އައިވަރީ ކޯސްޓާ ދެކޮޅަށް ރޭ ކުޅުނު މެޗުގައި ފަހަތުން އަރާ 2-1 އިން ޖަރުމަނު ވަނީ މޮޅުވެފައެވެ. މިއާއެކު 2014 ވަނަ އަހަރު ތަށި ހޯދި ފަހުން ފުރަތަމަ ފަހަރަށް ޖަރުމަނު ވަނީ ވޯލްޑް ކަޕްގެ ނޮކްއައުޓް ބުރަށް ދަތުރުކޮށްފައެވެ. މިއީ ޖަރުމަނުގެ ފޯވާޑް ޑެނިޒް އުންޑާވްގެ ވާހަކައެވެ.

މި މެޗުގައި ޖަރުމަނުގެ ދެ ލަނޑުވެސް ޖަހައިދިނީ މެޗުގެ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ފޯވާޑް ޑެނިޒް އުންޑާވްއެވެ.

އުމުރުން 29 އަހަރުގެ އުންޑާވް ވަނީ މި މުބާރާތުގައި ބަދަލު ކުޅުންތެރިއެއްގެ ގޮތުގައި ދެ މެޗަށް ނުކުމެ، ތިން ލަނޑު ޖަހައި ދެ އެސިސްޓް ހަދާފައެވެ. މިއީ 1966 ވަނަ އަހަރުގެ ފަހުން ވޯލްޑް ކަޕެއްގައި ބަދަލު ކުޅުންތެރިއަކު މިހާ ގިނަ ލަނޑުގައި ހިއްސާވި ދެވަނަ ފަހަރެވެ. މީގެ ކުރިން މި ރެކޯޑް ހަދާފައިވަނީ 1990 ވަނަ އަހަރު ކެމަރޫންގެ ރޮޖާ މިލާ އެވެ.

އުންޑާވްގެ މި ކާމިޔާބީއަކީ ވަރަށް އުނދަގޫ ދަތުރަކަށްފަހު ލިބިގެން ދިޔަ ކާމިޔާބީއެކެވެ.

މާރިޗު މަހު ގާނާއާ ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ނުކުމެ ލަނޑު ޖެހުމަށްފަހު، ފުރަތަމަ އެގާރައިގައި ހިމެނެން ބޭނުންވާ ކަމަށް އޭނާ ބުނުމުން ކޯޗު ނާގަލްސްމަން ވަނީ އޭނާއަށް ވަރަށް ބޮޑަށް ފާޑުކިޔައި ރައްދުދީފައެވެ. ނަމަވެސް ފަހުން ކޯޗު ވަނީ އެކަމަށް މާފަށް އެދިފައެވެ. މިހާރު އުންޑާވް ވަނީ ޖަރުމަނަށް ކުޅުނު 11 މެޗުން 9 ލަނޑު ޖަހާފައެވެ.

އުންޑާވްގެ މާޒީއަށް ބަލާއިރު، އޭނާގެ ފުޓްބޯޅަ ހަޔާތް ފެށުނީ ވަރަށް ހިތްދަތި ގޮތަކަށެވެ. އުމުރުން 14 އަހަރުގައި ވާޑާ ބްރޭމަން އިން އޭނާ ބޭރުކޮށްލީ "މާ ކުޑަ" ކަމަށް ބުނެއެވެ.

"އެކަމުން އަހަރެންގެ ހިތް ކުދިކުދިވި،" އުންޑާވް ބުންޏެވެ.

އޭނާ ވަނީ ޖަރުމަނުގެ ހަތަރުވަނަ ޑިވިޜަންގައި ކުޅެމުން، ދިރިއުޅުމުގެ ޚަރަދުތައް ބެލެހެއްޓުމަށްޓަކައި ދުވާލަކު 8 ގަޑިއިރު ފެކްޓްރީއެއްގައި ލޭޒާ މެޝިން އޮޕަރޭޓް ކުރުމުގެ މަސައްކަތް ކޮށްފައެވެ. ފަތިހު 4 ޖަހާއިރު ހޭލައިގެން ފެކްޓްރީއަށް ގޮސް މަސައްކަތުގައި އަވަދިނެތި އުޅުމަށްފަހު، ފުޓުބޯޅަ ޓްރެއިނިންގ ނިންމާފައި ގެއަށް އާދެވެނީ ރޭގަނޑު 8 ޖަހާއިރުއެވެ.

ބެލްޖިއަމްގެ ޔޫނިއަން ސެއިންޓް-ގިލޮއިސް އިން ވިދާލި އުންޑާވް، އެއަށްފަހު ބްރައިޓަންއަށް ބަދަލުވިއެވެ. އަދި އޭގެ ފަހުން ސްޓުޓްގާޓަށް ބަދަލުވެ، 2025-26 ވަނަ އަހަރުގެ ބުންޑެސްލީގާގައި 19 ލަނޑު ޖަހައި ހެރީ ކޭންގެ ފަހަތުން ދެވަނަ ހޯދިއެވެ. މިއީ އޭނާއަށް ވޯލްޑް ކަޕުން ޖާގަ ލިބުނު މައިގަނޑު ސަބަބެވެ.

އައިވަރީ ކޯސްޓް މެޗަށްފަހު ކޯޗު ނާގަލްސްމަން ބުނީ، އަންނަ ބުރާސްފަތި ދުވަހު އިކުއެޑޯއާ ދެކޮޅަށް ކުޅޭ މެޗުގައި އުންޑާވް ފުރަތަމަ އެގާރައިގައި ހިމެނުމުގެ ފުރުސަތު ބޮޑު ކަމަށެވެ.

"އޭނާގެ ފޯމު ހަލާކުކޮށްލަންވީ ކީއްވެ؟ ދެ ފަހަރު ބަދަލު ކުޅުންތެރިއެއްގެ ގޮތުގައި ނުކުމެ ދެ ފަހަރުވެސް އޭނާ ލަނޑު ޖަހައިފި،" ކޯޗު ބުންޏެވެ.

މެޗުގެ މޮޅު ކުޅުންތެރިޔާގެ އެވޯޑް ހޯދި އުންޑާވް ބުނީ މިއީ އާދަޔާޚިލާފު އިހުސާސެއް ކަމަށާއި، އެންމެ މުހިންމު ކަމަކީ ޓީމު މޮޅުވެ އަނެއް ބުރަށް ދަތުރުކުރުން ކަމަށެވެ. ޖަރުމަނުން ފަސްވަނަ ވޯލްޑް ކަޕް ތައްޓަށް އަމާޒު ހިފާފައިވާއިރު، އުންޑާވްއަކީ މިހާރު އެ ޓީމުގެ އެންމެ އުއްމީދީ އެއް ހަތިޔާރެވެ.