރުވުމުން ޓީމުގެ ހަމަލާތަކަށް ކޮންމެވެސް ވަރެއްގެ ބާރުމިނެއް އައި ނަމަވެސް، ނަތީޖާއަށް ބަދަލެއް ނުގެނެވުނެވެ.

މެޗުގައި ލަނޑު ނުޖެހުނު ނަމަވެސް، މި މެޗާއެކު ރޮނަލްޑޯ ވަނީ ތާރީޚީ ރެކޯޑެއްވެސް ގާއިމްކޮށްފައެވެ. އުމުރުން 41 އަހަރާއި 123 ދުވަހުގައި މެޗު ފެށި ރޮނަލްޑޯ އަކީ ވޯލްޑް ކަޕް މެޗެއް ފަށާފައިވާ އެންމެ އުމުރުން ދުވަސްވީ އައުޓްފީލްޑް ކުޅުންތެރިޔާއެވެ. އަދި އޭނާއަކީ ވޯލްޑް ކަޕެއްގައި ކުޅުނު 40 އަހަރުން މަތީގެ ދެވަނަ އައުޓްފީލްޑް ކުޅުންތެރިޔާވެސް މެއެވެ.

ޕޯޗުގަލްގެ މި ނަތީޖާއާއެކު، ގްރޫޕް ސްޓޭޖުގެ ކުރިއަށް ހުރި މެޗުތަކަކީ އެ ޓީމަށް ނުހަނު މުހިންމު މެޗުތަކަކަށް ވެގެންދާނެއެވެ.