ފަޟީލަތުއްޝައިޚު އިސްމާޢީލް މުޙައްމަދު އަވަހާރަވީ އިރު، ކީރިތި ޤުރްއާނުގެ ތަފްސީރު އެއްކޮށް ދިވެހި ބަހަށް ތަރުޖަމާކޮށް ނިންމަވާފައިވާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޝަހީމް މިއަދު ވިދާޅުވީ، މިހާރު ކުރިއަށް ދަނީ އެ ތަފްސީރު ފޮތް ޗާޕު ކުރުމުގެ މަސައްކަތް ކަމަށެވެ.
ޝެއިޚް އިސްމާޢީލް އަވަހާރަވީ މިއަދުއެވެ. ޖަނާޒާ އޮތީ މެންދުރު ނަމާދަށްފަހު އިސްލާމީ މަރުކަޒުގައެވެ.
މީގެ ކުރިންވެސް ޝަހީމް ވިދާޅުވި ގޮތުގައި، ޝައިޚް އިސްމާޢީލަކީ ޢިލްމު ފެތުރުމާއި ޢިލްމީ ޖީލެއް ބިނާކުރެއްވުމުގެ ނަމޫނާ ޝަޚްޞިއްޔަތެކެވެ. ޝެއިޚް ކުރެއްވި އެންމެ މުހިންމު އެއް މަސައްކަތްޕުޅެއްގެ ގޮތުގައި މިނިސްޓަރު ފާހަގަކުރެއްވީ، މާތްވެގެންވާ ކީރިތި ޤުރުއާނުގެ ތަފްސީރު އެއްކޮށް ދިވެހި ބަހުން ލިޔުއްވުމެވެ.
އެ ތަފްސީރުފޮތް ޗާޕުކޮށްގެން ނެރުމުގެ މަސައްކަތް ކުރަނީ އިސްލާމިކް މިނިސްޓްރީންނެވެ.
ޝައިޚް އިސްމާޢީލް މުޙައްމަދަކީ ސަޢުދީ ޢަރަބިއްޔާގެ މަދީނާ އިސްލާމިކް ޔުނިވަރސިޓީން ކިޔަވައި ނިންމެވި އެންމެ ފުރަތަމަ ދިވެހި ދަރިވަރެވެ. އެއީ ދުނިޔޭގެ މަޝްހޫރު ޢިލްމުވެރިޔާ ޝައިޚް އިބްނު ބާޒްގެ އަރިހުން އުނގެނިވަޑައިގަތް ދަރިވަރެއްވެސް މެއެވެ.
ރާއްޖެ ދުށް ވަރުގަދަ ޢިލްމުވެރިއެއްގެ ގޮތުގައި ފާހަގަކުރެވޭ ޝައިޚް އިސްމާޢީލަކީ، ތަފާތު އެކި މައުޟޫޢުތަކަށް ޢިލްމީ ދަރުސްތައް ދެއްވުމުގެ އިތުރުން، ދީނީ ގިނަ ފޮތްތަކެއް ލިޔުއްވާފައިވާ ބޭފުޅެކެވެ.
Advertisement
This content is created and paid for by advertisers and does not involve Voice Journalists
