އެމެރިކާގެ ފިލަޑެލްފިއާ ސްޓޭޑިއަމްގައި ރޭ ފްރާންސް އާއި އިރާޤު ކުޅުނު ވޯލްޑް ކަޕްގެ ފޯރިގަދަ މެޗު، ގުގުރުމާއެކު ބޯކޮށް ވާރޭވެހުމުގެ ސަބަބުން ދެ ގަޑިއިރަށް މެދުކަނޑާލަން ޖެހުނެވެ.

ފްރާންސާއި އިރާގު ބައްދަލުކުރި މި މެޗު ރާއްޖެ ގަޑިން ދަންވަރު 2:00 (އެމެރިކާގެ ގަޑިން 17:00)ގައި ފެށި ނަމަވެސް، މޫސުން ގޯސްވުމުގެ ސަބަބުން މެޗު ނިންމާލެވުނީ 5:47 (އެމެރިކާ ގަޑިން 20:47) ގައެވެ. ފްރާންސް 1-0 އިން ކުރީގައި އޮއްވާ ފުރަތަމަ ހާފު ނިމުނުތަނާ، ބޯކޮށް ވާރޭވެހި ގުގުރަން ފެށުމުން ރެފްރީ ވަނީ ސަލާމަތީ ސަބަބުތަކަށްޓަކައި މެޗު މެދުކަނޑާލާފައެވެ.

މެޗު އަލުން ފެށުނީ ގާތްގަނޑަކަށް އެއްގަޑިއިރާއި 40 މިނެޓުގެ މެދުކަނޑުމަކަށް ފަހު 5:00 ގައެވެ. މެޗު އަލުން ފަށައިގެން ފްރާންސުން ވަނީ އިތުރު ދެ ލަނޑު ޖަހައި 3-0 އިން މެޗު ކާމިޔާބުކޮށްފައެވެ.

ފްރާންސްގެ ކެޕްޓަން ކީލިއަން އެމްބާޕޭ އޭނާގެ 100 ވަނަ ބައިނަލްއަގުވާމީ މެޗުގައި ދެ ލަނޑު ޖަހައި، ޓީމު ގަދަ 32 އަށް ގެންގޮސްދިނެވެ.

މެޗު މެދުކަނޑާލާފައި އޮތް ވަގުތު ކުޅުންތެރިން ކުރި ކަންތައްތަކާ ގުޅޭގޮތުން އެމްބާޕޭ ބުނީ، އެހާ ގިނަ ވަގުތު ހޭދަކުރަން ޖެހުމަކީ ނަފްސާނީ ގޮތުން ވަރަށް ވަރުބަލިވި ކަމެއް ކަމަށެވެ.

"ޑްރެސިން ރޫމުގައި ދެ ގަޑިއިރެއްހާއިރު މަޑުކޮށްގެން ތިބިއިރު، މެޗަށް ދީފައިވާ ސަމާލުކަން ނުގެއްލި ހިފެހެއްޓުމަކީ ވަރަށް އުނދަގޫ ކަމެއް. އެއީ އިމޯޝަނަލީ އަދި މެންޓަލީ ވަރަށް ވަރުބަލިވި ކަމެއް،" އޭނާ ބުންޏެވެ.

ފްރާންސްގެ ކޯޗު ޑިޑިއޭ ޑެޝޯމްޕް ސަމާސާ ރޫހެއްގައި ބުނީ އެ ވަގުތު ކުޅުންތެރިން ކާޑު ކުޅުނު ކަމަށެވެ. 

ނަމަވެސް، ފްރާންސްގެ ޑިފެންޑަރު ޔޫލްސް ކޫންޑޭ ބުނީ ކުޅުންތެރިން ހަށިގަނޑު ހަރަކާތްތެރިކޮށް ބެހެއްޓުމަށްޓަކައި ބައިސްކަލް ދުއްވުމުގެ ކަސްރަތު ކުރި ކަމަށެވެ.

”ބޮޑު ބްރޭކް އެއް އައުމުން ކުރެވުނީ އަލުން މެޗު ފެށުނު ކަމުގެ އިހްސާސް. އަހަރެމެން ސައިކްލިން އެކްސަސައިޒް ކުރުމަށްފަހު، ވާހަކަދައްކާލަން މަޑު ކޮށްލީ. ދެން ވާމް އަޕް ހެދުމަށްފަހު ދަނޑަށް އެރުމަށް ތައްޔާރުވީ“ޔޫލްސް ކޫންޑޭ ބުންޏެވެ. 

އިރާގުގެ ކޯޗު ގްރަހަމް އާނޯލްޑް ބުނި ގޮތުގައި މިއީ ޙަޔާތުގައި މިފަދައިން ކަން ދިމާވި ފުރަތަމަ ފަހަރެވެ. އަދި މެޗު މެދުކަނޑާލަން ޖެހުމުން އޭނާ އެ ވަގުތު ބޭނުންކުރީ ފުރަތަމަ ހާފުގެ ވީޑިއޯ އެނަލިސިސް ހެދުމަށެވެ. އަދި ދެވަނަ ހާފު ފަށައިގެން އިރާގުގެ ފަރާތުން ފެނުނު ގޯސްތަކަކީ މި ދިގު މެދުކަނޑުމުގެ ސަބަބުން ސަމާލުކަން ގެއްލުމުގެ ނަތީޖާ ކަމަށް އޭނާ ގަބޫލުކުރެއެވެ.

އެމެރިކާގެ ގަވާއިދުތައް ބުނާގޮތުން، ސްޓޭޑިއަމާ 8 މޭލު ކައިރިއަށް ހޮނުއަޅާނަމަ ކުޅިވަރުގެ ހަރަކާތްތައް ވަގުތުން ހުއްޓާލަންޖެހެއެވެ. 68,000 އަށްވުރެ ގިނަ ސަޕޯޓަރުން ތިބި މި ސްޓޭޑިއަމްގައި، މެޗު މެދުކަނޑާލި ވަގުތު ސަޕޯޓަރުންނަށް ވަނީ ރައްކާތެރި ހިސާބުތަކަށް ދިއުމަށް އަންގާފައެވެ. މޫސުން ރަނގަޅުވިކަން އިއުލާން ކުރުމާއެކު ސަޕޯޓަރުންގެ ފަރާތުން ބޮޑު ތަރުހީބެއް ލިބިގެންދިޔައެވެ.

މިއީ މި ފަހަރުގެ ވޯލްޑް ކަޕްގައި މޫސުމުގެ ސަބަބުން މެޗެއް މެދުކަނޑާލަން ޖެހުނު ފުރަތަމަ ފަހަރެވެ. މި ދިގު މެދުކަނޑުމަށްފަހު ވެސް ދެވަނަ ހާފުގައި "ހައިޑްރޭޝަން ބްރޭކެއް" ނުދޭއިރު، އިތުރު ވަގުތުގެ ގޮތުގައި ދިނީ އެންމެ ދެ މިނެޓެވެ.