ޕާކިސްތާނުގެ ޕަންޖާބު ޕްރޮވިންސްގެ ޗަކްވާލްގައި، އޮސްޓްރޭލިއާއަށް ނިސްބަތްވާ އުމުރުން 9 އަހަރުގެ ހާނިޔާ އަހުމަދު ގަޔަށް ފުލުހުން ބަޑިޖަހައި މަރުވި ހާދިސާއާ ގުޅިގެން ޕާކިސްތާނުގެ ފުލުހުން މާފަށް އެދިއްޖެއެވެ.

މި ހާދިސާ ހިނގާފައިވަނީ ހާނިޔާ އާއި އޭނާގެ އާއިލާ ޗަކްވާލްގައި ހުންނަ އާއިލީ މީހެއްގެ ގެއަށް ޒިޔާރަތްކޮށް، އެނބުރި ދަނިކޮށް ހަތިޔާރު އެޅި ބަޔަކު އެމީހުން ރެންޓަލް ކާރުގައި ތިއްބާ ރަހީނުކުރި ވަގުތެއްގައެވެ. އެވަގުތު އެ ސަރަހައްދަށް އައި ޕަންޖާބު ފުލުހުންގެ ކްރައިމް ކޮންޓްރޯލް ޑިޕާޓްމަންޓްގެ އޮފިސަރުން ވަނީ ހަތިޔާރު އެޅި މީހުންނަށް އަމާޒުކޮށް މެޝިން ބަޑިން ހަމަލާދީފައެވެ.

ފުލުހުން ނެރުނު ބަޔާނެއްގައި ބުނެފައިވަނީ، ހަމަލާގެ ތެރޭގައި އޮފިސަރަށް އޮޅިގެން ކާރުގައި ފިލަން އުޅެނީ ކުށްވެރިން ކަމަށް ހީކޮށް ކާރަށް ބަޑިޖެހީ ކަމަށެވެ. މި ބަޑީގެ ހަމަލާތަކުގައި ހާނިޔާގެ ގަޔަށް 4 ވަޒަން އަރައި، ހޮސްޕިޓަލަށް ގެންދިއުމުގެ ކުރިން ވަނީ މަރުވެފައެވެ. އަދި މި ހާދިސާގައި ހާނިޔާގެ ބައްޕަ، އަދީލް އަހުމަދު އާއި އޭނާގެ 11 އަހަރުގެ ބޭބެ އާފާން އަށް ވެސް ވަނީ އެކިވަރުގެ އަނިޔާތައް ލިބިފައެވެ. ނަމަވެސް އޭނާގެ މަންމަ ސަލާމަތްވިއެވެ.

ޕާކިސްތާނު ފުލުހުން ބުނި ގޮތުގައި، ކާރަށް ބަޑިޖެހި އޮފިސަރު ވަނީ ފުލުހުންގެ މިންގަނޑުތަކާއި ހަތިޔާރު ބޭނުންކުރުމުގެ އުސޫލުތަކާ މުޅިން ހިލާފުވެފައެވެ. އެހެންކަމުން އެ އޮފިސަރު މިހާރު ވަނީ ވަޒީފާއިން އެކަހެރިކޮށް، ހައްޔަރުކޮށް، ޝަރީއަތް ކުރިއަށްދަންދެން ބަންދުކޮށްފައެވެ.

އޮސްޓްރޭލިއާގެ ޕާތު ސިޓީއަށް ނިސްބަތްވާ މި އާއިލާއަކީ ސައުދީ އަރަބިއްޔާގައި ހައްޖުގެ އަޅުކަން ފުރިހަމަކުރުމަށްފަހު، ޕާކިސްތާނުގައި ތިބި ތިމާގެ މީހުންނަށް ޒިޔާރަތްކުރި އާއިލާއެކެވެ.

މި ހާދިސާއާ ގުޅިގެން އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް ވަނީ ކަންބޮޑުވުން ފާޅުކުރައްވައި، މިކަން ހިނގާދިޔަ ގޮތް ދެފުށް ފެންނަ ގޮތަކަށް، ފުރިހަމައަށް ތަހުގީގުކޮށްދިނުމަށް ޕާކިސްތާނު ސަރުކާރަށް ގޮވާލައްވާފައެވެ.