ބުރާސްފަތި ދުވަހު، ކުޅެވުނު ވޯލްޑްކަޕްގެ މެޗުތަކުގެ ތެރެއިން ޤަތަރާ ދެކޮޅަށް ކެނެޑާ ކުޅުނު މެޗުގައި، ކެނެޑާގެ ގައުމީ ފުޓްބޯޅަ ޓީމުގެ މެދުތެރެއަށް ކުޅޭ އުމުރުން 24 އަހަރުގެ، އިސްމާއިލް ކޯނޭއަށް ވަނީ ސީރިއަސް އަނިޔާތަކެއް ލިބިފައެވެ.

ކެނެޑާ 6-0 އިން މޮޅުވި މި މެޗުގެ 51 ވަނަ މިނެޓުގައި، ގަތަރުގެ އާސިމް މަދީބޯ ކުރި ނުރައްކާތެރި ޓެކުލަކާ ގުޅިގެން ކޯނޭއަށް ވަނީ ބޮޑު އަނިޔާއެއް ލިބިފައެވެ. ދަނޑުމަތީގައި ގިނަ ވަގުތު ފަރުވާ ދިނުމަށްފަހު އޭނާ ބޭލީ ސްޓްރެޗަރުގައެވެ. ސްޓްރެޗަރުގައި އޮވެ ދަނޑުން ފައިބައިގެން ދިޔައިރު، އޭނާ އޮތީ އޮކްސިޖަން ގުޅާފައެވެ. ނަމަވެސް، ކޯނޭ ވަނީ ސަޕޯޓަރުންނަށް އަތުގެ އިޝާރާތުން "ތަމްބްސް-އަޕް" ދީ، އަތް ހޫރުވާލާފައެވެ.

އަނިޔާއާ ގުޅިގެން ކޯނޭ ވަނީ ސާޖަރީއެއް ހަދާފައެވެ. ކެނެޑާ ސޮކަރއިން ބުނެފައިވާ ގޮތުގައި، ކޯނޭއަށް މި މުބާރާތުގެ ބާކީ ހުރި މެޗުތަކުގައި ނުކުޅެވޭނެއެވެ. ނަމަވެސް އޭނާ މުޅިން ރަނގަޅުވާނެ ކަމަށް އުންމީދު ކުރެވެއެވެ.

މި ހާދިސާއާ ގުޅިގެން ކޯނޭގެ އިންސްޓަގްރާމްގައި ލިޔެފައިވާ ޕޯސްޓެއްގައިވަނީ އޭނާގެ އިހްސާސްތައް ބަންޑުން ކޮށްލާފައެވެ.

އެގޮތުން އޭނާ ބުނީ މާތްالله އޭނާ ދުވަހަކުވެސް ދޫކޮށްނުލައްވާ ކަމަށާއި، މި ކުރިމަތިވި ހާލަތަކީ އޭނާގެ އީމާންތެރިކަމާއި ސަހުސިއްޔަތު ވަޒަންކުރުމަށް ކުރިމަތިވި އިމްތިހާނެއް ކަމަށެވެ.

"މާތްﷲ އަހަރެން ދުވަހަކުވެސް ދޫކޮށްނުލައްވާ. މުޅި ހަޔާތުގައިވެސް އެންމެ ފަހަރަކުވެސް އެކަލާނގެ އަހަރެން ދޫކޮށްނުލައްވާ. އެހެންވީމާ މިހާރު ޝައްކުކުރަންވީ ކީއްވެ؟" ކޯނޭ ލިޔެފައިވެއެވެ.

އޭނާ އިތުރަށް ބުނެފައިވަނީ ކޮންމެ ކަމެއް ހިނގުމުގެ ކުރިންވެސް އެކަލާނގެ ހުރިހާ ކަމެއް ދެނެވޮޑިގެންވާ ކަމަށާއި، ކޮންމެ މީހަކަށްވެސް އެމީހަކަށް ކެތްނުކުރެވޭނެ ވަރުގެ ތަކުލީފެއް އެކަލާނގެ ނުޖައްސަވާނެ ކަމަށެވެ.

ކޯނޭ ވަނީ އޭނާއަށް ހެޔޮދުއާކޮށް، ސަޕޯޓް ދިން ހުރިހާ ފަރާތްތަކަށް ވަރަށް ބޮޑަށް ޝުކުރު އަދާކޮށްފައެވެ. އަދި ކެނެޑާ ޓީމުގެ ކުޅުންތެރިންނާ މުހާތަބުކޮށް ބުނެފައިވަނީ، އޭނާ މިހާރު ހުރީ ސައިޑްލައިންގައި ހުރި އެސިސްޓަންޓް ކޯޗެއްގެ ގޮތުގައި އެކުވެރިންނަށް ސަޕޯޓްދޭން ތައްޔާރަށް ކަމަށެވެ.

"އަހަރެން ވަރަށް އަވަހަށް އެނބުރި އަންނާނަން،" ކުރިން ވަޓްފޯޑަށްވެސް ކުޅުނު ކޯނޭ ބުންޏެވެ.

ގްރޫޕް ބީގެ ފަހު މެޗުގައި ޖޫން 24 ގައި ކެނެޑާ ނުކުންނާނީ ސްވިޒަލޭންޑާ ދެކޮޅަށެވެ.