ނިރުބަވެރި އިސްރާއީލުގެ ޖަލުތަކުގައި ތިބި ފަލަސްތީނުގެ މުސްލިމް އަސީރުން ބޭތިއްބުމަށް ހަދާފައިވާ ކެޓްޒިއޮޓް ޖަލުގެ ވަށައިގެން ކިނބޫ ގެންގުޅުމަށް އެ ޖަމާއަތުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން ގްވީރު ރާވާފައިވާ ރޭވުން ތަންފީޒުކުރުން، ގުދުސްގެ ޑިސްޓްރިކްޓް ކޯޓުން ވަގުތީ ގޮތުން ހުއްޓުވައިފިއެވެ.
މިދިޔަ އާދިއްތަ ދުވަހު ކޯޓުން މި އަމުރު ނެރުނީ، ޖަނަވާރުންގެ ހައްގުތަކަށް މަސައްކަތްކުރާ ޖަމާއަތަކުން ހުށަހެޅި ޝަކުވާއަކާ ގުޅިގެންނެވެ. އެ ޖަމާއަތުން ބުނެފައިވަނީ، އިސްރާއީލުގެ އެންވަޔަރަންމަންޓް މިނިސްޓަރު އިދިތު ސިލްމަން، ގާނޫނީ ލަފަޔާއި ތަޖުރިބާކާރުންގެ އިރުޝާދާ ޚިލާފަށް، ކިނބުލަކީ ހިމާޔަތްކުރެވިފައިވާ އެއްޗެއް ނޫން ކަމަށް ކަނޑައަޅާފައިވާ ކަމަށެވެ.
ނިރުބަވެރި އިސްރާއީލުގެ ހައްދުފަހަނައަޅާފައިވާ މިނިސްޓަރު ބެން ގްވީރުގެ ރޭވުމަކީ، ޖަލުގެ ވަށައިގެން ކޯރު ހަދައި، އެ ތަނަށް ކިނބޫ ދޫކޮށްލުމެވެ. މިއީ ޖަލުން ފިލަން މަސައްކަތްކުރާ ފަލަސްތީނު މީހުންނަށް ބިރުދެއްކުމަށާއި، އެމީހުންގެ ފުރާނައަށް ނުރައްކާ ކުރުމަށް ރާވާފައިވާ ރޭވުމެކެވެ. މި މަޝްރޫއަށް ނިރުބަވެރި އިސްރާއީލުގެ ސަރުކާރުން 21 މިލިއަން ޝެކެލް (7 މިލިއަން ޑޮލަރު) ބަޖެޓުކޮށްފައިވާއިރު، މިހާރުވެސް ޖަލު ވަށައިގެން ކޯރު ކޮނުމުގެ މަސައްކަތް ދަނީ ކުރަމުންނެވެ.
ކޯޓުގެ ގާޒީ އަބްރަހަމް ރޫބިން ނެރުނު އަމުރުގައި ބުނެފައިވަނީ، މިކަމުގެ ސަބަބުން ކިނބޫތަކަށް ލިބިދާނެ ގެއްލުމަކަށް ބަލައި، ކޯޓުން ވަކި ގޮތެއް ނިންމަންދެން އެއްވެސް ކިނބުލެއް ޖަލަށް ބަދަލުކޮށްގެން ނުވާނެ ކަމަށެވެ. އަދި މި މައްސަލައިގައި ޖަވާބުދާރީވުމަށް ބެން ގްވީރަށާއި ކަމާބެހޭ ފަރާތްތަކަށް ވަނީ އަންގާފައެވެ.
އިސްރާއީލުގެ ނޭޗަރ އެންޑް ޕާކްސް އޮތޯރިޓީން ބުނެފައިވަނީ، ދުނިޔޭގެ އެއްވެސް ތަނެއްގައި ސަލާމަތީ ފިޔަވަޅެއްގެ ގޮތުން ޖަލުތަކުގައި ކިނބޫ ގެންގުޅޭ ކަމުގެ އެއްވެސް އިލްމީ ނުވަތަ ފަންނީ ހެއްކެއް ނެތް ކަމަށެވެ. އަދި މިއީ ޖަލުގެ މުވައްޒަފުންނަށާއި، އަސީރުންނަށް އަދި ތިމާވެއްޓަށް ވެސް އޮތް ބޮޑު ނުރައްކަލެއް ކަމަށް އެ ފަރާތުން ބުނެފައިވެއެވެ.
ބެން ގްވީރުގެ އޮފީހުން ބުނެފައިވަނީ، މިއީ "ޖޯކެއް" ކަމަށް ހީކުރި މީހުންނަށް މިހާރު އެކަން އޮޅުންފިލާނެ ކަމަށާއި، ޖަލުތަކުގެ ވަށައިގެން ކޯރު ކޮނުމުގެ އަމަލީ މަސައްކަތް ހުއްޓުމެއް ނެތި ކުރިއަށްދާ ކަމަށެވެ. މި ރޭވުމަކީ އެމެރިކާގެ ފްލޮރިޑާގައި ހިޖުރަވެރިން ބޭތިއްބުމަށް ހަދާފައިވާ "އެލިގޭޓަރ އަލްކަޓްރާޒް" ކިޔާ މަރުކަޒަކުން ނަމޫނާ ނަގައިގެން ކުރާ ކަމެއް ކަމަށް ވެއެވެ.
Advertisement
This content is created and paid for by advertisers and does not involve Voice Journalists
